بايقاپ وتىرساق، «ومىردە نە بولمايدى» دەگەن ءسوزدىڭ تيتىمدەي دە وتىرىگى جوق ەكەن. وتكەندە وسى قوستاناي وبلىسىنىڭ ۇزىنكول دەگەن اۋدانىندا سۋىقتان جانى قىسىلعان بالالى-شاعالى جاس ايەل ءۇيىن جىلىتۋعا شارا تاپپاي سونداعى اۋرۋحانا جانىنداعى كومىردىڭ ءبىر شەلەگىن ۇرلاپ العان كورىنەدى. شاراسىزدىقتان دا ارينە.

اۋىل تۇگىلى، بۇكىل ەلىمىزدە وسى وتىننىڭ قات بولىپ تۇرعاندىعىن ەسكەرسەك، بۇل ايەلدى جازعىرۋدىڭ ءوزى دە ارتىقتاۋ سەكىلدى. الايدا قاشاندا شوقپارى دايىن تۇراتىن قۇقىق قورعاۋ ورگاندارى ونى ايامادى. وعان قاتىستى ءتىپتى وزگەنىڭ مۇلكىن ۇرلادى دەپ قىلمىستىق ءىس تە قوزعالدى. سونداعى مۇلىك دەگەنىنىڭ قۇنى 180 تەڭگەدەن اسپايتىن دۇنيە ەكەن. سونىمەن الگى ايەل قر قىلمىستىق كودەكسى 68-ءشى بابىنىڭ 1-ءشى تارماعىنا ساي قۇقىق بۇزۋشىلىققا باردى دەپ ەسەپتەگەن. الايدا  ەكى جاقتىڭ كەلىسىمىنە بايلانىستى قىلمىستىق جاۋاپكەرشىلىكتەن بوساتىلعان. نە دەگەن قايىرىمىدىلىق پەن جاناشىرلىق دەسەڭىزشى.

دەگەنمەن، بۇل ومىردە كەدەي-كەپشىككە قول ۇشىن سوزاتىن، كەرەك كەزىندە كومەگىن دە ايامايتىن جانداردىڭ بار ەكەندىگى قۋانتادى. مىنە، وسى ءبىر شەلەك كومىر وقيعاسىن ەستىگەن قوستاناي قالاسىنىڭ ءبىر كاسىپكەرى الگى جاۋراپ وتىرعان ايەلگە دەپ سوناۋ قوستاناي قالاسىنان اناۋ-مىناۋ ەمەس ءبىر ماشينا كومىر جىبەرىپتى. مىنەكەي، اتىمتاي جومارت دەپ وسىنداي ازاماتتى ايتار بولار. انشەيىندە ءبىز بايلاردىڭ بارلىعىن دا شەتىنەن الاياق، ۇرلىقشى، قۋلىقپەن مال تاپقىش دەپ تەرىس پىكىر جەتەگىندە كەتەمىز. الايدا ولاردىڭ اراسىندا جانى ىزگى، جۇرەگى جومارت، كوڭىلى كەڭ ازاماتتاردىڭ دا بار ەكەندىگىن ۇمىتىپ كەتىپ، اسىرا سىلتەپ جاتامىز. ەگەر وسى قوستانايداعى سەكىلدى كاسىپكەرلەر كوپ بولسا، حالىقتىڭ كەدەيلەۋ بولىگىنىڭ تىرشىلىگى ءسال دە بولسا جاقسارار ما ەدى؟

جايبەرگەن بولاتوۆ

Abai.kz