قىرعىزستاندا تمد ەلدەرى ء"ۇمىت" جاستار كينوسىنىڭ V فورۋمى وتەدى
قىرعىزستاندا 18-20 جەلتوقسان ارالىعىندا تمد ەلدەرى ء"ۇمىت" جاستار كينوسىنىڭ V فورۋمى وتەدى. بۇل جونىندە قىرعىزستاننىڭ مادەنيەت، اقپارات جانە تۋريزم مينيسترلىگى حابارلادى.
بۇل جولى فەستيۆال قىرعىزستانداعى ادامگەرشىلىك، تاربيە جانە مادەنيەت جىلىنا ارنالادى.
فەستيۆالدە ءۇش باعدارلاما بويىنشا فيلمدەر كورسەتىلەدى: ۇلتتىق جانە حالىقارالىق، سونىمەن بىرگە انيماتسيالىق فيلمدەر. بايقاۋعا ۇسىنىلعان كينولەنتالار بىشكەكتەگى شىڭعىس ايتماتوۆ اتىنداعى كينو ۇيىندە كورسەتىلەدى.
قازىلار القاسى قۇرامىندا قىرعىزستان، قازاقستان جانە رەسەيدىڭ تانىمال ونەر قايراتكەرلەرى مەن كينو تۇسىرۋشىلەر بار.
Abai.kz
