- ەلباسىمىز «بولاشاققا باعدار: رۋحاني جاڭعىرۋ» تاقىرىبىنداعى باعدارلامالىق ماقالاسىندا: «اجەپتاۋىر جاڭعىرعان قوعامنىڭ ءوزىنىڭ تامىرى تاريحىنىڭ تەرەڭىنەن باس¬تاۋ الاتىن رۋحاني كودى بولادى. جاڭا تۇرپاتتى جاڭعىرۋدىڭ ەڭ باستى شارتى – سول ۇلتتىق كودىڭدى ساقتاي ءبىلۋ»، – دەي كەلە، ۇلتتىق سانا-سەزىمنىڭ كوكجيەگىن كەڭەيتۋ قاجەتتىگىن باسا ايتقان ەدى. بۇل ورايدا وسكەلەڭ ۇرپاقتىڭ تامىرىن تەرەڭنەن العان ۇلتتىق قۇندىلىقتارمەن تانىستىراتىن ءارى مەملەكەتتىك ءتىلدى ناسيحاتتايتىن قازاق ءتىلدى تەلەجوبانىڭ ماڭىزى زور. سوندىقتان دا ءبىز قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىندا ناقتىلانعان باسىم باعىتتاردى جۇزەگە اسىرىپ، رۋحاني جاڭعىرۋعا زور سەپتىگىن تيگىزەتىن «ەنشى» زياتكەرلىك-تانىمدىق تەلەسايىسىن قولعا الدىق. تەلەجوبانىڭ باستى ماقسات-مىندەتى - قازاقتىلدى ءبىلىمدى جاستاردى قولداۋ، ولاردىڭ بويىندا پاسسيونارلىق قۋاتى بار ازامات رەتىندە قالىپتاسۋىنا ىقپال ەتۋ، ۇلتتىق قۇندىلىقتارىمىزدى، سالت-ءداستۇرىمىزدى ناسيحاتتاۋ، مەملەكەتتىك ءتىلدىڭ نىعايا تۇسۋىنە قىزمەت ەتۋ بولاتىن. بۇقارانىڭ بۇگىنگى وڭ كوزقاراسى مەن پىكىرى ءبىزدىڭ دىتتەگەن مەجەگە جەتە العانىمىزدى كورسەتەدى،- دەدى قر مادەنيەت جانە سپورت مينيسترلىگى تىلدەردى دامىتۋ جانە قوعامدىق ساياسي جۇمىس كوميتەتىنىڭ باس ساراپشىسى ولجاس شىنجىگىتوۆ.

ەلىمىزدەگى ەڭ ءبىلىمدى جاستى انىقتاۋعا ارنالعان تەلەجوباعا 1000-نان استام تالاپكەر ءوتىنىش بىلدىرگەن. الايدا ونىڭ 48 عانا تەلەسايىس جولداماسىن يەمدەنگەن. باسقوسۋ بارىسىندا ايماقتىق ىرىكتەۋ مەن قاتىسۋشىلارعا قويىلعان تالاپ توڭىرەگىندە ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى اقپارات جانە مونيتورينگ ءبولىمىنىڭ باسشىسى ءمولدىر باقىتقىزى تارقاتىپ ايتىپ بەردى.

- «ەنشى» زياتكەرلىك-تانىمدىق سايىسىنىڭ ىرىكتەۋ كەزەڭدەرى اقتاۋ، وسكەمەن، اقتوبە، الماتى، شىمكەنت، قىزىلوردا، استانا قالالارىندا ءوتتى. ءار ايماقتىڭ ءبىلىم باسقارمالارىمەن بىرلەسە جۇمىس جاسالىپ، وبلىستىڭ وزاتتارى عانا ىرىكتەۋگە قاتىسا الدى. ىرىكتەۋدىڭ ءوزى ەكى كەزەڭنەن تۇردى. العاشقى اينالىمدا تالاپكەرلەر 30 مينۋتتا 100 سۇراققا جاۋاپ بەرۋى ءتيىس بولسا، بۇدان جوعارى بالل جيناعان 12-15 ۇمىتكەر عانا ەكىنشى كەزەڭگە ءوتتى. ەكىنشى اينالىمدا بالالاردىڭ قارىم-قابىلەتىن، ناعىز ءبىلىمى مەن لوگيكاسىن، پسيحولوگياسىن انىقتاۋعا ارنالعان تاپسىرمالار بەرىلدى. ارنايى كوميسسيانىڭ شەشىمىمەن ءار ايماقتان 6 تالاپكەر تەلەجوبا جولداماسىن ەنشىلەدى. سونىمەن قاتار وزگە وڭىرلەردەگى وقۋشىلار مەن 1-2 كۋرس ستۋدەنتتەرىن تۇگەل قامتۋ ماقساتىندا «yensi.kz» سايتىندا ونلاين ىرىكتەۋ جاريالاندى. وندا 200-دەن استان ءوتىنىم بىلدىرۋشىدەن جوعارى ۇپاي جيناپ، باقىلاۋشىلاردىڭ سىنىنان وتكەن 1 عانا قاتىسۋشى تەلەجوباعا ىرىكتەلىپ الىندى،- دەدى ول.

تەلەارنادا كەز كەلگەن باعدارلامانىڭ ءوتىمدى بولۋى 50 پايىز ساۋندترەككە بايلانىستى. ال «ەنشى» سايىسىنىڭ ساۋندترەگى ءساتتى جازىلعان دەپ ايتۋعا تولىق نەگىز بار. سەبەبى تەلەسايىس ۇلتتىق قۇندىلىقتار مەن جاڭعىرۋعا نەگىزدەلگەندىكتەن، ساۋندترەك پەن ءار ايدارداعى ترەكتەردە زاماناۋي مۋزىكا مەن ءداستۇرلى مۋزىكا ءساتتى ۇندەستىك تاپقان. سوندىقتان بريفينگ بارىسىندا «ەنشى» زياتكەرلىك سايىسىنىڭ ساۋندترەك اۆتورى قۇرماش ماحانوۆقا جۋرناليستەر تاراپىنان ءجيى سۇراق قويىلدى.

- ساۋندترەك جازۋ بارىسىندا رەيتينگى جوعارى فيلمدەر مەن سەريالداردىڭ دا مۋزىكاسىنا اسا ءمان بەرىلدى. سەبەبى ءبارى اۋديتوريا، تىڭدارمان ءۇشىن جاسالاتىن بولعاندىقتان، بۇگىنگى تالعاممەن ساناسۋ مىندەت. الايدا وزىندىك بوياۋى بولۋى كەرەك. سوندىقتان زاماناۋي مۋزىكاعا ءداستۇرلى ءار بەرىلدى،- دەدى سازگەر، ەسترادا جۇلدىزى قۇرماش ماحان.

جوبا يدەياسىنىڭ اۆتورى ناريمان قويشىباەۆ ەركىن فورماتتاعى بريفينگ بارىسىندا تەلەسايىستىڭ ەرەجەسى مەن فورماتى تۋرالى ايتىپ ءوتتى. سونىمەن قاتار «ەنشى» زياتكەرلىك سايىسىنىڭ وتۋىنە جانە ەلىمىزدىڭ باستى تەلەارناسىنان كورسەتىلۋىنە قولداۋ كورسەتىپ، مۇرىندىق بولعان قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنا العىسىن ءبىلدىردى.

- بارىڭىزگە بەلگىلى، وتاندىق تەلەارنالاردا ينتەللەكتۋالدىق سايىستار جوقتىڭ قاسى. ءححى عاسىر كوشباسشىسىنان كەيىن مەكتەپ وقۋشىلارى مەن ستۋدەنتتەرگە ارنالعان زياتكەرلىك سايىس بولمادى دەسەك تە ارتىق ايتقاندىق ەمەس. سوندىقتان جاستاردىڭ بىلىمگە دەگەن قۇلشىنىسىن ارتتىرىپ، باسەكەگە بەيىمدىلىكتەرىن بايقاتاتىن «ەنشى» سايىسىن ۇيىمداستىرۋعا قولداۋ كورسەتكەن، تاپسىرىس بەرگەن قر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى مەن ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىنا ۇلكەن راحمەت ايتامىن،- دەدى ول.

ەركىن فورماتتاعى بريفينگ سوڭىندا الەۋمەتتىك جەلىلەردەگى «ەنشى» پاراقشاسىندا جۋرناليستەر مەن بلوگەرلەرگە ارنالعان سايىس جەڭىمپازدارى ماراپاتتالدى. باق وكىلدەرى اراسىندا ۇيىمداستىرىلعان بايقاۋ جەڭىمپازى بولىپ «استانا» راديوسىنىڭ ءجۋرناليسى جانات قابىلداۇلى تانىلدى. ال ەكىنشى ورىندى «ەلانا» سايتىنىڭ ءتىلشىسى ەرقازى سەيتقالي ەنشىلەسە، ۇزدىك ۇشتىك قاتارىن «ءبىلىم ايناسى» گازەتىنىڭ ءجۋرناليسى جانسايا مۇستافينا تولىقتىردى.

P.S. «ەنشى» يەسى اتانىپ، 1 000 000 تەڭگەنى قانجىعاسىنا بايلايتىن ناعىز ءبىلىمدى جاستى كورگىڭىز كەلسە، ءار جۇمادا 16:15-تە ەلدىڭ باستى ارناسى «Qazaqstan» ۇلتتىق تەلەارناسىن قوسۋدى ۇمىتپاڭىز! «ەنشى» يەسىن ەل بولىپ انىقتايىق!

Abai.kz