مەملەكەت باسشىسى اقپارات جانە كوممۋنيكاتسيالار ءمينيسترى داۋرەن اباەۆتى قابىلدادى. قابىلداۋ بارىسىندا مينيستر مەملەكەت باسشىسىنا «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋ اياسىندا قويىلعان مىندەتتەردىڭ ىسكە اسىرىلۋ بارىسى جونىندە مالىمدەلدى،- دەپ حابارلايدى اباي-اقپارات اقوردانىڭ ءباسپاسوز قىزمەتىنە سىلتەمە جاساي وتىرىپ.

ەلباسى يننوۆاتسيالار مەن جاڭا تەحنولوگيالاردى ەنگىزۋ جونىندەگى جۇمىستاردى جالعاستىرۋ، سونداي-اق بۇل ۇردىسكە «قازاقستانداعى 100 جاڭا ەسىم» جوباسىنا قاتىسۋشىلاردىڭ كرەاتيۆتى الەۋەتىن پايدالانۋ قاجەت ەكەنىن اتاپ ءوتتى.

سونىمەن قاتار، نۇرسۇلتان نازارباەۆ قازاق ءتىلىن لاتىن قارپىنە كوشىرۋ ماسەلەسىنە توقتالىپ، مەملەكەتتىك ءتىلدىڭ مارتەبەسىن ارتتىرۋعا باعىتتالعان شارالار قابىلداۋدىڭ ماڭىزدىلىعىن ايتتى.

– حالقىمىز ءۇشىن لاتىن قارپىنە كوشۋ ۇدەرىسىنىڭ تاريحي ءمانى زور. سونىمەن بىرگە، قازاق ءتىلىنىڭ مارتەبەسىن ارتتىرۋ جونىندەگى جۇمىستاردى جالعاستىرۋ قاجەت. پارلامەنت پەن ۇكىمەتتىڭ قىزمەتى مەملەكەتتىك تىلدە جۇرگىزىلۋگە ءتيىس. سونداي-اق، بۇل ماسەلە بويىنشا ازاماتتاردىڭ قۇقىعىن شەكتەۋگە بولمايدى. بۇل رەتتە ىلەسپە اۋدارما جاساۋ مۇمكىندىگى بار، – دەدى قازاقستان پرەزيدەنتى.

مەملەكەت باسشىسى لاتىن قارپىنە كەزەڭ-كەزەڭمەن كوشۋدىڭ ماڭىزدىلىعىن ايتىپ، قازاق ءتىلىن ۇيرەتۋ ادىستەمەلەرىن جەتىلدىرۋ ماسەلەلەرىن جان-جاقتى زەرتتەۋدى تاپسىردى.

بۇدان بولەك، ەلباسى كيبەرقاۋىپسىزدىكتى قامتاماسىز ەتۋ جانە وتاندىق بۇقارالىق اقپارات قۇرالدارىنىڭ باسەكەگە قابىلەتتىگىن ارتتىرۋ ماسەلەلەرىنە نازار اۋداردى.

نۇرسۇلتان نازارباەۆ ەلىمىزدىڭ تەلەارنالارىنداعى سەريالىق ونىمدەردىڭ ساپاسىن ارتتىرۋ قاجەتتىگىنە توقتالىپ، ماسس-مەديا جاستارعا پاتريوتتىق تاربيە بەرۋ ىسىندە ماڭىزدى ءرول اتقاراتىنىن اتاپ ءوتتى.

كەزدەسۋ بارىسىندا داۋرەن اباەۆ قازاقستان پرەزيدەنتىنە «تسيفرلىق قازاقستان» باعدارلاماسىن ىسكە اسىرۋ جوسپارى تۋرالى بايانداپ، ونىڭ باسىم باعىتتارىن تۇسىندىرۋگە بايلانىستى شارالار جونىندە مالىمەت بەردى.

– ءبىز «تسيفرلىق قازاقستان» مەملەكەتتىك باعدارلاماسىن جۇزەگە اسىرۋ جۇمىستارىن جالعاستىرۋدامىز. جالپى، باعدارلاما اياسىندا 120 بىرلەسكەن ءىس-شارا كوزدەلگەن، ونىڭ جيىرماسى بيىل ورىندالاتىن بولادى، – دەدى اقپارات جانە كوممۋنيكاتسيالار ءمينيسترى.

سونداي-اق، د.اباەۆ نۇرسۇلتان نازارباەۆقا «استانا ەكسپو-2017» كورمە كەشەنى ينفراقۇرىلىمىنىڭ بازاسىندا قۇرىلعان «Astana Hub» حالىقارالىق تەحنوپاركى جۇمىسىنىڭ باستالعانىن مالىمدەدى.

كەزدەسۋ سوڭىندا مەملەكەت باسشىسى بىرقاتار ناقتى تاپسىرما بەردى.

Abai.kz