سەنبى, 8 مامىر 2021
«سوقىر» فەميدا 3377 2 پىكىر 2 ءساۋىر, 2018 ساعات 10:40

ارۋجان سايننىڭ ايتقاندارى جالعان

وقو-داعى 6 جاسار قىزعا بايلانىستى ارۋجان ساين جاريالاعان اقپاراتتى قىزدىڭ اتا-اناسى جوققا شىعاردى، - دەپ حابارلايدى اباي-اقپارات.

2018 جىلعى 30 ناۋرىز كۇنى تۇركىستان قالاسىنداعى «ەۆرازيا» قوناق ۇيىندە ءباسپاسوز بريفينگ ءوتىپ، قىزدىڭ اتا-اناسى ارۋجان سايننىڭ اقپاراتىنىڭ شىندىققا جاناسپايتىنىن جەتكىزگەن. 

ءسوزدىڭ باسىندا قىزدىڭ اكەسى قىزىنىڭ مەكتەپكە بارىپ جۇرگەنىن، ءارىپ تانىپ، ەسەپ شىعارۋدى مەڭگەرىپ جاتقانىن جانە جالپى جاعدايىنىڭ جاقسى ەكەنىن جەتكىزدى.

باستاماسىندا قىزدىڭ اتا-اناسى تۇركىستان قالاسىنداعى حقتۋ كلينيكاسىنا ەمدەلگەن. كەيىننەن تاشكەنت قالاسىندا قاتىناپ ءجۇرىپ، 1 جىلداي ەم قابىلداعان. سودان كەيىن اتا-انا الەۋمەتتىك جەلى ارقىلى ارۋجان ساين كومەك بەرەدى دەگەن نيەتپەن حابارلاسىپ، كومەك سۇراعان.

ارۋجان ساين قىزدىڭ قۇجاتتارىمەن تانىسىپ، قازاقستان رەسپۋبليكاسىنىڭ باس پروكۋراتۋراسىنا بالانىڭ اتا-اناسىنا قاتىستى «اتا-انا قۇقىعىنان ايىرۋ» تۋرالى ارىز بەرگەن. قر باس پروكۋراتۋراسى قىلمىستىق ءىش اشىپ، وقو جانە تۇركىستان قالالىق پروكۋراتۋرالارىنىڭ باقىلاۋىمەن 1,5 جىلداي ۋاقىتتا تەرگەۋ جۇرگىزىلگەن.

وسى تەرگەۋ امالدارى جۇرگىزىلگەن ارالىقتا بالانىڭ دەنساۋلىعى ناشارلاپ، ەم قابىلداۋىنا قاتتى كەدەرگى بولدى. ويتكەنى بالانى كۇتۋشى اتا-اناسى مەن تۋعان تۋىستارى، كورشىلەرىنە دەيىن تەرگەۋدە بولعان.

وسىلايشا كومەك سۇراپ بارعان اتا-اناعا ارۋجان ساين ارىز بەرىپ، بالانى ءتىرى اتا-اناسىنان ايىرىپ بالالار ۇيىنە وتكىزبەك بولعان. ناتيجەسىندە سوت بالانىڭ اتا-اناسىنا قاتىستى «اتا-انا قۇقىعىنان ايىرىلمايدى» دەپ وكىم شىعارىپ، نۇكتەسىن قويعان.

قىزدىڭ اكەسى ارۋجان سايننىڭ كومەكتەسۋدىڭ ورنىنا نەگە سوتقا بەرگەنىن تۇسىنبەيتىنىن جەتكىزدى. "اتا-اناسى ءتىرى بولا تۇرا قىزىن "بالالار ۇيىنە وتكىزەمىن" دەۋدەگى ماقساتى - «مەملەكەتتەن، شەت ەلدىك قورلاردان اقشا الۋدىڭ، بيزنەس جاساۋدىڭ، كۇن كورىسىن قامتاماسىز ەتۋدىڭ جولى ەمەس پە ەكەن؟" دەگەن سۇراققا ارۋجان سايننان جاۋاپ العىسى  كەلەتىنىن ايتتى. 

سونىمەن قاتار، ول: «فەيسبۋكتە تاراعان "ارۋجان سايننىڭ قىز ءتىرى مە، جوق پا بىلە الماي وتىرمىز. اكەسىنىڭ تەلەفونى ءوشىرۋلى" دەگەن اقپارىن 100 پايىز تەرىسكە شىعاردى. ءوز سوزىندە: "مەنىڭ ءنومىرىم اۋىسقان ەمەس جانە ەشكىم بۇل تاقىرىپتا حابارلاسپادى" دەدى. ارۋجانعا ءوزىمىز حابارلاسساق تەلەفونىن ءاردايىم كومەكشىلەرى كوتەرەدى، وعان شىعۋ مۇمكىن ەمەس جانە قىزىمنىڭ سالماعى مەن جاعدايىنا قاتىستى اقپاراتى دا جالعان» دەگەندى جەتكىزدى.

ءسوز سونىڭدا بالانىڭ اكەسى ارۋجان ساينمەن بەتپە-بەت كەزدەسۋگە دايىن ەكەندىگىن ايتىپ ءوتتى.

نۇرجان ايدارحان

Abai.kz

2 پىكىر