قازاقستان رەسپۋبليكاسى ۇلتتىق مۋزەيىندە «مادەنيەت پورتالى» (www.madeniportal.kz) ينتەرنەت-رەسۋرسىنىڭ تۇساۋكەسەر ءراسىمى ءوتتى. شارا بارىسىندا پورتالدىڭ جۇمىسى تانىستىرىلىپ، جاڭا جوباعا بەلگىلى اقىن ايجان تاباراكقىزى جەتەكشى بولىپ تاعايىندالدى.

«مادەنيەت پورتالى» – قازاقستان رەسبۋليكاسىنىڭ مادەني مۇراسىن زاڭدى تۇردە ءبىر جەرگە جيناقتايتىن جانە تۇراقتى تۇردە ناسيحاتتايتىن اعارتۋشىلىق باعىتتاعى قازاق، ورىس جانە اعىلشىن تىلىندەگى ەڭ ءىرى مادەني پلاتفورما بولماق. سونداي-اق، قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنداعى بارلىق تارماقتارى بويىنشا جۇزەگە اسىپ جاتقان مادەني ءىس-شارالاردى كورسەتەتىن، ەنتسيكلوپەديالىق تۇردە قىزمەت اتقاراتىن مادەني الەمگە اينالادى دەپ كۇتىلۋدە.

پورتالدا مەملەكەت باسشىنىڭ باعدارلامالىق ماقالاسىنداعى قازاقستاندىق رۋحاني قۇندىلىقتىڭ جاندانۋىنا باعىتتالعان «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «زاماناۋي قازاقستان مادەنيەتى»، «100 جەتەكشى وقۋلىق اۋدارماسى»، «100 جاڭا تۇلعا»، «لاتىن الىپبيىنە كوشۋ» سەكىلدى نەگىزگى ارنالارعا «رۋحاني جاڭعىرۋ» ءبولىمى ارقىلى جەكە-جەكە ايدارلار اشىلعان. پورتالدىڭ تاعى ءبىر ەرەكشەلىگى ءار اۆتورعا (اقىن، جازۋشى، ايتىسكەر، كۇيشى، اكتەر، سۋرەتشى، ءانشى، ءبيشى، ءمۇسىنشى، ارحيتەكتور، جۋرناليست، فوتوگارف، عالىم، جىراۋ، كومپوزيتور، پۋبليتسيست، ساتيريك، اۋدارماشى، سىنشى، دراماتۋرگ، رەجيسسەر، مۋزىكانت ت.ب.) ارنايى پاراقشالار اشىلعان جانە ولاردىڭ شىعارماشىلىعىنا قاتىستى بارلىق دەرەكتەر توپتاستىرىلعان. ءار اۆتورعا ءوز شىعارماشىلىعىن ۇدايى دامىتۋ ماقساتىندا مادەني بلوگ جۇرگىزۋ مۇمكىندىگى دە قاراستىرىلعان. قازىرگى ۋاقىتتا ءۇش تىلدە 5324 اۆتوردىڭ جەكە پاراقشاسى جانە ولارعا قاتىستى اقپاراتتىق ماتەريالدار، ەلەكتوروندى كىتاپتار، اۋديوكىتاپتار، اندەر، كۇيلەر، ۆيدەولار جانە سيرەك فوتوسۋرەتتەر جيناقتالعان. «مادەنيەت پورتالى» – تەك مادەني رەسۋرستاردىڭ قازانى عانا ەمەس، ەلىمىزدەگى بارلىق تەاتر، مۋزەي، كىتاپحانالاردىڭ باسىن ءبىر جەرگە قوسقان بىرەگەي كوممۋنيكاتسيالىق مادەني الاڭ.

«مادەنيەت پورتالى» – «وناين-كونكۋرس» ءبولىمىن قولعا الىپ، ەلىمىزدەگى بارلىق ادەبي، مادەني كونكۋرستاردى اشىق، ءادىل وتۋىنە مۇرىندىق بولۋدى ماقسات ەتىپ وتىر. بۇل ءبولىم ارقىلى جاس تالانتتارعا ۇلكەن قولداۋ بىلدىرەدى. بۇدان باسقا دا پورتالدا ۇلتتىق قۇندىلىعىمىز - ايتىس ونەرىنە ارنايى ءبولىم اشىلدى. بۇل ءبولىم ارقىلى پورتال قىزمەتكەرلەرى ەلىمىزدەگى وتەتىن بارلىق ايتىستاردى ونلاين تۇردە كورسەتەدى جانە ولارعا تالداۋ ماقالا جازىپ، جۇيەلى تۇردە ۇسىنىپ وتىرادى.

پورتالدىڭ تاعى ءبىر ەرەكشە ءبولىمى - «كينو». مادەنيەتتىڭ ۇلكەن ءبىر سالاسى - وتاندىق كينو يندۋسترياسىنىڭ دامۋىنا سوڭعى كەزدەرى باسا نازار اۋدارىلىپ وتىر. پورتال وتاندىق ءار جاڭا كينوعا رەتسەنزيا جازىپ، ءادىل سىن-ماقالالار ۇسىنادى.

«مادەنيەت پورتالى» – ءوز ۇلتىن سۇيەتىن، ادەبيەتىن ارداقتايتىن، مادەنيەتىن قۇرمەتتەيتىن جاستاردىڭ مۇددەسىن كوزدەيتىن پلاتفورما رەتىندە تانىلادى. قر پرەزيدەنتى ن. ءا. نازارباەۆ: «مادەنيەت – ۇلتتىڭ بەت-بەينەسى، رۋحاني بولمىسى، جانى، اقىل-ويى، پاراساتى. وركەنيەتتى ۇلت، ەڭ الدىمەن، تاريحىمەن، مادەنيەتىمەن، ۇلتىن ۇلىقتاعان ۇلى تۇلعالارىمەن، الەمدىك مادەنيەتتىڭ التىن قورىنا قوسقان ۇلكەندى-كىشىلى ۇلەسىمەن ماقتانادى. ءسويتىپ، تەك ءوزىنىڭ ۇلتتىق ءتول مادەنيەتى ارقىلى عانا باسقاعا تانىلادى»، - دەگەن بولاتىن.

Abai.kz