مامىر ايىنداعى قازاقستان قارۋلى كۇشتەرىنىڭ جاۋىنگەرلىك شەرۋى استانادا ەمەس، جامبىل وبلىسىنداعى «وتار» 40-اسكەري بازاسىنىڭ اۋماعىندا وتەدى. قازىر وسى جەردە قر قارۋلى كۇشتەرىنىڭ قۇرامالارى مەن اسكەري بولىمدەرىنىڭ جاۋىنگەرلىك تەحنيكاسى جانە جەكە قۇرام الداعى جاۋاپتى شاراعا دايىندالۋدا.

جاۋىنگەرلىك پارادتى دايىنداۋ بويىنشا ارناۋلى قۇرىلعان جەدەل توپتىڭ قۇرامىنا قازاقستاننىڭ قورعانىس مينيسترلىگى مەن قارۋلى كۇشتەرىنىڭ ءارتۇرلى قۇرىلىمدىق بولىمشەلەرىنىڭ وكىلدەرى كىرگەن. جاۋىنگەرلىك پارادقا دايىندىق جونىندەگى بارلىق ماسەلەلەردى ۇيلەستىرۋ مىندەتى وسى جەدەل توپقا جۇكتەلگەن.قازىرگى ۋاقىتتا اسكەري بازا اۋماعىندا جاۋىنگەرلىك پارادقا قاتىساتىن جاۋىنگەرلىك تەحنيكالار مەن بولىمشەلەردىڭ جەكە قۇرامى شوعىرلانىپ، بىرلەسكەن دايىندىقتار ءجۇرىپ جاتىر.

جاۋىنگەرلىك پارادقا بارلىعى 3 مىڭعا جۋىق اسكەري قىزمەتشى، 300-دەن اسا بىرلىك قارۋ-جاراق پەن اسكەري تەحنيكا جانە شامامەن 3 بىرلىك ۇشۋ اپپاراتى قاتىساتىن بولادى.

«وتار»-40 اسكەري بازاسىنا تەمىرجولمەن ەكى ەشەلون  تانكى جانە موتواتقىشتار بولىمشەلەرى جەتكىزىلدى. اقتاۋدان تەڭىز جاياۋ اسكەرىنىڭ باتالونى مەن «باتىس» وڭىرلىك قولباسشىلىعىنىڭ بارلاۋ بولىمشەسى كەلدى.

ونىڭ الدىندا وتارعا اۆياتسيالىق ماتەريالدىق-تەحنيكالىق قامتاماسىز ەتۋ بولىمدەرى بارلىق قاجەت قۇرال - جابدىقتارىمەن جەتكەن بولاتىن.

جاۋىنگەرلىك پارادقا الاڭسىز، تىڭعىلىقتى دايىندالۋ ءۇشىن اسكەري اۆياتسيا ۇشقىشتارىنا ارنالىپ جەكە لاگەر تىگىلگەن.

پارادتىق ەسەپتوپتاردىڭ  كۇندەلىكتى تىنىس-تىرشىلىگىن قامتاماسىز ەتۋ ءۇشىن جاۋىنگەرلەرگە بارلىق قاجەتتى جاعداي جاسالعان دالالىق لاگەر قۇرىلعان.

اسكەري بولىمشەلەر  قۇرلىق اسكەرلەرى مەن اۋە قورعانىسى كۇشتەرى «ماتىبۇلاق» پوليگونىندا وتەتىن پاراد كەزىندە بۇگىنگى كۇندە جاراقتانعان زاماناۋي قارۋلار مەن تەحنيكالاردى ءىس جۇزىندە قولدانىپ، تەحنيكالىق شەبەرلىكتەرىن كورسەتەدى.

دايىندىقتىڭ باستاپقى كەزەڭىندە پارادتىق قوراپتاردىڭ ساپ تۇزەۋ ءتارتىبى ناقتىلانىپ، پارادقا قاتىسۋشىلارمەن سالەمدەسۋ ءتارتىبى، تۋدى شىعارۋ ەلەمەنتتەرى، سونداي-اق، جەكە قۇرامنىڭ سالتاناتتى مارشپەن ءجۇرىپ ءوتۋى پىسىقتالعان بولاتىن.

قازىرگى كەزدە بارلىق اتىس قارۋلارى، تانكتەر مەن اۋە كۇشتەرىنىڭ جاۋىنگەرلىك ۇشاقتارى نەگىزگى دايىندىقتان ءوتتى.جاۋىنگەرلىك پارادقا جالپى دايىندىق شارالارى جالعاسۋدا.

كريستينا نوۆيكوۆا

مايور

الماتى قالاسىنىڭ قورعانىس ىستەرى جونىندەگى

دەپارتامەنتىنىڭ ءباسپاسوز حاتشىسى

Abai.kz