2017 جىلى قىركۇيەك ايىندا اناسى قاتتى اۋىرىپ جاتىر دەگەن حاباردى ەستىپ، قىتايعا كەتىپ، ەلگە كەلە الماي قالعان قانداسىمىز ءۇيسىن باباندى قر ۇلتتىق قاۋىپسىزدىك كوميتەتىنە قاراستى شەكارا قىزمەتى كەرى قايتارىپ جىبەرگەن. جۋىردا عانا ازاماتتىعى شىعىپ، قۇجاتىن ءالى الىپ ۇلگەرمەگەن ءۇيسىن باباننىڭ ەندىگى تاعدىرى نە بولماق؟ وسى ساۋالعا جاۋاپ الماق بولىپ، بەلگىلى جۋرناليست ساۋلە ابدىلداحانقىزى قر ۇلتتىق قاۋىپسىزدىك كوميتەتىنىنە قاراستى شەكارا قىزمەتىنىڭ باستىعى – گەنەرال-مايور د.ا.ديلمانوۆقا جۋرناليستىك ساۋال جولدادى. ءبىز ماسەلەنىڭ تەزىرەك شەشىلۋىنە اتسالىسۋ ءۇشىن جۋرناليستىك ساۋالدى قوعام تالقىسىنا سالۋدى ءجون سانادىق.

Abai.kz اقپاراتتىق پورتالى

قر ۇلتتىق قاۋىپسىزدىك كوميتەتى
شەكارا قىزمەتىنىڭ باستىعى –
گەنەرال-مايور
د.ا.ديلمانوۆقا

قر جۋرناليستەر وداعىنىڭ مۇشەسى –
«التىن جۇلدىز» سىيلىعىنىڭ لاۋرەاتى
«akjunis.kz» سايتىنىڭ باس رەداكتورى
س.ا.ابەدينوۆادان

جۋرناليستىك ساۋال

قر باق تۋرالى زاڭىنىڭ 2-بابىنا سايكەس:

1. ءسوز بوستاندىعى، شىعارماشىلىق، ءوز كوزقاراستارى مەن سەنiمدەرiن باسپا بەتتەرiندە نەمەسە باسقالاي تۇردە بiلدiرۋگە، بۇقارالىق اقپاراتتى كەز كەلگەن، زاڭمەن تىيىم سالىنباعان جولمەن الۋعا جانە تاراتۋعا قازاقستان رەسپۋبليكاسىنىڭ كونستيتۋتسياسى كەپiلدiك بەرەدi.

تسەنزۋراعا تىيىم سالىنادى.

3. مەملەكەتتiك ورگاندار، قوعامدىق بiرلەستiكتەر، لاۋازىمدى تۇلعالار جانە بۇقارالىق اقپارات قۇرالدارى ءاربiر ازاماتقا ونىڭ قۇقىقتارى مەن مۇددەلەرiنە قاتىستى قۇجاتتارمەن، شەشiمدەرمەن جانە اقپارات كوزدەرiمەن تانىسۋىنا مۇمكiندiك بەرۋدi قامتاماسىز ەتۋگە مiندەتتi.
اتالعان زاڭنىڭ نەگىزىندە سىزگە تومەندەگى جايدى حابارلاي وتىرىپ، ورىن العان جاعداي تۋرالى مالىمەت بەرۋىڭىزدى سۇرايمىن:

بىزگە جەتكەن اقپارات بويىنشا كەشە، 20 ماۋسىم 2018 جىلى، «قورعاس» شەكارا بەكەتىندە قحر-نان قازاقستانعا وتكەن قازاقستان ازاماتى ءۇيسىن باباندى (15 اقپان 1978 ج.ت.) شەكارا كۇزەتشىلەرى قازاقستانعا كىرگىزبەي، كەرى قىتايعا قايتارىپ جىبەرگەن.

وعان دەيىن ءبىز رەداكتسيا تاراپىنان ءۇيسىن بابان تۋرالى بارلىق اقپاراتتى شەكارا قىزمەتىنىڭ ءباسپاسوز قىزمەتىنىڭ جەتەكشىسى تۋراپوۆ قۋانىشقا ۇيالى بايلانىس ارقىلى جەتكىزىپ، قۇجات كوشىرمەسىن، ول تۋرالى ۆيدەوماتەريالداردى ۆاتساپ ارقىلى جولدادىق. ءۇيسىن باباندى، ءبىز قۇجاتتارىن جەتكىزىپ بەرگەنشە قىتايعا كەرى قايتارماي، 1 تاۋلىك ۇستاي تۇرۋىن سان مارتە وتىنگەن ەدىك. الايدا، شەكارا كۇزەتشىلەرى ءۇيسىن باباندى قىتايعا كەرى قايتارىپ جىبەرگەن.

ءۇيسىن بابان تۋرالى سىزگە تومەندەگى اقپاراتتى جەتكىزەمىز:

ءۇيسىن بابان 1978 جىلى 15 اقپاندا قحر تۋعان.

وتباسى، ءۇش بالاسى بار. ولار ءبارى دە – قازاقستان ازاماتتارى.

قازاقستانعا 2012 جىلى قونىس اۋدارىپ، سودان بەرى قىتايعا ءبىر رەت تە بارماعان. قازاقستاندا ىقتيارحاتپەن جۇرگەن. بىلتىر ازاماتتىق الۋ تۋرالى ءوتىنىش تاپسىرعان. 2017 جىلى قىركۇيەك ايىندا اناسى قاتتى اۋىرىپ جاتىر دەگەن حاباردى ەستىپ، قىتايعا بارعان. سودان قىتاي وكىمەتى ءۇيسىن باباننىڭ قىتايلىق پاسپورتىن تارتىپ الىپ، كەرى قايتارماي قويعان. سول سەبەپتى ول قازاقستانعا 9 اي بويى كەرى قايتا الماعان.

الايدا بۇل ۋاقىتتا الماتى وبلىستىق ءىىد كققب باستىعى ە.نۋرسەيتوۆتىڭ ءۇيسىن بابانعا قر ازاماتتىعىن الۋ تۋرالى №2642 انىقتاما 27 قىركۇيەك 2017 جىلى شىققان. ازاماتتىق العانشا، پاسپورت كەلگەنشە شەتەل ازاماتى ىقتيارحاتپەن جۇرەتىنى بەلگىلى. ونىڭ ىقتيارحاتى بار. ال ازاماتتىق الۋ تۋرالى شەشىم كەلىپ، پاسپورتى دايىن بولعاندا ول قىتايدا بولعان، 9 اي بويى كەرى قايتا الماعانىن ايتتىق. قازاقستان اۋماعىنان تىس جەردە بولعاندىقتان ونىڭ دايىن پاسپورتىن بارىپ الۋى فيزيكالىق تۇرعىدا مۇمكىن ەمەس ەدى. قىتاي پاسپورتىنىڭ مەرزىمى ءوتىپ كەتكەندىكتەن جەرگىلىكتى وكىمەت ءۇيسىن باباننىڭ پاسپورتىن قايتارماعان.

تاياۋدا قازاقستانداعى وتباسى ءۇيسىن بابانعا شاقىرتۋ (ۆيزا) جىبەرىپ، سول شاقىرتۋدىڭ نەگىزىندە قىتاي وكىمەتى ونى كەشە كەرى قايتارعان. الايدا ءۇيسىن باباندى ءبىزدىڭ كۇزەت قىزمەتكەرلەرى قىتايعا كەرى قايتارعان. ول قازاقستان ازاماتى. قازاقستانعا، ۇزاق مەرزىم كورمەگەن وتباسىنا ورالۋعا تولىق قۇقىعى بار ەمەس پە؟

سىزگە وسى ماسەلەگە قاتىستى جۋرناليستىك ساۋال جولدايمىن: قانداي سەبەپكە بايلانىستى، قانداي زاڭنىڭ قانداي بابىنا سايكەس قازاقستان ازاماتى ءۇيسىن بابان 9 اي دەگەندە ارەڭ قازاقستانعا وتكەندە، شەكارا قىزمەتى نە سەبەپتەن ايەلى قۇجاتىن جەتكىزگەنشە، ونى كەرى قۋىپ جىبەرگەن؟ ەندىگى جەردە ءۇيسىن باباندى كەرى قايتارۋدىڭ جولدارى قانداي بولماق؟ ول تۋرالى اقپاراتتى كۇزەت قىزمەتكەرلەرى بازادان انىقتاۋىنا بولماس پا ەدى؟ ونىڭ پاسپورتى بارىن، ول پاسپورت ءتيىستى قۇزىرلى مەكەمەدە جاتقانىن، سول پاسپورتقا ءوزى جەتە الماي جۇرگەنىن انىقتاۋ شەكارا قىزمەتىنە سونشالىقتى قيىن با؟

ساۋلە ابەدينوۆا

Abai.kz