قر باس پروكۋرورى ق.قوجامجاروۆقا
قر ىشكى ىستەر ءمينيسترى ق.قاسىموۆقا

اشىق تالاپ حات!

قازاقستاننىڭ حالىقارالىق دارەجەدەگى سپورت شەبەرى، مانەرلەپ سىرعاناۋدان سوچي وليمپياداسىنىڭ قولا جۇلدەگەرى دەنيس تەننىڭ قىلمىسكەرلەر قولىنان بولعان قايعىلى قازاسى بارشا قازاقستاندىقتاردىڭ قابىرعاسىن قايىستىردى. جانتۇرشىگەلىك وقيعانى جاساعان قانىشەر قىلمىسكەرلەر زاڭ الدىندا قاتاڭ جازاسىن الۋى ءتيىس. ءبىز مارقۇم دەنيس تەننىڭ اتا-اناسىنا، تۋما-تۋىسقاندارى مەن ارىپتەس-دوستارىنا كوڭىل بىلدىرەمىز.

قىلمىستىڭ اتى – قىلمىس. قىلمىستى ۇلتقا، جىككە، تىلگە، دىنگە ەشقاشان بولۋگە بولمايدى. دەسەك تە، دەنيس تەن قايتىس بولعاننان كەيىن الەۋمەتتىك جەلىدە (فەيسبۋكتە) اق ەركە ەسىمدى فەيسبۋك قولدانۋشى ءوزىنىڭ اككاۋنتىندا ۇلتارازدىقتى ءورشىتۋ ماقساتىندا «دەنيس تەندى ۇرلىقشى، جابايى، توپاس قازاقتار ءولتىردى. قازاقتار ادام بولمايدى. قايىرشى قازاقتار» دەپ اشىق جازىپ، ءدۇيىم جۇرتتىڭ الدىندا مەملەكەتتى قۇراۋشى – قازاق حالقىنىڭ ار-نامىسىنا ۇلكەن نۇقسان كەلتىرىپ، ۇلتتىق سەزىمىزدى قورلاۋدا.

اق ەركەنىڭ وسى ۇلتارالىق ارازدىق تۋعىزاتىن ءسوزىن ايگەرىم جۇمانوۆا ەسىمدى فەيسبۋك قولدانۋشى «دۇرىس جازعان» دەپ قولداپ وتىرسا، راميليام ءادىلجان ەسىمدى ازاماتشا  «جاعا ۇستاتتى» توبىندا وسى جازبانى كەڭىنەن تاراتىپ وتىر. «جاعا ۇستاتتى» توبىندا ءتورت ءجۇز مىڭعا جۋىق (400 000) جازىلۋشىلار تىركەلگەن. جوعارىدا اتى-جوندەرى اتالعاندار "ۇلتارازدىقتى قوزدىرعان، قازاقتاردى كەمسىتكەن جازبالاردى وشىرىڭدەر" دەگەن جازۋلارعا ەشقانداي كوڭىل بولمەۋدە، كەرىسىنشە، قازاق حالقىنىڭ ار-نامىسىنا نۇقسان كەلەتىن نەشە ءتۇرلى سوزدەر جازىپ، ودان ءارى ءورشىتىپ وتىر.

سول سەبەپتى، بۇل ادامداردىڭ ارەكەتتەرىن قازاقتاردى كەمسىتۋ، قازاق ۇلتىنا مەنسىنبەۋشىلىكپەن قاراۋ جانە قازاقتاردى وزگە ۇلتتان تومەن ساناۋ جانە ۇلتتىق سەزىمىمىزگە ءتيىسۋ ارقىلى ەلىمىزدە ۇلتارازدىقتى قاساقانا ناسيحاتتاۋ دەپ باعالايمىز. قازاق حالقىن كەمسىتىپ، ۇلتتىق قادىر-قاسيەتىمىزدى قورلاعان الەۋمەتتىك جەلىدە كەڭ تارالعان بۇل جازبالار بويىندا قازاق قانى بار، «مەن قازاقپىن» دەگەن الەمدەگى 18 ميلليونعا جۋىق بارشا قازاقتاردىڭ ار-نامىسىنا ءتيىپ، ۇلتتىق سەزىمىن قورلاۋدا.

تالاپ ەتەمىز!

قازاقستان رەسپۋبليكاسىنىڭ كونستيتۋتسياسى مەن ەلىمىزدىڭ قولدانىستاعى زاڭناماسىندا الەۋمەتتىك، ۇلتتىق، ناسىلدىك نەمەسە ءدىني ارازدىقتى قوزدىرۋ قىلمىستىق جازالاناتىن ءىس-ارەكەت بولىپ تابىلادى.

1. قر اۋماعىنداعى زاڭدى قاداعالاۋ جانە قوعامدىق ءتارتىپ پەن قاۋىپسىزدىكتى ساقتاۋ ورگانىنىڭ ەڭ جوعارى باسشىلارىنان سىزدەردەن قازاق حالقىن كەمسىتىپ، ۇلتتىق قادىر-قاسيەتىمىزدى ءتۇسىرۋ ارقىلى ۇلتارازدىقتى ءورشىتىپ وتىرعان ادامداردى تەز ارادا ىزدەستىرىپ تاۋىپ، ولاردى زاڭ الدىندا جاۋاپكەرشىلىككە تارتۋلارىڭىزدى جانە قازاق حالقى الدىندا الەۋمەتتىك جەلىلەر ارقىلى كەشىرىم سۇراۋلارىن تالاپ ەتەمىز!

2.  ۇلتارازدىقتى ورشىتكەن جازبانى جاريالاعان جانە ۇنەمى ادەپسىز، ۇياتسىز سوزدەردى ناسيحاتتاپ جۇرگەن "جاعا ۇستاتتى" توبىن جاپتىرۋدى سۇرايمىز!

تالعات قاتاۋوۆ

Abai.kz