وتكەن جۇما كۇنى الماتى قالاسىنداعى گوركي اتىنداعى ساياباقتا "Top Security KZ" كومانداسى جەكە پاترۋلدىك  قىزمەتتى ىسكە قوسقانىن حابارلادى.  ولار ەلىمىزدەگى كۇزەت جۇمىسىن وزگەرتىپ، ازاماتتاردىڭ قاۋىپسىزدىگى ءۇشىن ماڭىزدى رەفورمالاردى جۇزەگە اسىرماقشى ەكەن. بۇل تۋرالى ءالمۇرات مۇراتوۆ اتتى ازامات حابارلاعان. 

كىلەڭ زىڭگىتتەي، ساقالدى جىگىتتەردەن قۇرالعان بۇل  نە توپ؟ قازاقستان ازاماتتارى راسىمەن دە وسىلاردىڭ قىزمەتىن قاجەت ەتەتىندەي قاۋىپتى جاعدايدا تۇر ما؟

ەرلان سايروۆ، ساياساتتانۋشى:

- بۇل - كونستيتۋتسياعا، زاڭعا قايشى ارەكەت. مەملەكەت ازاماتتاردىڭ قاۋىپسىزدىك مونوپولياسىن قامتاماسسىز  ەتە الماي وتىر. بۇل - وتە قاۋىپتى تەندەنتسيا.  

قۇقىقتىق تارتىپپەن تەك مەملەكەت قانا اينالىسۋى كەرەك. سوندىقتان دا، قاراپايىم عانا قاۋىپسىزدىكتى قامتاماسسىز ەتۋدى مەملەكەتتەن تالاپ ەتەمىز. باس پروكۋراتۋرا، ۇلتتىق قاۋىپسىزدىك كوميتەتى دەرەۋ ارادا زەرتتەۋ جۇرگىزىپ، الماتىدا زاڭدىلىقتىڭ ساقتالۋىن قالپىنا كەلتىرسىن. مىنا قارقىنمەن كەتە بەرەر بولساق، از ۋاقىتتا زاڭسىز اسكەري قۇرىلىمدارعا يە بولا الماي قالامىز. 

قازىرگە ەلگە بەلگىسىز جەكە پاترۋلدىك  قىزمەت كومپانيالاردى كۇزەتىپ، وزىندىك رەفورما جاساۋدى كوزدەپ وتىر. ولار زاماناۋي تەحنيكامەن قامتىلعانىن، جەتكىلىكتى دەڭگەيدە قارۋلانعانىن، ماماندارى ارنايى دايىندىقتان وتكەنىن مالىمدەپ وتىر. ارنايى قوڭىراۋ شالعان كليەنتتەرگە عانا ەمەس، كوشەدەگى تارتىپكە دە قارايمىز دەيدى.

قازىر بۇل قىزمەت ءتۇرى الماتىداعى مەدەۋ اۋدانىنا عانا جىبەرىلگەن. الداعى ۋاقىتتا بۇكىل قالانى وسى جەكە پاترۋلدىك  قىزمەتپەن "جارىلقاماق"!

بۇل “جەكە پاترۋلدەر” قايدان اكەلىندى؟ ءبىزدىڭ ۇلتتىق قاۋىپسىزدىك كوميتەتى قايدا قاراپ وتىر؟ بۇل قاسىموۆ باسقاراتىن ءىىم-ءنىڭ قوجىراپ بىتكەنىنىڭ بەلگىسى ەمەس پە؟ ەندىگى قالعانى قازاقستان ازاماتتارىنىڭ قاۋىپسىزدىگىن كىم ەكەنى بەلگىسىز توپتارعا تاپسىرىپ قويۋ ما؟

ءشارىپحان قايسار

Abai.kz