بەيسەنبى, 28 ناۋرىز 2024
تۋعان جەرگە تۋىڭ تىك! 5594 6 پىكىر 13 تامىز, 2018 ساعات 09:08

سايراگۇل ەلگە العىس ايتتى

رەداكتسيادان: جۋىردا رەداكتسيامىزدىڭ ەلەكتروندى پوشتاسىنا قازاقستانداعى پانا ىزدەۋشى تۇلعا ستاتۋسىن العان ەتنيكالىق قازاق كەلىنشەگى سايراگۇل ساۋىتبايدىڭ ءۇشبۋ حاتى كەلىپ ءتۇستى.

سايراگۇل – ەتنيكالىق قازاق. قىتايداعى ساياسي سۇرگىننەن وتاباسى، بالا-شاعاسىنا قوسىلۋ ماقساتىندا قازاقستانعا قاشىپ كەلگەن.

كەيىن قر ۇقك شەكارا قىزمەتى وكىلدەرى تاراپىنان تۇتقىندالىپ، ۇستىنەن قر قىلمىستىق كودەكسىنىڭ 392 بابى، 1-تارماعى بويىنشا ءىس قوزعالعان. الماتى وبلىسىنا قاراستى پانفيلوۆ اۋداندىق سوتىندا ءىسى قارالىپ، اتالعان ايىپ بويىنشا شارتتى تۇردە 6 اي مەرزىمىنە بوستاندىعىنان ايىرىلعان ەدى.

سايراگۇل ساۋىتبايدىڭ ماسەلەسىن ەڭ ءبىرىنشى بولىپ «Abai.kz» اقپاراتتىق پورتالى وقىرمان نازارىنا ۇسىندى. ءدال وسى ماسەلە بويىنشا «Abai.kz» اقپاراتتىق پورتالى 20-دان استام ماقالا جازدى. كەيىن بۇل رەسپۋبليكالىق ماسشتابتا عانا ەمەس، حالىقارالىق ۇيىمداردىڭ ارالاسۋىنا سەبەپشى بولدى. ناتيجەسىندە سايراگۇل ساۋىتباي قازاقستاندا قالدىرىلدى. قوعامدا رەزونانس تۋدىرعان بۇل ماسەلە جالپى حالىقتىق قولداۋعا يە بولىپ، وڭ شەشىمىن تاپتى. بۇگىن رەداكتسيامىزعا سايراگۇل ساۋىتباي حابارلاسىپ، ءۇشبۋ حاتىن جولدادى. ءوزىن قولداعان ەلى مەن ەلباسىنا اقجارما العىسىن ايتتى. ءبىز سايراگۇلدىڭ وسى ءبىر حاتىن وقىرمان نازارىنا ۇسىنۋدى ءجون كوردىك.

قادىرلى الاش جۇرتىم، ىرگەلى ەلىم! 

«اللانىڭ ءبىر اتى – حالىق، حالىقتىڭ ءبىر اتى – قۇداي» دەگەن. قازاق ەلىندەگى 18 ملن. ەل-جۇرتقا سايراگۇل ساۋىتبايدان جالىندى سالەم!

قۇرمەتتى ەلباسى، نۇرسۇلتان اعا! مىنا ماعان، بالاپاندارىمدى باۋىرىما باسىپ، وتباسىممەن قاۋىشۋدا زور باقىت سىيلاعان قولداۋىڭىزعا شەكسىز ريزامىن. مەن سەكىلدى ءبىر انانىڭ تاعدىرىنا اراشا ءتۇسىپ، مەن اڭساعان قازاق ەلىندە الىپ قالعانىڭىز ءۇشىن، سىزگە باسىمدى ءيدىم.

كوكتە – اللا، جەردە – سىزدەر بولىپ، مەن سەكىلدى بالاپاندارىن اڭساپ ارەڭ جەتكەن ءبىر انانىڭ تاعدىرىنا اراشا ءتۇسىپ، قاسىرەتىن بولىسكەن اق تىلەۋلى جۇرەكتەرىڭىز ماعان ەكىنشى رەت عۇمىر سىيلادى. سىزدەردىڭ قاراپايىم تابيعاتتارىڭىزدىڭ قالقاسىنا جاسىرىنعان، تىلمەن ايتىپ جەتكىزۋگە السىزدىك ەتەتىن شەكسىز ۇلىلىق – ول سىزدەردىڭ ماعان دەگەن اق تىلەكتەرىڭىز بەن رياسىز جۇرەكتەرىڭىزدەن شىققان ۇلىلىق. بۇل ۇلىلىق – شەكسىز داريا، بۇل ۇلىلىق – شاپاعاتقا تولى دۇعا-تىلەك، بۇل ۇلىلىق – قازاق ەلىنىڭ اقىن ۇل-قىزدارىنىڭ قالامىنىڭ كۇشى. بۇل ۇلىلىق – قازاق ەلىنىڭ قۇزىرەتتى ورگاندارىنداعى جاناشىرلارىمنىڭ ءبىر نيەت، ءبىر تىلەگى. ءارى 18 ملن. حالقىمنىڭ ءبىر نيەت، ءبىر ماقسات جولىنداعى ورتاق قۇلشىنىسى.

مەنىڭ ايانىشتى تاعدىرىم – سىرتقى ىستەر مينيسترلىگى كوشى-قون قىزمەتى سياقتى قۇزىرەتتى ورگانداردىڭ قىزمەت ءتۇيىنى. ەلىم دەپ ەڭىرەگەن ىزگى نيەتتى ەل اعالارىنىڭ ەرشىمدى ەرلىگى. اق ساقالدى اتالارىمىز بەن اق سامايلى انالارىمىزدىڭ اق تىلەۋلى دۇعاسىنا، قازاق ەلىنىڭ جۋرناليستەرىنەن باستاپ، حالىقارالىق جۋرناليستەردىڭ ەرەن ەڭبەگى، باق-تىڭ مۇڭعا تولى ماقالاسى مەن تالقىلايتىن تاقىرىبىنا، اقىن-جازۋشىلارىمىزدىڭ جان تەبىرەنتەرلىك پوەزياسىنا، انشىلەرىمىزدىڭ مۇڭعا تولى انىنە، ينتەرنەت جەلىسىندەگى ماعان اراشا سۇراعان قولداۋلار مەن مىڭداعان ادامداردىڭ جان تەبىرەنتەرلىك حاتتارىنا اينالىپ، اقىرى ۇلكەن جەڭىسپەن، قازاق ەلىندەگى ۇلان-اسىر تويعا ۇلاسقانىنا شەكسىز ريزامىن.

بۇل ورايدا مەنىڭ باسىما قيىندىق تۇسكەن العاشقى كۇننەن باستاپ وسى ءىستى ءوز موينىنا العان ادۆوكات ابزال قۇسپانعا، سوت زالىنان بوساتۋدى سۇراعان پروكۋرور ارزىگۇل يمياروۆاعا، ءادىل ۇكىم شىعارعان سۋديا حانىم دينارا قۇيقاباەۆاعا العىسىم شەكسىز.

العاشقى ساتتەن مەنىڭ تاعدىرىما الاڭداۋشىلىق بىلدىرگەن «Abai.kz» سايتىنا، سايتتىڭ جەتەكشىسى داۋرەن قۋاتقا، ۇجىمىنا، اتالعان ۇجىمعا بارىپ، مەنىڭ جاعدايىمدى ايتىپ جارعاق قۇلاعى جاستىق كورمەگەن قاينىم نۇربولات اسانعا، مەنىڭ ومىرىمە ەرەكشە اراشا تۇسكەن سەرىكجان ءبىلاشۇلى، قىدىرالى ورازۇلى، شاياحمەت قالي سىندى اعالارىمىز باستاعان «اتاجۇرت» ەرىكتىلەر ۇيىمىنا، ءار كۇن سايىن، ءار ساعات سايىن مەنىڭ حال-احۋالىمنان حالىقتى اقپاراتتاندىرىپ وتىرعان نۇرگەلدى ابدىعاني، ساۋلە ابىلداحانقىزى، دينا ىسقاقوۆا، قانات بىرلىكۇلى، ەرمۇرات باپي، باقىتگۇل ماكىمباي... ساندۋعاش سىندى مەنى قولداپ، دەم بەرگەن جۋرناليستەر قاۋىمىنا، سوناۋ گەرمانيادان مەنىڭ سوتىما ارنايى كەلىپ، رۋحاني قولداۋ بىلدىرگەن، حالىقارالىق دارەجەدە كومەكتەسكەن ءومىرحان التىن اعاعا، حالىقتىڭ قولداۋىن ەرىنبەي قاعازعا حاتتاپ، مىڭداپ ءتىزىم جاساپ، سوتقا تاپسىرعان ساراش قوڭىرباەۆا، رۋزا بەيسەنبايتەگى سياقتى جاناشىر اپايلارعا، اۋىت مۇقيبەك، رىسبەك سارسەنبايۇلى، ءامىرجان قوسان، مۇحتار تايجان، گەرويحان قىستاۋباەۆ، راسۋل جۇمالى، سەرىكجان مامبەتالين سىندى قوعام بەلسەندىلەرىنە، قۇل-كەرىم ەلەمەس اعا سىندى باسقا دا ەل اعالارىنا، قازىبەك يسا، جۇماتاي وسپانۇلى، داريعا مۇشتانوۆا سياقتى تالاي جىر جولدارىن ارناعان ارقالى اقىندارىمىزعا، مەرۋەرت تۇسىپباەۆا ءتارىزدى باتىل ءانشى قىزعا، ۋاقىتشا قاماۋ اباقتىسىندا ماعان بارىنشا جاعداي جاساپ، دەنساۋلىعىما ءجىتى نازار اۋدارعان جامبىل اعا، مەدبيكە دينارادان باستاپ، بارشا كۇزەت قىزمەتكەرلەرىنە، اق داستارحانىن جايىپ، الاقايلاپ قارسى العان «ءۇيسىن» كافەسىنىڭ يەسى ەرەجەپ باۋىرىما، «الاتاۋ» مەيرامحاناسىنىڭ يەسى سارقىت اعا، «تيمۋجين» مەيرامحاناسىنىڭ قوجايىنى ايبىن اعالارىما، قوستانايدان كەلگەن ابزال، ورالدان كەلگەن تالعات قاتاۋوۆقا، اقتاۋدان كەلگەن ەرجان، تاعى باسقا اتى اتالماي قالعان بارشا قولداۋشىلارىما – جولدان ارقان كەرىپ، شاشۋ شاشىپ قارسى العان شەلەك پەن بايدىبەك اۋىلىنىڭ تۇرعىندارىنا – مەنى توبەسىنە كوتەرگەن بۇكىل حالىققا مىڭ العىس! دەندەرىڭىزگە ساۋلىق، وتباسىلارىڭىزعا اماندىق تىلەيمىن! الاش جۇرتىنىڭ ىرگەسى سوگىلمەسىن! باسىمىز امان، باۋىرىمىز ءبۇتىن بولسىن!

سايراگۇل ساۋىتباي      

Abai.kz

6 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2256
عيبىرات

قايسار رۋحتى عازيز جان

مۇحتار قۇل-مۇحاممەد 3530