قاراعاندى وبلىستىق ۇلتتىق ساراپتاما ورتالىعىنىڭ ديرەكتورى مەن باس بۋحگالتەر مەكەمەگە تيەسىلى قۇرىلىس زاتتارىن ۇرلاپ، اقشاسىن جىمقىرعان. وسىنداي جانايقايمەن رەداكتسيامىزعا گۇلزيرا كارىمبەكوۆا ەسىمدى كەلىنشەك حابارلاستى. ونىڭ ايتۋىنشا، باسشىلىق گۇلزيرا جۇرگىزىپ وتىرعان تاۋار قۇجاتتارىن جوق قىلىپ جىبەرگەن. ءسويتىپ، بارلىق جوعالعان تاۋارلاردى كەلىنشەكتىڭ موينىنا ءىلىپ، ەكى قىلمىستىق، ءۇش ازاماتتىق ءىس قوزعاتقىزعان.

گۇلزيرا كارىمبەكوۆا، جابىرلەنۋشى:

- مەن قاراعاندى وبلىستىق ۇلتتىق ساراپتاما ورتالىعىندا قىزمەت ىستەپ جۇرگەندە باستىعىم، ينجەنەرىم، باس بۋحگالتەرلەر ساتىپ الۋعا ءتيىس تاۋارلاردى ساتىپ الماي، اقشاسىن وزدەرى  بولىپ الىپ ءجۇردى. مەن ونى ءوز كوزىممەن كوردىم.

وسىلايشا، مەكەمەگە تيەسىلى قۇرىلىس زاتتارى ساتىپ الىنعان جوق. كەيىننەن ەسەپ جاساعاندا قاراپ وتىرسام الگى تاۋارلاردىڭ ءبارى مەنىڭ موينىما جازىلىپتى. سۇراسام، "ونى قويمادان ءسىز عانا سىرتقا شىعارۋعا قۇقىلىسىز" دەيدى. مەن "ونى "ناكلادنويعا" قول قويىپ قابىلداپ العان جوقپىن" دەپ ەدىم، تىڭدامادى.

مەن ءوزىم ىستەمەگەن قىلمىستان باسىمدى اراشالاپ الۋدى ويلاستىرا باستاپ ەدىم، ولار مەنى جۇمىستان قۋدالاپ، كەتۋگە ماجبۇرلەي باستادى. ءسويتىپ جۇرگەندە جۇيكەم سىر بەرىپ اۋىرىپ، اۋرۋحاناعا ءتۇستىم.  اۋرۋحانادا جاتقانىمدا  "ەڭبەك كەلىسىمشارتتىڭ ۋاقىتى ءبىتتى" دەگەن جەلەۋمەن مەنىڭ سىرتىمنان بۇيرىق جازىپ، جۇمىستان شىعارىپ جىبەردى.

مەندە قازىر بارلىق قۇجاتتار مەن ەسەپ قاعازدارى بار. ءوزىمنىڭ كىناسىز  ەكەنىمدى دالەلدەي الامىن.

گۇلزيرا كوپ بالالى انا. كۇيەۋى دە سول مەكەمەدە ىستەگەن. بىراق، وسى ءىس باستالعان سوڭ، ونى دا جۇمىستان شىعارىپ جىبەرگەن. قازىر ەكەۋى دە جۇمىسسىز.

ولار وسى ماسەلەمەن ەڭبەك ينسپەكتسياسىنا بارعان. ولار كومەك بەرۋدىڭ ورنىنا، بۇل زاڭسىزدىقتارعا جاۋاپ تا بەرمەگەن.

گۇلزيرانىڭ ايتۋىنشا، وعان كۇندە بەلگىسىز بىرەۋلەر بوتەن نومىرلەرمەن حابارلاسىپ، قورقىتىپ، بوپسالايتىن كورىنەدى. ەش امالى قالماعان انانىڭ جۋرناليستەرگە ارقا سۇيەۋدەن باسقا امالى قالماعان.

ءتۇيىن

گۇلزيرا كارىمبەكوۆا "قاراعاندى وبلىستىق ۇلتتىق ساراپتاما ورتالىعىنىڭ ديرەكتورى  گۇلجاھان بايجاباگينوۆا ماعان جالا جاۋىپ، ءوزى تاپ-تازا بولىپ شىعا كەلمەك" دەگەن جانايقايىن ايتىپ، پرەمەر-مينيسترگە دە، ءىىم مينيسترلىگىنە دە حات جولداعان. ازىرگە ول جاقتان ءلام-ميم جاۋاپ جوق! ادىلدىككە جەتە الماي جۇرگەن انا  الداعى ۋاقىتتا قاراعاندى وبلىستىق ۇلتتىق ساراپتاما ورتالىعىنا قاتىستى بىلىققا تولى قۇجاتتاردى ءوزىن قورعاۋ ماقساتىندا جاريالاۋعا ءماجبۇر ەكەنىن ەسكەرتتى. 

نۇربيكە بەكسۇلتانقىزى

Abai.kz