بەيسەنبى, 7 شىلدە 2022
انە، كوردىڭ بە؟ 3903 1 پىكىر 16 تامىز, 2018 ساعات 12:35

قايرات-سيگما. دەلدالداردىڭ دەگەنى بولىپ تۇر

بۇگىن الماتىلىق «قايرات» فۋتبول كلۋبى ەۋروپا ليگاسىنىڭ ىرىكتەۋ كەزەڭى اياسىندا چەحيانىڭ «سيگما» فۋتبول كلۋبىن قابىلدايدى. سىرت الاڭدا 2:0 ەسەبىمەن جەڭىلىپ قايتقانىنا قاراماستان وتاندىق جانكۇيەرلەر «قايراتتىڭ» كەلەسى كەزەڭگە وتۋىنەن ءالى دە ءۇمىتتى.

حح عاسىرداعى «حالىق كومانداسى»، كسرو كەزىندە كورشىلەس رەسپۋبليكا كوماندالارىمەن تەرەزەسى تەڭ ونەر كورسەتىپ، ەل ەڭسەسىن كوتەرگەن «قايراتتىڭ» قازىر دە جانكۇيەرى از ەمەس. ەل چەمپيوناتىندا ەڭ كوپ جانكۇيەر جينايتىن كوماندالاردىڭ ءبىرى. ال ەۋروكۋبوكتاردا الماتىنىڭ «ورتالىق ستاديونىنا» اعىلاتىن كورەرمەندەر سانى ءتىپتى كوپ. قۇشاعىنا 24 مىڭ جانكۇيەردى سيعىزا الاتىن ورتالىق الاڭ بۇنداي كۇندەرى اۋزى-مۇرنىنان شىعا تولادى.

وكىنىشتىسى، قالانىڭ ماقتانىشىنا اينالعان «قايراتتىڭ» ماتچىن تاماشالاۋ جانكۇيەرلەرگە وڭايعا سوقپايدى. ستاديونعا كىرەتىن بيلەتتى ءوز باعاسىندا ساتىپ الۋ مۇمكىن ەمەس. الىپساتارلاردىڭ قولىنان ەكى-ءۇش ەسە قىمبات باعاعا الۋعا تۋرا كەلەدى. ءبىز بۇل جەردە پرەمەر ليگا ماتچتارىنىڭ بيلەتى جايلى ايتىپ وتىرعان جوقپىز. ول ويىندارعا بيلەت ونسىز دا كوپ. ءبىزدىڭ ايتپاعىمىز، ەۋروپا ليگاسى اياسىنداعى ماتچتار.

«قايرات» كومانداسىنىڭ باقىتىنا وراي الماتى جۇرتشىلىعى فۋتبولعا اۋەس. بيلەت قۇنى وزگە قالالاردان الدەقايدا قىمبات بولسا دا كورەرمەنگە كەندە بولىپ كورگەن جوق. ەل چەمپيوناتىنىڭ ماتچتارىنا ارنالعان بيلەت باعاسى ءبىر بولەك، ەۋروكۋبوكتىق ويىنداردا بيلەت قۇنى تىپتەن قىمباتتاپ كەتەدى. بۇعان دا وكپە ارتىپ، نارازىلىق بىلدىرگەن جانكۇيەر جوق، بەلگىلەنگەن باعاعا بيلەت ساتىپ الۋعا دايىن.

الايدا، حالىقتىڭ وسى ىستىق ىقىلاسىن ارام پيعىلىنىڭ ولجاسى ەتكەن الاياقتار قاشاندا ورايى كەلگەندە وپىرىپ قالۋعا دايىن تۇرادى. ەۋروپا ليگاسى اياسىنداعى ماتچتاردىڭ بيلەتىن كۇنى بۇرىن ساتىپ الىپ، ستاديون كاسساسىن بوس قالدىرادى. كاسسادان بيلەت تاپپاعان جانكۇيەر امالسىز دەلدالداردىڭ قولىنا قاراۋعا ءماجبۇر. ال ولار ويىنا كەلگەن باعانى ايتىپ، بيلەت قۇنىن شارىقتاتىپ جىبەرگەن.

ماسەلەن «ورتالىق ستاديوننىڭ» كاسساسىندا «قايرات» - «سيگما» كەزدەسۋىنىڭ بيلەت باعاسى 750 – 10 000 تەڭگە كولەمىندە ەكەنى كورسەتىلگەن. بىراق، بۇنداعى 750 تەڭگە قوس قاقپانىڭ ارتىنداعى ورىندارعا ارنالعان. ال ماتچ تاماشالاۋعا ىڭعايلى باتىس جانە شىعىس تريبۋنالاردان بۇل باعاعا بيلەت تابا المايسىز.

ماتچ باستالۋعا ەكى كۇن قالعاندا ستاديون كاسساسىندا تەك وسى سولتۇستىك جانە وڭتۇستىك تريبۋنالارداعى قۇنى 750 تەڭگەلىك بيلەتتەر عانا قالعان. ال وزگە ورىندارعا مۇلدە بيلەت جوق. كاسسا قىزمەتكەرلەرى بارلىق بيلەتتىڭ ساتىلىپ كەتكەنىن ايتادى. بىراق، بۇل بيلەتتەر جانكۇيەرلەردىڭ ەمەس دەلدالداردىڭ قولىندا ءجۇر.

«ورتالىق ستاديوننىڭ» كاسساسىنا جاقىنداساڭىز جانىڭىزعا ون نەشە جىگىت جينالا قالىپ، قولىنداعى بيلەتتەرىن ساتىپ الۋدى ۇسىنادى. كاسسادا بيلەت قالماعان. امالسىز الىپساتارلارمەن ساۋدالاسۋعا تۋرا كەلەدى. ولار ءسىزدىڭ قالتاڭىزعا نەمەسە فۋتبول كورۋگە دەگەن ىنتاڭىزعا قاراپ ءوز باعالارىن ايتادى. كاسساداعى باعادان كەمى ەكى-ءۇش ەسە قىمبات. ەگەر فۋتبول كورۋگە نيەتتى بولساڭىز ولار ايتقان باعاعا كەلىسەسىز.

ءبىزدىڭ ەلدە بارلىق جەردە وسىنداي. دەلدالداردىڭ دەسى باسقان زامان بولدى. حالىق پوەزد نە اۆتوبۋسقا وتىرىپ جول ءجۇرۋ ءۇشىن دە، ستاديونعا بارىپ فۋتبول كورۋ ءۇشىن دە، پاتەر جالعا الۋ ءۇشىن دە دەلدالدارىڭ قىزمەتىنە جۇگىنۋگە ءماجبۇر. بۇنىڭ مەملەكەت قازىناسىنا دا ەش پايداسى جوق، جەمقورلاردىڭ قالتاسىن قالىڭداتۋ عانا. اينالىپ كەلىپ قينالاتىن تاعى دا قاراپايىم حالىق.

قۋانىش قاپپاس

Abai.kz

1 پىكىر

ۇزدىك ماتەريالدار

اقمىلتىق

«قيالشىلدار كلۋبى»

ءامىرجان قوسان 2310
انىق-قانىعى

كىمنىڭ كىم ەكەنىن بىلە ءجۇرسىن دەپ...

اۋىت مۇقيبەك 1778