قالا كۇنىن مەرەكەلەۋ اياسىندا تامىزدان قىركۇيەككە دەيىنگى ارالىقتا 100 استام ءىس-شارا وتكىزۋ جوسپارلانىپ وتىر، سونىڭ ىشىندە 50-ءى مادەني-كوپشىلىك ءىس-شارا، - دەپ حابارلايدى اباي-اقپارات. وڭتۇستىك استاناعا شىعارماشىلىق ۇجىمدار مەن سۋرەتشىلەر فرانتسيادان، سلوۆەنيادان، جاپونيادان، يتاليادان، گەرمانيادان، رەسەيدەن، بەلارۋستان كەلەدى.

رەسپۋبليكا وڭىرلەرىنەن جانە شەتەل مەملەكەتتەرىنەن كەلگەن قوناقتارعا، سونىمەن قاتار قالا تۇرعىندارىنا كلاسسيكالىق، ۇلتتىق جانە زاماناۋي مۋزىكانى ورىندايتىن ارتيستەردىڭ باعدارلامالارى، تاعام مەن مونۋمەنتالدى-ساۋلەت ونەرىنىڭ  فەستيۆالدارى، كورمەلەر، پەرفومانستار، تەاترلاندىرىلعان كورىنىستەر، ساتيريكالىق شوۋلار ت.ب.  دايىندالدى.

سونىمەن قاتار باعدارلاما اياسىندا «كوك-توبە وپەرا - 2018» كلاسسيكالىق مۋزىكا فەستيۆالى،  «ARتBAT fest» زاماناۋي ونەردىڭ حالىقارالىق فەستيۆالى، «وركەسترلەر شەرۋى» اشىق اسپان استىنداعى وركەستر مۋزىكاسىنىڭ فەستيۆالى، «KITAP FEST» كىتاپ فەستيۆالى، «Family Festival» وتباسى كۇنى، «Almaty garden show» باۋ-باقشا حالىقارالىق فەستيۆالى، «GAKKU داۋىسى» قازاقستاندىق مۋزىكا فەستيۆالى،  «ALMA Fest» ءداستۇرلى قالالىق الما فەستيۆالى،  Muzzone Dance Party, «Mural» مونۋمەنتالدى-دەكوراتيۆتىك ونەردىڭ حالىقارالىق فەستيۆالى، موتو فريستايل «Red bull FMX JAMS»، «Almaty Film Festival»، «Junior Eurovision» جوباسى، الاتاۋ اۋدانىنىڭ 10-جىلدىعىن مەرەكەلەۋ،  «Almaty Fest Big City Picnic»، كىلەم بۇيىمدارىنىڭ جارمەڭكە-كورمەسى، «كامەراتا كازاحستانا» مەملەكەتتىك وركەسترىنىڭ كونتسەرتى ت.ب.ءىس-شارالار جوسپارلانىپ وتىر.

اي بويى كۇندەلىكتى قالانىڭ بەس نەگىزگى الاڭىندا ءتۇرلى باعدارلامالار ءوتىپ تۇرادى:  «استانا» الاڭىندا، «اباي» الاڭىندا جانە Almaty Arena الاڭىندا، قر تۇڭعىش پرەزيدەنتى پاركىندە، پانفيلوۆ پەن جىبەك جولى كوشەلەرىندە.

زاماناۋي مۋزىكانى ۇناتۋشىلار ءۇشىن تانىمال دي-دجەيلەردىڭ، حيپ-حوپ پەن رور-يندۋستريانىڭ، ەلەكتروندى مۋزىكا وكىلدەرىنىڭ قاتىسۋىمەن حالىقارالىق مۋزىكالىق جۇلدەلەر مەن فەستيۆالدار، سونىمەن قاتار وتاندىق ەسترادا جۇلدىزدارىنىڭ قاتىسۋىمەن كوپتەگەن ءىس-شارالار ۇيىمداستىرىلادى.

كلاسسيكالىق جانە حالىق مۋزىكاسىنا تابىنۋشىلارعا ارنايى الماتىدا قازاق مەملەكەتتىك اكادەميالىق اباي اتىنداعى وپەرا جانە بالەت تەاترىنىڭ سيمفونيالىق وركەسترىنىڭ ونەرى ۇسىنىلادى، تابىنۋشىلار يتالياندىق تەنور ۆينچەنتسو كونستانتسانىڭ داۋىسىن تىڭداي الادى. قازاق مەملەكەتتىك اكادەميالىق قۇرمانعازى ات. حالىق اسپاپتار وركەسترىنىڭ، اكادەميالىق ن.تلەنديەۆ ات. «وتىرار سازى» فولكلورلىق-ەتنوگرافيالىق وركەسترىنىڭ، «سازگەن سازى» اكادەميالىق فولكلورلىق-ەتنوگرافيالىق وركەسترىنىڭ، الماتى قالاسى اكىمىنىڭ ەسترادالىق-سيمفونيالىق وركەسترىنىڭ، قر مەملەكەتتىك ۇرمەلى اسپاپتار وركەسترىنىڭ ت.ب.  ورىنداۋىندا ءتۇرلى تۋىندىلاردى تىڭداپ، تاماشالاي الادى. ال ءازىل-سىقاقتى ۇناتۋشىلار «ودناجدى ۆ روسسي» ساتيريكالىق شوۋىنىڭ ارتىستەرىنىڭ ونەرىن كورىپ، راحاتتانادى.  ءىس-شارالاردىڭ تولىق ءتىزىمى الماتى قالاسى اكىمىنىڭ سايتىندا جاريالانادى.

Abai.kz