قازاقستان رەسپۋبليكاسىنىڭ مەملەكەتتىك حاتشىسى گۇلشارا ابدىقالىقوۆا بۇقار جىراۋ قالقامانۇلىنىڭ 350 جىلدىعىنا ارنالعان مەرەيتويلىق ءىس-شاراعا قاتىستى، دەپ حابارلايدى اباي-اقپارات اقوردانىڭ رەسمي سايتىنا سىلتەمە جاساپ.

مەرەيتويعا پارلامەنت دەپۋتاتتارى، مەملەكەتتىك ورگاندار جەتەكشىلەرى، قوعام قايراتكەرلەرى، بەلگىلى عالىمدار، شىعارماشىلىق زيالى قاۋىم جانە جۇرتشىلىق وكىلدەرى قاتىستى.
ءىس-شاراعا قاتىسۋشىلار بۇقار جىراۋ ەسكەرتكىشىنە گۇل شوعىن قويدى. ودان كەيىن «كۇمىس كومەي اۋليە» اتتى تەاترلاندىرىلعان قويىلىمدى تاماشالادى.

مەملەكەتتىك حاتشى قازاقستان پرەزيدەنتى نۇرسۇلتان نازارباەۆتىڭ سالتاناتتى ءىس-شاراعا قاتىسۋشىلارعا ارنالعان قۇتتىقتاۋ حاتىن وقىپ بەردى. «بۇقار جىراۋ – قيىن-قىستاۋ جىلداردا وتكىر جىرلارىمەن ەلدى ۇيىتىپ، اتا مەكەنىمىزدى جاۋدان قورعاۋعا شاقىرعان كورنەكتى تۇلعا. ءبىز – باقىتتى ۇرپاقپىز، ويتكەنى ۇلى بابامىز ارمانداعان ءبىرتۇتاس ۇلت جانە قۋاتتى مەملەكەت قۇردىق. سوندىقتان بۇقار جىراۋ مۇراسى ءاردايىم وزەكتى بولىپ قالا بەرەدى»، – دەلىنگەن قۇتتىقتاۋ حاتىندا.

بۇقار جىراۋ – حVIII عاسىرداعى اۋىز ادەبيەتى پوەزياسىنىڭ ۇلى وكىلى. ول تəۋكە حاننىڭ تۇسىنداعى ىقپالدى بيلەردىڭ ءبىرى، سونداي-اق ابىلاي حاننىڭ باس كەڭەسشىسى بولدى. تولە، قاز داۋىستى قازىبەك جəنە Əيتەكە بيلەرمەن بىرلەسىپ، جالپى قازاق قۇقىق زاڭدارىنىڭ جيىنتىعى «جەتى جارعىنى» ازىرلەۋگە قاتىستى.

جىراۋ اراب، پارسى، قىتاي تىلدەرىن جەتىك مەڭگەرگەن، ادىلەتتىكتىڭ جاقتاۋشىسى رەتىندە ىزگىلىك پەن اقيقاتتى تۋ قىلىپ ۇستادى، تابيعاتتىڭ تاڭعاجايىپ كورىنىسىن جىرلادى. جىراۋدىڭ باستى ۇستانىمى حالىقتىڭ بىرلىگى بولدى.

ءىس-شارا اياسىندا ەسترادا جۇلدىزدارىنىڭ، قاراعاندى وبلىسىنىڭ شىعارماشىل توپتارىنىڭ – تاتتىمبەت اتىنداعى اكادەميالىق قازاق حالىق اسپاپتارى وركەسترىنىڭ جانە ق.بايجانوۆ اتىنداعى كونتسەرتتىك بىرلەستىك ونەرپازدارىنىڭ قاتىسۋىمەن كونتسەرت ءوتتى.

سونداي-اق قازاقشا كۇرەس، اۋدارىسپاق، الامان بايگە، توپ بايگە، قىز قۋ، كوكپار جانە باسقا دا ۇلتتىق سپورت تۇرلەرىنەن جارىستار ءوتتى.

Abai.kz