پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا 2018 ج. سەگىز ايىنداعى ينفلياتسيا دەڭگەيى تۋرالى دەرەكتەر قارالدى.

ۇلتتىق ەكونوميكا ءمينيسترى تيمۋر سۇلەيمەنوۆتىڭ بايانداۋىنشا، جىل باسىنان بەرى ينفلياتسيا دەڭگەيى جاڭا ءدالىز 5-7% ارالىعىندا ساقتالىپ وتىر. تامىزدا ينفلياتسيا 0,2% قۇراسا، جىلدىڭ باسىنان بەرى — 2,9% قۇرادى. جىلدىق ينفلياتسيا 6% قۇرادى.

«اعىمداعى جىلدىڭ باسىنان بەرى 2017 جىلدىڭ سايكەس كەزەڭىمەن سالىستىرعاندا ينفلياتسيانىڭ بارلىق قۇرامداۋىشتارى بويىنشا باعا ءوسۋىنىڭ باسەڭدەگەنى بايقالىپ وتىر. ازىق-تۇلىك تاۋارلارىنا باعا ءوسۋى 2,3% قۇرادى. ازىق-تۇلىك ەمەس تاۋارلارعا – 3,6%. اقىلى قىزمەتتەرگە باعالار مەن تاريفتەر 3%»، — دەپ حابارلادى ۇلتتىق ەكونوميكا ءمينيسترى.

ونىڭ ايتۋىنشا، سوڭعى ءۇش ايدا ازىق-تۇلىك تاۋارلارىنا باعانىڭ تومەندەگەن بايقالىپ وتىر، بۇل ينفلياتسيا قۇرامداۋىشتارىنىڭ ىشىندە ەڭ تومەن مانگە اكەلدى.

سونىمەن قاتار، ازىق-تۇلىك ەمەس تاۋارلارعا باعانىڭ ەڭ كوپ وسكەنى تىركەلدى. بۇل رەتتە، ديزەل وتىنىنا، اياق كيىمگە، سۇيىتىلعان گازعا، ءدارى-دارمەككە جانە تۇرمىستىق بۇيىمدارعا باعانىڭ وسكەنى بايقالىپ وتىر. ت. سۇلەيمەنوۆتىڭ ايتۋىنشا، اقىلى قىزمەتتەردىڭ باعاسى ورتاشا قارقىنمەن ءوستى.

«اقىلى قىزمەتتەردىڭ ىشىندە باعانىڭ ەڭ كوپ وسكەنى اۋە جانە تەمىر جول كولىگى قىزمەتتەرىنە، قۇقىقتىق قىزمەتتەرگە تىركەلدى. سونداي-اق، اۆتوموبيلدەرگە تەحنيكالىق قىزمەت كورسەتۋگە جانە قوناق ءۇي قىزمەتتەرىنە باعا تومەندەدى»، — دەدى ول.

جىل باسىنان بەرى وڭىرلىك بولىنىستە جوعارى ينفلياتسيا دەڭگەيى، ورتاشا رەسپۋبليكالىق دەڭگەيدەن (2,9%) شاماممەن 1 پايىزدىق تارماققا اسىپ، اتىراۋ (3,8%), ماڭعىستاۋ (3,8%) وڭىرلەرىندە بايقالادى. ورتاشا رەسپۋبليكالىق دەڭگەيدەن از عانا سولتۇستىك قازاقستان (3,3%), قىزىلوردا وبلىستارى (3,2%), استانا ق. (3,2%) جانە پاۆلودار وبلىسى(3,1%) استى.

ۇلتتىق ەكونوميكا ءمينيسترىنىڭ ايتۋىنشا، تەڭگەنىڭ السارەۋى باعا مەن تاريفتەرگە قىسىم كورسەتەتىنىن اتاپ وتكەن ءجون. باعا مەن ۇلتتىق ۆاليۋتانىڭ اراسىنداعى جوعارى كوررەلياتسيانى ەسكەرە وتىرىپ، اعىمداعى تەڭگە باعامىندا ينفلياتسيا دەڭگەيى 1 پايىزدىق تارماققا ۇلعايۋى مۇمكىن.

«تەڭگەنىڭ ءبىرشاما السىرەۋىن جانە ينفلياتسيانىڭ ماۋسىمدىلىعىن ەسكەرە وتىرىپ، 2018 جىلدىڭ قورىتىندىلارى بويىنشا ينفلياتسيا دەڭگەيى باعالاۋ بويىنشا جاڭا ارالىقتىڭ جوعارعى دەڭگەيىنە جاقىن بولادى — شامامەن 6,6%–6,8%. IV توقساندا ينفلياتسيالىق پروتسەستەردىڭ كۇشەيەتىنىن نازارعا الا وتىرىپ، جەرگىلىكتى اتقارۋشى ورگاندار تۇراقتاندىرۋشى قورلارىن ۋاقىتىلى تولىقتىرۋى، باعاعا مونيتورينگ جاساي وتىرىپ كومىر مەن ديزەل وتىنىنىڭ ءۇزىلىسسىز جەتكىزىلىمدەرى بويىنشا جۇمىستى كۇشەيتۋى قاجەت»، — دەدى ت. سۇلەيمەنوۆ.

ۇلتتىق بانك توراعاسى د. اقىشەۆ، ءوز كەزەگىندە، ۇلتتىق بانكتىڭ بولجامدارى بويىنشا ينفلياتسيا دەڭگەيى 2018 جىلعا جوسپارلانعان دالىزدە ساقتالاتىنىن، الايدا 2019–2020 جىلدارى بەلگىلەنگەن دالىزدەن اسۋى مۇمكىن ەكەنىن ايتىپ ءوتتى.

«بىرىنشىدەن، بۇل رەسەي فەدەراتسياسىنا قارسى سانكتسيالار رەجيمىمەن بايلانىستى، ەكىنشىدەن، بۇعان مۇناي باعاسىنىڭ تومەندەۋى سەبەپ، ۇشىنشىدەن – الەۋمەتتىك شىعىندار مەن نەسيەلەردىڭ ءوسىمى سەبەپ»، — دەپ ناقتىلادى د. اقىشەۆ.

پرەمەر-مينيستر باقىتجان ساعىنتاەۆ ماسەلەنى قاراۋ قورىتىندىسى بويىنشا تاۋارلار مەن قىزمەت تۇرلەرىنە باعانىڭ نەگىزسىز وسۋىنە جول بەرمەۋدى قاتاڭ باقىلاۋعا الۋدى تاپسىردى. اتالعان ماسەلە اي سايىن قارالىپ وتىرادى.

Abai.kz