ساۋلە مۇقاشەۆا ەسىمدى سالىمشى ازاتتىققا ءبىراز بۇرىن پاتەرىن ساتىپ، اقشاسىن بانككە سالعانىن، ەندى ونى الا الماي وتىرعانىن ايتادى. سالىمشىلاردىڭ سوزىنشە، بۇعان دەيىن اقشاسىن قايتارۋدى 31 تامىزعا دەيىن توقتاتقان بانك وسى كۇنگە دەيىن قارجىسىن بەرمەي وتىر. اقشاسىن تەڭگەمەن سالعان كليەنتتەر دوللار باعامى قىمباتتاپ جاتقاندىقتان "اقشامىز قۇنسىزدانىپ بارادى" دەپ الاڭدايدى.
ءوزىن سۇڭعات بايبولاتوۆ دەپ تانىستىرعان بانك قىزمەتكەرى بولىمشە ديرەكتورى جاسۇلان توعىزباەۆتىڭ "نۇر وتان" پارتياسىنا جيىنعا كەتكەنىن، تۇستەن كەيىن كەلەتىنىن ايتقان. ديرەكتوردى كۇتكەن سالىمشىلار ونىمەن وسى ۋاقىتقا كەزدەسە الماي وتىر.
"استانا بانكى" سالىمشىلارى سوڭعى بىرنەشە ايدا وسىمەن ەكىنشى رەت اقشاسىن تالاپ ەتىپ وتىر. ماۋسىمنىڭ باسىندا ونداعان ادام بانكتەن اقشاسىن الا الماي جۇرگەنىن ايتىپ، نارازىلىق تانىتقان.
18 ساۋىردە قازاقستان پرەزيدەنتى نۇرسۇلتان نازارباەۆ ۇلتتىق بانك قىزمەتىن قورىتىندىلاعان جيىندا "جۇمىسىن ءساتسىز جۇرگىزىپ، ودان ارى مەملەكەتتەن قولداۋ كورگەن بانكتەردىڭ ەشقانداي ناتيجە كورسەتپەگەنىن" ايتقان.
"سوندىقتان بارلىعىنا ۇلتتىق بانكتى قىسپاققا الا بەرۋدى توقتاتۋعا كەڭەس بەرەمىن. قازىر "ەكسيمبانك", "استانا بانكى" جانە Qazaq Bank بانكتەرى اكتسيونەرلەرى ناشار باسقارىپ، سالىمشىلارىنا جاۋاپ بەرە الماي، قارىز بولىپ قالعاندىقتان كورسەتكىشتەرى ناشارلاپ كەتتى. ولار قالاي جۇمىس ىستەي الادى؟ پارلامەنت دەپۋتاتتارىن ارالاستىرىپ، ۇلتتىق بانككە قىسىم جاساي بەرۋدى توقتاتىڭىزدار دەپ تاعى دا ايتام" دەگەن نازارباەۆ.
بۇدان سوڭ "استانا بانكى" ءوزىنىڭ تۇتىنۋشىلارى، سەرىكتەستەرى مەن نەسيە بەرۋشىلەرى الدىنداعى بارلىق مىندەتتەمەسىن "تۇراقتى ورىنداپ وتىرعانىن" مالىمدەگەن.
كەيىن بانك 22 ءساۋىر مەن 2 امىر ارالىعىندا جەكە تۇلعالاردىڭ بانكتەن اقشاسىن الۋى مەن اقشالاي اۋدارىم جاساۋىنا شەكتەۋ ەنگىزگەن.
Abai.kz
