مەن، قازاقستان رەسپۋبليكاسىنىڭ ازاماتى مىرزاشەۆ دۋمان ماراتۇلى  قارۋلى كۇشتەردىڭ قاتارىنا كىرە وتىرىپ انت قابىلدايمىن جانە قازاقستان حالقى مەن ونىڭ زاڭدى سايلانعان پرەزيدەنتىنە اقتىق دەمىم قالعانشا ادال بولۋعا، ءوزىمنىڭ ەگەمەن مەملەكەتىمنىڭ كونستيتۋتتسياسى مەن زاڭدارىن قاستەرلەپ ساقتاۋعا سالتاناتتى تۇردە انت ەتەمىن.

بۇل تۇركىستاندىق دۋمان ماراتۇلىنىڭ وتان الدىندا بەرگەن اسكەري انتى. كىشكەنتايىنان شەكاراشى بولۋدى ارمانداعان جاس جىگىت بۇگىندە قولىنا قارۋ الىپ قاسقايىپ تۇرىپ 28 گۆاردياشىل پانفيلوۆشىلار ساياباعىندا ماڭگىلىك وت الاۋىنىڭ ماڭىندا انت قابىلدادى. وسىلايشا، قر ۇقك شەكارا قىزمەتى اكادەمياسىنىڭ ءبىرىنشى كۋرسىنا وقۋعا ءتۇسىپ، شەكاراشى اتانعان ول الداعى ۋاقىتتا وزىنە جۇكتەلگەن جاۋاپتى مىندەتتى ابىرويلى اتقارۋعا تىرىسىپ، ساباعىن جاقسى وقۋعا بەل بۋدى.

بۇل اتالمىش وقۋ ورداسىنا وقۋعا تۇسكەن بولاشاق شەكاراشى وفيتسەرلەردىڭ قازاقستان حالقى الدىندا بەرگەن اسكەري سەرتى بولاتىن. كەشە عانا مەكتەپ ءبىتىرىپ كەلگەن شەكاراشىلاردىڭ بۇل تولقىنى شەتتەرىنەن سايدىڭ تاسىنداي ىرىكتەلگەن مىقتى ازاماتتار ەكەنى كورىنىپ-اق تۇر.

اسكەري انتتى سالتاناتتى تۇردە قابىلداۋعا الماتى قالاسى اكىمدىگىنىڭ وكىلدەرى، قوعام قايراتكەرلەرى، شەكارا قىزمەتى اكادەمياسىنىڭ ارداگەرلەرى، كۋرسانتتاردىڭ اتا-انالارى مەن جاقىندارى شاقىرىلدى.

اكادەميا باستىعىنا ءبىرىنشى كۋرس كۋرسانتتارىنىڭ انت قابىلداۋ راسىمىنە دايىن ەكەنىن بايانداعان پولكوۆنيك الىبەك بەكتۇرلى «تۇزەل تىك تۇر، نازار ورتاعا » دەپ جەكە قۇرامعا پارمەن بەردى. سودان كەيىن  اسكەري ءبولىمنىڭ جاۋىنگەرلىك تۋى شىعارىلىپ، ساپ تۇزەپ تۇرعان كۋرسانتتاردىڭ قاتارىنا بارىپ ورنىقتى.

شارا بارىسىندا العاش بولىپ ءسوز العان اكادەميا باستىعى پولكوۆنيك پوليۆانوۆ پاۆەل كونستانتينوۆيچ ماڭگىلىك الاۋ ماڭىندا اسكەري انت قابىلداۋ ءۇشىن ساپ تۇزەپ تۇرعان 200-دەن استام  شەكاراشىنى بۇگىنگى ەستە قالار ايتۋلى ساتتەرىمەن شىن جۇرەكتەن قۇتتىقتاپ، ولاردىڭ الداعى وقۋلارىنا ساتتىلىك تىلەدى.

ءوز كەزەگىندە ءسوز العان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، اۋعان سوعىسى ارداگەرلەر ۇيىمى قاۋىمداستىعىنىڭ توراعاسى باقىتبەك سماعۇل:  «بۇگىنگى تاڭدا ەلباسىنىڭ نازارىنداعى نەگىزگى باسىمدىقتاردىڭ ءبىرى  - ۇلتتىق قاۋىپسىزدىكتى قامتاماسىز ەتۋ. وسى ورايدا وتان قورعاۋشىلارعا جۇكتەلگەن مىندەت زور. شەكاراشى وفيتسەر بولامىن دەپ وقۋعا ءتۇسىپ، بۇگىن انت قابىلداپ جاتقان كۋرسانتتارعا قيىن دا كۇردەلى اسكەري قىزمەتتى ادال ورىنداۋعا ءاردايىم دايىن بولۋى قاجەت. سوندىقتان اسكەري ءبىلىمدى جەتىك مەڭگەرىپ، ءوز ماماندىعىنىڭ حاس شەبەرى بولۋعا ۇمتىلعان كۋرسانتتىڭ  ارقاشاندا ايى وڭىنان تۋارى انىق. ولاي بولسا، قۇرمەتتى شەكاراشىلار سىزدەردى بۇگىنگى انت قابىلداۋ مەرەكەلەرىڭىزبەن شىن جۇرەكتەن قۇتتىقتايمىن»، - دەدى.

ال شەكارا قىزمەتى ارداگەرلەرىنىڭ اتىنان ءسوز العان «زاستاۆا تارلاندارى» شەكاراشى-ارداگەرلەردىڭ رەسپۋبليكالىق قوعامدىق بىرلەستىگىنىڭ مۇشەسى، اكادەميانىڭ جەدەل-تاكتيكالىق فاكۋلتەتىنىڭ پروفەسسورى، زاپاستاعى گەنەرال-مايور اسىلوۆ نۇرعالي جۇماجانۇلى دا ءوزىنىڭ جۇرەك-جاردى لەبىزىن ءبىلدىردى.

كەڭەس وداعىنىڭ باتىرى، اۋعان سوعىسى ارداگەرلەر ۇيىمى قاۋىمداستىعى توراعاسىنىڭ ءبىرىنشى ورىنباسارى كرەمەنيش نيكولاي يۆانوۆيچ اسكەري انتتا  - قارۋلى كۇشتەردىڭ نەگىزگى مىندەتتەرى جانە جاۋىنگەرلەردىڭ ماڭىزدى قاسيەتتەرى قانداي بولۋى كەرەكتىگى كورسەتىلگەن. انتتى بۇزعان سارباز نەمەس كۋرسانت وتانعا وپاسىزدىق ەتىپ، مەملەكەتتىڭ اسكەري قۋاتىنا نۇقسان كەلتىرسە، بارىپ تۇرعان جاۋىزدىق بولىپ ەسەپتەلەدى. ول بۇل ارەكەتى ءۇشىن زاڭنىڭ ەڭ قاتال كۇشىمەن جازالاناتىنىن ەسكەرتتى.

اسكەري انت – ساپ تۇزەگەن ءار كۋرسانتتىڭ ومىرىندەگى ەرەكشە ءارى ماڭىزدى ءراسىم. كەشە عانا وقۋعا ءتۇسىپ از ۋاقىتتىڭ ىشىندە اسكەري تارتىپكە ۇيرەنىپ قالعان جاس كۋرسانتتار وسىناۋ جاۋاپتى ساتتە تولقىعاندارىن دا جاسىرا المادى. الماتى وبلىسىنىڭ نارىنقول اۋدانىنان كەلگەن ديحانباەۆ ەربوسىن ايتۋلى كۇنگى قۋانىشىن بىزبەن ءبولىستى. الداعى وقۋىن جاقسى وقۋدى ءسوز ەتەكەن كۋرسانت وزىنە زور سەنىممەن قارايتىنىن بىردەن ءبىلدىردى. ونىڭ قۋانىشى بۇل كۇنى ەكى ەسەلەنە ءتۇستى، سەبەبى  اتا-اناسى ءدال وسى ساتتە قاسىنان تابىلدى. «ۇلىمىزعا اسكەري قىزمەتشى بولۋدى ماقسات تۇتقان ەكەنسىڭ، ەندى وسى شەكاراشى ماماندىعىن مەڭگەرىپ شىعۋ پارىزىڭ دەپ ايتۋدى ءجون كوردىك. ەر بالانىڭ اسكەري ءتارتىپتى كورگەنى ماڭىزدى. وسى وقۋعا تۇسكەندە ۇلىمىز قاتتى قۋاندى. ەندى بۇيىرتسا وقۋىن امان-ەسەن ءبىتىرىپ، ءوز ماماندىعى بويىنشا جۇمىس جاساپ، ەلىمىزدىڭ مەملەكەتتىك شەكاراسىن قورعاۋعا ءبىر كىسىدەي ات سالىسىپ جاتسا ودان ارتىق قانداي باقىت كەرەك»، - دەيدى ەربوسىننىڭ  اناسى ەلميرا قۋانىشىن جاسىرا الماي.

ساياباققا جينالعان كۋرسانتتاردىڭ تۋعان-تۋىس، باۋىرلارىنىڭ جۇزدەرىنەن قۋانىش بەلگىسى انىق بايقالادى. بولاشاق شەكاراشى وفيتسەرلەردىڭ كوگىلدىر اسپانىمىزداي كوك بايراعىمىزدى جەلبىرەتۋلەرى دە اسقاق داڭق، مارتەبەسىندەي دەپ ايتساق ارتىق بولماس.

جانات جابىربەكوۆ،

قر ۇقك شەكارا قىزمەتى اكادەمياسىنىڭ

ءباسپاسوز حاتشىسى

Abai.kz