سۋديا حاتيما ەرسەنوۆا ۋكراينالىق جۋرناليسكە 60 مىڭ 125 تەڭگە (25 ايلىق ەسەپتىك كورسەتكىش) كولەمىندە ايىپپۇل سالدى. كەيىن بۇل سوما 30 پايىزعا ازايتىلىپ، جۋرناليست 42 مىڭ تەڭگە تولەۋگە مىندەتتەلدى.

الەكساندر گوروحوۆسكي قازاقستانعا "ۋرالسكايا نەدەليا" باسىلىمىنىڭ شاقىرتۋىمەن كەلگەنىن ايتتى. ونىڭ سوزىنشە، كەزدەسۋ پىكىر الماسۋ جاعدايىندا وتكەن جانە ەشقانداي اقشالاي سىياقى تۋرالى ءسوز بولماعان. گوروحوۆسكي "سەمينار" ءسوزىن پوليتسەيلەر ويلاپ تاپقانىن ايتادى.

سوت زالىندا پوليتسيا كۋاگەر دەپ اكەلگەن تالعات قاتاۋوۆ دەگەن ازامات سويلەدى. ونى پوليتسيا ورالدىق قوناقۇيلەردىڭ بىرىندە "ۋكرايناعا قاتىستى سەمينار بولىپ جاتىر" دەپ حابارلاعان "دەرەككوز" دەيدى. قاتاۋوۆتىڭ سوزىنشە، ول پوليتسياعا ەشتەڭە حابارلاماعان. "سەمينار" جايلى مۇلدەم بەيحابار، ال الەكساندر گوروحوۆسكي تۋرالى بۇرىن ەستىمەگەن. ال ءوزىنىڭ ەسىمى ىستە بار ەكەنىن تانىستارىنان ەستىگەن.

گوروحوۆسكيدى شاقىرعان ورالدىق جۋرناليست لۇقپان احمەدياروۆ "جۋرناليستيكا مەكتەبى" ەكىنشى جىل ءوتىپ جاتقانىن ايتتى. ول بۇل دارىستەردىڭ تەگىن ۇيىمداستىرىلاتىنىن اتاپ ءوتتى.

15 قىركۇيەكتە ورالداعى قوناق ۇيلەردىڭ بىرىندە ءوتىپ جاتقان "جۋرناليستيكا مەكتەبى" جوباسى اياسىنداعى جاستارعا ارنالعان شاراعا گوروحوۆسكي دە قاتىسقان. جيىن ءوتىپ جاتقان جەرگە كەلگەن ەكى پوليتسيا قىزمەتكەرى كەلىپ، وسى قوناق ۇيدە "زاڭسىز كونفەرەنتسيا" ءوتىپ جاتقانى تۋرالى بەلگىسىز بىرەۋ تەلەفون سوققانىن حابارلادى.

پوليتسيا قىزمەتكەرلەرى ۋكراينا ازاماتى الەكساندر گوروحوۆسكيدىڭ قۇجاتتارىن تەكسەرىپ، ونىڭ قازاقستان اۋماعىندا جۇمىس ىستەۋگە رۇقسات قاعازى جوق ەكەنىن ايتتى. بيلىك وكىلدەرى گوروحوۆسكيدىڭ ۇستىنەن اكىمشىلىك حاتتاما تولتىرىپ، ونى "اكىمشىلىك قۇقىق بۇزۋشىلىق تۋرالى" كودەكستىڭ 517-بابى ("شەتەلدiكتiڭ نەمەسە ازاماتتىعى جوق ادامنىڭ قازاقستان رەسپۋبليكاسىنىڭ حالىقتىڭ كوشى-قون سالاسىنداعى زاڭناماسىن بۇزۋ") بويىنشا ايىپتاعان. بۇل باپتا ايىپتى دەپ تانىلعان ادامعا 25 ايلىق ەسەپتiك كورسەتكiش مولشەرiندە ايىپپۇل سالۋ نە ون تاۋلىككە مەرزىمگە اكىمشىلىك قاماۋعا الۋ نەمەسە ونى قازاقستان اۋماعىنان شىعارىپ جiبەرۋ جازالارى قاراستىرىلعان.

پوليتسيا گوروحوۆسكيدىڭ ميگراتسيالىق كارتاسىن قايتارىپ بەرگەن. ول كيەۆكە 18 قىركۇيەكتە قايتاتىنىن ايتتى.

Abai.kz