2018 جىل – قازاقستاندا وزبەكستان جىلى. وتكەن جىلدىڭ سوڭىندا مەملەكەت باسشىسى نۇرسۇلتان نازارباەۆ وزبەكستان پرەزيدەنتى شاۆكات ميرزياەۆپەن  وتكىزگەن شاعىن جانە كەڭەيتىلگەن قۇرامداعى كەلىسسوزدەردەن كەيىن وسىلاي مالىمدەگەن ەدى. ەكى ەل اراسىنداعى ساۋدا اينالىمى – 1,5 ميلليارد دوللاردى قۇرايدى. وسى جىلى بۇل كورسەتكىشتى 5 ميلليارد دوللار. جەتكىزۋ كوزدەلگەن. وسىنداي مۇمكىندىكتەردى پايدالانىپ، قازاقستانداعى جوو-عا تۇسۋگە نيەت بىلدىرگەن وزبەكستاندىق تالاپكەرلەر سانى بيىل كۇرت كوبەيگەن، دەپ جازادى اباي-اقپارات turkystan.kz-كە سىلتەمە جاساپ.

جۋىردا الماتىداعى م.تىنىشباەۆ اتىنداعى كولىك جانە كوممۋنيكاتسيا اكادەمياسىندا «قازاقستانداعى وزبەكستان جىلى» اياسىندا وزبەكستاننان كەلگەن جاستاردىڭ مادەني شاراسى ءوتتى. وزبەكستانداعى رەسپۋبليكالىق قازاق مادەني ورتالىعى ۇيىتقى بولىپ وتىرعان بۇل شارا ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىمەن تىكەلەي ساباقتاسىپ جاتىر. 2017 جىلى قازاقستاننىڭ جوعارى وقۋ ورىندارىنا كەلىپ، وقۋعا تۇسكەن ستۋدەنتتەر سانى 1300 بولسا، بيىل 12 مىڭنان اسىپ جىعىلدى. ءبىر عانا كولىك جانە كوممۋنيكاتسيا اكادەمياسىنىڭ وزىنە 700-گە جۋىق تالاپكەر قابىلدانعان. بۇل – وسى وقۋ ورنىنا تۇسكەن ستۋدەنتتەردىڭ شامامەن 40 پايىزى. دۇنيەجۇزى قازاقتارى قاۋىمداستىعىنىڭ وزبەكستانداعى وكىلى كلارا سادىرباەۆا قازاقستانداعى جوعارى وقۋ ورىندارىنىڭ ءبىلىم ساپاسى الدەقايدا جوعارى، سونىمەن قاتار تولەم اقىسىنىڭ ەداۋىر تومەن ەكەندىگىن العا تارتتى. ەكى ەل باسشىلارى ارنايى مەموراندۋمعا قول قويعاننان كەيىن وزبەكستاننىڭ ءار ايماعىندا قازاقستاننىڭ ءبىلىم كۇندەرى – سەمينار-كورمەلەر وتكىزىلدى. بۇرىن دا وسى تەكتەس كورمەلەر ۇيىمداستىرىلعانىمەن دە وزبەكستاندىقتار قازاقستان ديپلومىنىڭ وزبەك مەكەمەلەرىندە جارامدىلىعىنا كۇمانمەن قاراپتى. ارنايى مەموراندۋمعا قول قويىلعاننان كەيىن ەل تولىق سەنە باستاعان. كلارا سادىرباەۆا بيىلعى توپتىڭ كوپ بولۋى قارجى ماسەلەسىنە دە تىكەلەي بايلانىستى بولعانىن جاسىرمادى. وقۋعا قابىلدانۋ ءۇشىن وزبەكستاندىق تالاپكەرلەر جىل سايىن ورتاشا ەسەپپەن 120 ميلليون سۋم قارجىنى تولەيدى ەكەن. تەڭگەگە شاقساق 6 ميلليونعا جۋىقتاپ قالادى. سونىمەن قاتار، وزبەك ءبىلىم بەرۋ مەكەمەلەرى تالاپكەردى ارنايى ەمتيحانسىز وقۋعا قابىلدايتىن كورىنەدى. ال ءبىزدىڭ جوعارى وقۋ ورىندارى ءبولىپ تولەۋگە مۇمكىندىك بەرەدى. وسىنىڭ ءبارىن ساراپتاپ كەلگەندە وزبەكستاندىق جاستارعا قازاق ەلىندە ءبىلىم الۋ الدەقايدا ءتيىمدى بولىپ وتىر. ەكى ەل اراسىندا وسىعان دەيىن دە ءبىلىم الماسۋلار بولىپ جاتتى. بىراق ونىڭ ماڭىندا ءتۇيىنى تارقاماعان تۇيتكىلدەر كوپ بولعان. جوعارىدا ايتىپ وتكەنىمىزدەي قازاقستان ديپلومىن وزبەكستان مەكەمەلەرى جارامسىز دەپ تاپقاننان كەيىن، ول تۇلەكتەر قازاقستانعا قايتادان كەلىپ ءوز ەڭبەك جولىن باستاعان.

«قازاقستانعا وقۋعا قابىلدانىپ جاتقانداردىڭ باسىم بولىگى قانداستارىمىز. ولارعا مەملەكەت جانە وقۋ ورىندارى تاراپىنان ايتارلىقتاي جەڭىلدىكتەر قاراستىرىلعان. م.تىنىشباەۆ اتىنداعى كولىك جانە كوممۋنيكاتسيا اكادەمياسىنا وقۋعا تۇسكەن بارلىق تالاپكەر جاتاقحانامەن قامتاماسىز ەتىلگەن. سونداي-اق، وزگە وقۋ ورىندارى دا رەكتوردىڭ ارنايى گرانتتارى مەن الەۋمەتتىك جەڭىلدىكتەرىن بەرىپ وتىر»، – دەدى كلارا سادىرباەۆا. ەكى ەلدىڭ ءبىلىم ءجۇيسىنىڭ ءبىر-بىرىنە ۇقسامايتىندىعى دا وزبەكستان تالاپكەرىنە وڭتايسىز ەكەن. ماسەلەن، قازاقستاندا ارنايى ءبىلىم گرانتتارىنا كونكۋرس اياقتالعاندا بارىپ، وزبەكستان ءبىلىم مەكەمەلەرى تۇلەكتەرگە ديپلومدارىن بەرە باستادى. ونان بولەك قۇجات حاتتامالارىن تولتىرۋ مەن جيناقتاۋ بارىسىندا ءبىرشاما كەدەرگىلەر تۋىندايدى دەيدى ماماندار. مەملەكەت باسشىلارىنىڭ ەكى جاقتى مەموراندۋمعا قول قويۋى مۇنداي ولقىلىقتاردى بولاشاقتا تۇزەيدى دەپ ۇمىتتەنەدى بىلىمقۇمار جاستار. جىل وتكەن سايىن قازاقستاندا وقۋعا قۇمار وزبەكستاندىق جاستاردىڭ سانى ارتىپ وتىر. كەلەر جىلى بۇل كورسەتكىشتەر تاعى دا ەسەلەنۋى بەك مۇمكىن.

Abai.kz