قازاقستان پرەزيدەنتىنە استانا قالاسىن ودان ءارى دامىتۋدىڭ جانە تۇرعىن ءۇي الاپتارىندا قۇرىلىس جۇرگىزۋدىڭ جوسپارى تانىستىرىلدى، دەپ حابارلايدى اباي-اقپارات اقوردانىڭ رەسمي سايتىنا سىلتەمە جاساپ.

مەملەكەت باسشىسى ەلوردا تۇرعىندارىنىڭ تۇرمىسى ءۇشىن قولايلى جاعداي جاساۋدىڭ الەۋمەتتىك ماڭىزى جوعارى ەكەنىنە توقتالىپ، قالا قۇرىلىسىندا كەشەندى ءادىس قولدانۋدىڭ قاجەتتىگىن اتاپ ءوتتى.

نۇرسۇلتان نازارباەۆ قالا حالقىن قولجەتىمدى الەۋمەتتىك نىساندارمەن، سونىڭ ىشىندە ءبىلىم بەرۋ جانە دەنساۋلىق ساقتاۋ مەكەمەلەرىمەن قامتاماسىز ەتۋدىڭ ماڭىزدىلىعىن ايتتى.

سونىمەن قاتار، ەلباسى شاھاردى كوگالداندىرۋ، قالادا كولىك قاتىناسىن وڭتايلاندىرۋعا مۇمكىندىك بەرەتىن اۆتوتۇراقتار مەن جولايرىقتار سالۋ ماسەلەلەرىنە نازار اۋداردى.

استانا اكىمى ب.سۇلتانوۆ مەملەكەت باسشىسىنا ەلوردادا الەۋمەتتىك، كوممەرتسيالىق، اكىمشىلىك جانە تۇرعىن ءۇي نىساندارىن سالۋدىڭ جوسپارلارى تۋرالى مالىمدەپ، قالا ينفراقۇرىلىمىن دامىتۋدىڭ پەرسپەكتيۆالارى جونىندە باياندادى. قالا باسشىلىعىنىڭ اقپاراتىنا سايكەس، جىل باسىنان بەرى ەلوردادا 1,7 ميلليون شارشى مەتر تۇرعىن ءۇي پايدالانۋعا بەرىلگەن جانە جىل سوڭىنا دەيىن تاعى دا 2,3 ميلليون شارشى مەتر تۇرعىن ءۇي سالۋ جوسپارلانىپ وتىر.

Abai.kz