مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسى بويىنشا ەكسپەديتسيانى ۇيىمداستىرۋشى «Kazakh Tourism» ۇك. «جاڭا جىبەك جولى» ەكسپەديتسياسىنىڭ باعىتىن «QazaqGeography» رقب جۇزەگە اسىرۋدا.

ەكسپەديتسيا قۇرامى تاجىريبەلى ساياحاتشىلاردان، تۋروپەراتور وكىلدەرى مەن شەتەلدىك جانە قازاقستاندىق ترەۆەل-بلوگەرلەردەن، سونداي-اق «National Geographic رەسەي» كومانداسىنان قۇرالعان.

«ۇلى دالا Eلىنە ساياحات» جوباسى اياسىندا ءوتىپ جاتقان «جاڭا جىبەك جولى» باعىتى بويىنشا ەكسپەديتسيا بۇگىن الماتى قالاسىنا كەلىپ جەتتى. جوبانىڭ VI باعىتى 17 قىركۇيەكتە جولعا شىققانىن ەستەرىڭىزگە سالا كەتەيىك. 13 كۇندە قاتىسۋشىلار الماتى، جامبىل جانە تۇركىستان وبلىستارىنا بارىپ قايتاتىن بولادى.

«ۇلى دالا ەلىنە ساياحات» جوباسى قازاقستان ايماقتارىنا جاسالاتىن ەڭ ءىرى ەكسپەديتسيا. ەكسپەديتسيا التى باعىت بويىنشا التى تۋريستىك كلاستەردى قامتي وتىرىپ، ماڭىزدى تابيعي نىساندارعا بارۋ ارقىلى جۇرگىزىلەدى. ەكسپەديتسيانىڭ ماقساتى — جاڭا تۋريستىك باعىتتاردى جاساۋ ءۇشىن تابيعي، تاريحي، كيەلى مەكەندەرى زەرتتەۋ، ىشكى تۋريزم مەن ينفراقۇرىلىمدى دامىتۋ، جانە تۋعان ەلدى زەرتتەۋ. وعان قوسا، ەكسپەديتسيا تۋرالى ماتەريالدار قازاقستاننىڭ تۋريستىك دەستيناتسيا رەتىندە تانىلۋىنا جانە حالىقتى ىشكى تۋريزمگە تارتۋعا ىقپال ەتەدى. ەكسپەديتسيا ناتيجەسىندە ەلىمىزدىڭ تابيعي نىساندارى بويىنشا جاڭا تۋريستىك باعىتتار، ساپالى فوتو-جانە ۆيدەوبانكتەر قۇرىلادى. ولاردىڭ قازىرگى جاعدايى تۋرالى وزەكتى اقپارات الىنادى، يلليۋستراتسيالانعان جولنۇسقا جاسالاتىن بولادى.

ەكسپەديتسيانىڭ العاشقى كۇندەرى الماتى وبلىسىندا ءوتتى. قاتىسۋشىلار قازاقستان–قىتاي شەكاراسىندا بولىپ، قورعاس بەكەتىنە بارار جولدا جاركەنتتەگى ەرەكشە مەشىتكە سوقتى. بۇل مەشىت بىردە ءبىر شەگەسىز، تيان-شان شىرشاسىنان سالىنعان. ارى قاراي ەكسپەديتسيا مۇشەلەرى قازاقستانداعى ەڭ كورىكتى جەرلەردىڭ ءبىرى — كولسايعا بارىپ، ونىڭ سۇلۋ كولدەرى مەن قايىڭدى كولىن تاماشالادى.

ارى قاراي ەكسپەديتسيا اقتاۋ تاۋىنا، ايعايقۇمعا، شوقان ءۋاليحانوۆ بۇلاعىنا، تالحيز قالاشىعىنا بارىپ قايتتى. سونداي-اق ساياحاتشىلار الماتى وبلىسىندا يۋنەسكو دۇنيەجۇزىلىك مۇراسىنىڭ نىسانى بولىپ تابىلاتىن تامعالى شاتقالىندا بولدى.

بۇگىن ەكسپەديتسيا مۇشەلەرى الماتى قالاسىنىڭ كورىكتى جەرلەرى: «مەدەۋ» مۇزايدىنىن، «شىمبۇلاق» پەن ۇلكەن الماتى كولىن تاماشالادى. بۇل جەرلەر ارقاشان تۋريستەردى وزىنە تارتادى. ودان بولەك، الماتىدا ساياحاتشىلارىمىزدى قازاقستان ەستراداسىنىڭ جۇلدىزى — باقىت شاداەۆا قارسى الدى.

«قازاقستاندا ىشكى ءتۋريزمدى دامىتۋعا بۇرىنعىدان دا كوپ كوڭىل ءبولىنىپ جاتقانى ءۇشىن قۋانىشتىمىن. تۋعان ولكەمىزدىڭ سۇلۋلىعىن ايتۋعا ءسوز جەتپەيدى، تابيعاتى قانداي كوركەم، ءارى سۇلۋ! الماتىعا بەرەكەلى كۇز كەزىندە كەلدىڭىزدەر، جەمىس-جيدەك پىسكەن، كۇزدىڭ كەرەمەت كەشتەرىنە كۋا بولاتىن ءسات. وعان قوسا، ەكسپەديتسيالارىڭىزعا ءوز ءىسىنىڭ حاس شەبەرلەرى جينالىپتى. قازىر جولدىڭ ءدال ورتاسىنا كەلدىڭىزدەر، الدا جاڭا جەرلەر ءالى دە كوپ. بۇگىن كوپتەگەن اسەر الىپ، جاڭا دۇنيەلەرمەن تانىساسىزدار دەپ ۇمىتتەنەمىن. قازاقستاننىڭ بەيمالىم جەرلەرىن زەرتتەيتىن باعىتتارىڭىز – جاڭا جىبەك جولىندا ساپارلارىڭىز ءساتتى بولسىن»، — دەپ ءانشى باقىت شاداەۆا ءوز اسەرىمەن ءبولىسىپ، ءسات ساپار تىلەدى.

بۇدان كەيىن قاتىسۋشىلار ەكى مىڭ جىلدىق تاريحى بار ەجەلگى تاراز قالاسىنا بارادى. ەرتە كەزدەن بەرى ۇلى جىبەك جولىنىڭ بويىندا تۇرعاندىقتان بۇل قالانىڭ ماڭىزى وتە جوعارى بولعان. تارازدىڭ جانە ونىڭ اينالاسىنىڭ كورىكتى جەرلەرىن كورىپ بولعان سوڭ، جوبا قاتىسۋشىلارى جامبىل جانە تۇركىستان وبلىستارىنىڭ اۋماعىندا ورنالاسقان، ورتا ازيا مەن قازاقستانداعى ەڭ ەسكى قورىقتاردىڭ ءبىرى اقسۋ-جاباعىلىعا بەت الادى.

ارى قاراي ولار باتىس تيان-شان تاۋلارىنىڭ سولتۇستىك-شىعىسىنداعى سايرام-وگەم مەملەكەتتىك ۇلتتىق تابيعي ساياباعىنا بارىپ، سول جەردەن تەڭىز دەڭگەيىنەن 2350 مەتر بيىكتە ورنالاسقان سايرامسۋ كولىن كورىپ قايتادى. سونداي-اق قاتىسۋشىلار تۇركىستان وبلىسىنىڭ اۋماعىنداعى وتىرار قالاسى، ارىستان باب، قوجا احمەت ياسساۋي كەسەنەلەرى، ساۋران قالاسى مەن باسقا دا ارحەولوگيالىق جانە تابيعي ەسكەرتكىشتەرگە بارادى.

«Kazakh Tourism» ۇك ۇكىمەت قاۋلىسىمەن 2017 جىلى شىلدەدە قۇرىلعان. كومپانيانىڭ نەگىزگى مىندەتتەرى: ەلىمىزدىڭ تۋريستىك الەۋەتىن شەتەلدە ناسيحاتتاۋ، سونىمەن قاتار قازاقستاننىڭ تۋريستىك سالاسىنا ينۆەستيتسيا تارتۋ.

«QazaqGeography» رەسپۋبليكالىق قوعامدىق بىرلەستىگى بەس باعىت بويىنشا جۇمىس ىستەيدى. ولار: گەوگرافيا، كليمات; قورشاعان ورتا، تابيعي رەسۋرستار; بيوالۋانتۇرلىلىك; تۋريزم، ساياحات، ولكەتانۋ; تاريحي-مادەني مۇرا، ەتنوگرافيا. قازىر قازاقستان رەسپۋبليكاسىندا 11 وكىلدىك اشىلعان.

Abai.kz