38 جاستاعى ايگۇل اقبەرديەۆا "بيلىكتى باسىپ الماق بولدى، قازاقستاننىڭ كونستيتۋتسيالىق قۇرىلىسىن كۇشتەپ وزگەرتپەك بولدى" دەپ ايىپتالىپ جاتىر.

ايگۇل اقبەرديەۆا ءوزىنىڭ قىلمىستىق ىسپەن تانىسپاعانىن ايتىپ، سوتتان ونىڭ ورىس تىلىندەگى كوشىرمەسىن، اسىرەسە سوت ساراپتاماسىنىڭ ورىس تىلىندەگى نۇسقاسىن بەرۋدى سۇرادى. ول سونىمەن قاتار جۋىردا عانا كۇيەۋى ءۇش جىلعا سوتتالعانىن، سوت كەزىندە كۇيەۋىنىڭ اكەسى قايتىس بولعانىن ايتىپ، سوتقا دايىندالا الماعاندىقتان پروتسەستى كەيىنگە قالدىرۋدى سۇرادى. اقبەرديەۆا بۇعان قوسا كامەلەتكە تولماعان قىزى جانسايا قۋاندىقتان دا كۋاگەر رەتىندە جاۋاپ الۋدى سۇرادى.

ادۆوكات جانار سۇندەتقاليەۆا ونىڭ ءسوزىن تولىقتاي قولداپ، سوتتان قىلمىستىق ءىستىڭ ورىس تىلىندەگى اۋدارمالارىمەن تانىسۋعا رۇقسات بەرۋدى سۇرادى.

سۋديا سوتتالۋشىنىڭ سوت ماتەريالىمەن تانىسپاعانىن پروكۋرور ەرمەك نۇربەرگەنوۆتىڭ كەمشىلىگى ەكەنىن ايتىپ، پروكۋرورعا ءىس ماتەريالىن دايىنداپ بەرۋدى تاپسىردى.

سۋديا سوتتالۋشى جاساعان وتىنىشتەردىڭ ءبارىن قاناعاتتاندىرىپ، سوت پروتسەسى كەلەسى دۇيسەنبى - قازاننىڭ 1-ىندە جالعاساتىنىن حابارلادى.

ايگۇل اقبەرديەۆاعا قاتىستى قىلمىستىق ءىس 26 ماۋسىمدا قوزعالعان. تەرگەۋشىنىڭ ايىپتاۋ اكتىسىندە ايگۇل اقبەرديەۆانىڭ 2017 جىلدىڭ جەلتوقسانىندا Instagram الەۋمەتتىك جەلىسىندە تىيىم سالىنعان "قازاقستاننىڭ دەموكراتيالىق تاڭداۋى" (قدت) قوزعالىسىنا قوسىلۋعا ۇندەگەن باعدارلاماسىمەن تانىسقان سوڭ وندا بيلىككە قارسى پىكىر پايدا بولعانى تۋرالى ايتىلعان. 2018 جىلدىڭ اقپان ايىندا "ايكەنا", "ايكەن", "ايگولەك" نيكتەرىمەن Telegram جەلىسىندەگى "دۆك اكتيۆيست" توبىنا تىركەلىپ، بيلىكتى قۇلاتۋعا شاقىرعان بىرنەشە حابارلاما جازعانى كورسەتىلگەن.

ايگۇل اقبەرديەۆانىڭ كۇيەۋى اۆلوباس جۇماەۆتى اقتاۋ قالالىق سوتى قىركۇيەكتىڭ 20-cى كۇنى "رۋلىق، الەۋمەتتىك الاۋىزدىق تۋدىردى", "بيلىكتى كۇشتەپ قۇلاتپاق بولدى" دەگەن ايىپتارمان ءۇش جىلعا باس بوستاندىعىنان ايىرعان ەدى. ابلوۆاس جۇماەۆتىڭ ءوزى ايىبىن مويىنداعان جوق.

ناۋرىزدىڭ 13-ىندە استانا سوتى باس پروكۋراتۋرانىڭ ارىزى بويىنشا قۋعىنداعى وپپوزيتسيالىق ساياساتكەر، بۇرىنعى بانكير مۇحتار ءابليازوۆ باسقاراتىن قدت قوزعالىسىن "ەكسترەميستىك ۇيىم” دەپ تانىپ، قىزمەتىنە تىيىم سالعان.

Abai.kz