الماتى اكىمى باۋىرجان بايبەك جۇمىس ساپارى كەزىندە قايتا جاساۋ جۇمىستارى ءجۇرىپ جاتقان «يۋجنىي» ساياباعىن ارالاپ كوردى. ساياباق 14,2 گا اۋماقتى الىپ جاتقان جاروكوۆ كوشەسىنىڭ شىعىسى مەن حودجانوۆ كوشەسىنىڭ سولتۇستىگىنە قاراي ورنالاسقان.

قالانىڭ تابيعي رەسۋرستار جانە تابيعاتتتى پايدالانۋدى رەتتەۋ باسقارماسىنىڭ باسشىسى اسەت ماساباەۆ مەردىگەردىڭ ساياباقتى رەكونسترۋكتسيالاۋدى ۇزاققا سوزۋى كونكۋرسقا قاتىسقان ءبىر كومپانيانىڭ بەرگەن ارىزىنىڭ سالدارىنان تۋىنداعانىن،ونىڭ ۇستىنە تۇرعىنداردىڭ ۇسىنىستارى ەسكەرىلە وتىرىپ، جوباعا تۇزەتۋلەر ەنگىزىلگەنىن، ساراپتاماعا قايتا جىبەرىلگەنىن ايتتى.

بۇرىندارى مەگاپوليس اكىمى تۇرعىنداردىڭ تالاپتارىن ەسكەرە وتىرىپ جوباعا قاجەتتى وزگەرىستەر ەنگىزۋدى تاپسىرعان بولاتىن.

«مۇندا تۇرعىنداردىڭ بارلىق توپتارىنا: ارباداعى بالاسىن سۇيرەگەن انالارعا، بالدىرعاندارعا، تىنىشتىقتى قالايتىن قارت ادامدارعا بارىنشا ىڭعايلى جاعدايلار جاسالۋى ءتيىس. بۇل كوڭىل كوتەرەتىن ساياباق ەمەس، ادامدار مۇندا تىنىعۋعا كەلەدى، سوندىقتان اسفالتتى الاڭدى ازايتىپ، بۇرىننان بار جولدار مەن سۇرلەۋلەردى جاڭارتىپ، جايلى كولەڭكەلى كەڭىستىك جاساپ، ارحيتەكتۋرالىق ۇلكەن پىشىندەردىڭ ورنىنا شاعىن جارىق كوزدەرىن پايدالانعان ءجون»، - دەگەن ەدى باۋىرجان بايبەك.

قازىرگى كەزدە ساياباقتا كەسپە تاس توسەلۋدە، 14 كم جەردى سۋاراتىن سۋ قۇبىرى تارتىلۋدا.كەلەسى اپتادان باستاپ جارىق كوزدەرىنىڭ 180 باعاناسى ورناتىلادى. اۋدان تۇرعىندارىنىڭ تىلەگى بويىنشا كوشە جيھازى، ستاتسيونارلى دارەتحانا، يتتەردىڭ جانە وزگەلەردىڭ كىرىپ كەتپەۋى ءۇشىن قورشاۋ قويىلادى.

«بارلىق جۇمىستار ءبىر ايدىڭ ىشىندە ساپالى اياقتالۋى ءتيىس. بۇل ساياباققا تەك وسى اۋداننىڭ عانا ەمەس ،وزگە اۋداننىڭ تۇرعىندارى دا سەرۋەندەپ، دەمالۋعا كەلەدى»، - دەدى باۋىرجان بايبەك.

ايتا كەتەرلىگى، بۇرىندارى اۋدان تۇرعىندارىنىڭ الماتى اكىمىنە جاساعان ۇسىنىسى نەگىزىندە «TURKUAZ GROUP OF COMPANIES» كومپانياسى «نۇر وتان» پارتياسىنىڭ تۇعىرناماسىندا «يۋجنىي» ساياباعىندا تۇرعىن كەشەنىن سالۋدان ءوز ەركىمەن باس تارتىپ، ساياباقتىڭ سولتۇستىك بولىگىندەگى جەر تەلىمىن مەملەكەتكە قايتارعان بولاتىن.