پارلامەنتتىڭ تومەنگى پالاتاسىندا  «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تانىستىرىلىمى ءوتتى.

تانىستىرىلىمعا ءماجىلىستىڭ ەكونوميكالىق رەفورما جانە وڭىرلىك دامۋ كوميتەتىنىڭ توراعاسى نۇرتاي سابيليانوۆ توراعالىق ەتتى.

ۇسىنىلىپ وتىرعان تۇزەتۋلەرمەن ينۆەستيتسيالار جانە دامۋ ۆيتسە-ءمينيسترى تيمۋر توقتاباەۆ تانىستىردى.

زاڭ جوباسى جولاۋشىلاردى تاسىمالداۋ بويىنشا كورسەتىلەتىن قىزمەتتى دامىتۋ ءۇشىن قولايلى جاعدايلار جاساۋ، كولىكتەگى باقىلاۋ فۋنكتسيالارىن وڭتايلاندىرۋ، ۇلتتىق زاڭنامانى تەڭىز، تەمىرجول جانە اۆتوموبيل كولىگى ماسەلەلەرى بويىنشا حالىقارالىق شارتتاردىڭ تالاپتارىنا سايكەستەندىرۋ، قازاقستان رەسپۋبليكاسىنىڭ اۋماعى بويىنشا تاۋارلاردىڭ وتكىزىلۋىن باقىلاۋدى جەتىلدىرۋ، سونداي-اق كولىك سالاسىنداعى قولدانىستاعى زاڭنامادا قايشىلىقتاردى، ولقىلىقتاردى جانە كولليزيالاردى جويۋ ءۇشىن ازىرلەنگەن.

ەڭ الدىمەن رەسپۋبليكالىق جولدارداعى كولىك قۇرالدارىن جاپپاي توقتاتۋ تاجىريبەسىنەن باس تارتۋ كوزدەلگەن. وسىنداي تەكسەرىستەر جۇرگىزۋ ءۇشىن ناقتى نەگىزدەمە ءتىزىمى ەنگىزىلەدى. تارماقتاردا ارنايى اۆتوماتتاندىرىلعان ولشەۋ قۇرالدارىندا (ااوق) تىركەلگەن زاڭ بۇزۋشىلىقتار; شەتەل كولىك قۇرالدارىنىڭ ءجۇرىپ ءوتۋى; ااقو ارقىلى دۇرىس ءجۇرىپ وتپەۋ; كولىك قۇرالىنىڭ ۋاكىلەتتى ورگاندا تىركەلمەۋى; مەملەكەتتىك ورگاندارمەن بىرەگەي شارالار وتكىزۋ سياقتىت ماسەلەلەر قامتىلعان.

بۇل ءتارتىپتى ەنگىزۋ 100 مىڭ اۋىر جۇك كولىكتەرىن توقتاتۋدى قىسقارتۋعا، كولىكتىڭ ءجۇرۋ جىلدامدىعىن ارتتىرۋعا جانە سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى، دەپ جوسپارلانۋدا.

سونىمەن قاتار، ااوق جۇيەسىنەن الىنعان مالىمەتتەر تاسىمالداۋشىدا رۇقساتتاما قۇجاتتارىنىڭ، تەحنيكالىق بايقاۋدان وتكەن-وتپەگەنىن بىلۋگە جانە تولەنبەگەن ايىپپۇلداردى انىقتاۋعا مۇمكىندىك بەرەدى.

زاڭ جوباسىنىڭ بىرقاتار وزگەرتۋلەرى جولاۋشىلار تاسىمالىنىڭ ساپاسىن ارتتىرۋعا باعىتتالعان. اۆتوموبيل كولىگى تۋرالى زاڭنىڭ نورمالارى تۇراقتى حالىقارالىق رەيستەردى جاساعاندا جولاۋشىلاردى قازاقستان تەرريتورياسى بويىنشا ەلدىمەكەندەر ارالىعىندا تاسىمالداۋعا تىيىم سالادى. ەندى قازاقستاندىق تاسىمالداۋشىلارعا ءبىر شەكارالى وبلىستىڭ ەلدى مەكەندەرى اراسىندا تاسىمال جاساۋ ۇسىنىلىپ وتىر. بۇل 300 ەلدى مەكەننىڭ جولاۋشىلارىن تۇراقتى تاسىمالداۋعا قوسىمشا مۇمكىندىك بەرەدى.

جولاۋشىلار مۇددەسىن قورعاۋ جانە ءموبيلدى قوسىمشانى پايدالاناتىن 50 مىڭ جاسىرىن تاسىمالداۋشىلاردى «كولەڭكەدەن» شىعارۋ ماقساتىندا اۆتوموبيل كولىگى تۋرالى زاڭدا «تاكسيمەن تاسىمالداۋ» ۇعىمىن ەسكەرۋ ۇسىنىلىپ وتىر. وسىلايشا كولىكتى جالداۋ شارتىن قۇرىپ، «ياندەكس.تاكسي»، Uber, InDriver سياقتى سەرۆيستەر ارقىلى جولاۋشىلاردى تاسىمالداۋ ەندى تاكسيمەن تاسىمالداۋعا جاتاتىن بولادى.

تەمىرجول جانە سۋ كولىگى سالاسىندا كوميسسيا قۇرىپ، تەرگەۋ وتكىزۋ بويىنشا ۋاكىلەتتى ورگاننىڭ قۇزىرەتىن جانە تەرگەۋ بويىنشا وكىلدىڭ مىندەتتەرىن رەتتەۋ ۇسىنىلىپ وتىر.

اۆتوموبيلدەردىڭ پايدالانۋ قاۋىپسىزدىگىن ارتتىرۋ ءۇشىن جول قوزعالىسى زاڭىندا «مىندەتتى تەحنيكالىق بايقاۋ بىرگەي اقپارات جۇيەسىنىڭ وپەراتورى» ۇعىمىن بەلگىلەۋ قاجەتتىلىگى جانە ونىڭ مىندەتتىن رەتتەۋ جونىندە ماسەلە كوتەرىلىپ وتىر. بۇدان بولەك، كولىك سالاسىندا ۋاكىلەتتى ورگاننىڭ قۇزىرەتىنە «تەحنيكالىق بايقاۋ» جۇيەسىمەن اقپاراتتىق ءىس-قيمىل جاسايتىن ارنايى باعدارلامالارعا قويىلاتىن تالاپتاردى بەكىتۋدى ەنگىزۋ ۇسىنىلىپ وتىر.

بۇل تەحنيكالىق بايقاۋدان وتكەن كەزدە جالعان دياگنوستيكالىق كارتالاردى بەرۋ مۇمكىندىگىن جويادى.

حالىقارالىق تەڭىز ۇيىمى ءاۋديتىنىڭ ەسكەرتپەلەرىن جويۋ اياسىندا بىرقاتار حالىقارالىق كونۆەنتسيالار تالاپتارىن يمپلەمەنتاتسيالاۋ نورمالارىن قاراستىرۋ كوزدەلىپ وتىر. كەمەلەر تەكسەرىسىن وپتيميزاتسيالاۋ ماقساتىندا مىندەتتى بايقاۋدى التى ايدا ءبىر رەت وتكىزۋ جوسپارلانىپ وتىر. زاڭ جوباسى 6 زاڭعا وزگەرىستەر مەن تولىقتىرۋلار ەنگىزۋدى كوزدەيدى.

شاراعا قازاقستان رەسپۋبليكاسى پارلامەنتىنىڭ دەپۋتاتتارى، مۇددەلى مەملەكەتتىك ورگاندار مەن قوعامدىق بىرلەستىكتەر، ساراپشىلار جانە ۇكىمەتتىك ەمەس ۇيىمداردىڭ وكىلدەرى قاتىستى.

ەندى جاڭا كولىك ماسەلەلەرى بويىنشا زاڭ جوباسى ءماجىلىس دەپۋتاتى، ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى - پاۆەل كازانتسەۆ جەتەكشىلىك ەتەتىن جۇمىس توبىندا قارالاتىن بولادى.

Abai.kz