مەملەكەتتىك تۋدى قادىرلەۋ - ءار قازاقستاندىقتىڭ پارىزى. دەسە دە، سوڭعى جىلدارى تۋىمىزدى اياق استىنا تاستاپ، قوقىس تاسيتىن جاعدايلار ورىن الاتىن بولدى. الەۋمەتتىك جەلىدە تاعى دا قازاقستاننىڭ تۋمەن قوقىس شىعارىپ جاتقان سۋرەت تارادى.

سۋرەتتە جەردە جاتقان تۋدىڭ ۇستىندە ءبىر ازاماتتىڭ جۇرگەنى انىق كورىنەدى. جانىندا قوقىس پەن قۇلاپ جاتقان قوقىس جاشىگى بەرىلگەن. ارينە، بۇل سۋرەتتىڭ قانداي جاعدايدا، كىمنىڭ تۇسىرگەنى بەلگىسىز. دەسە دەن مەملەكەتتىك رامىزدەر تۋرالى زاڭ اياسىندا كىنالى ادامدار جازاسىن الۋ كەرەك دەپ ويلايمىز.

بۇعان دەيىن شىمكەنتتە دە ءدال وسىنداي وقيعا بولدى. شىمكەنت قالاسى ءال-فارابي اۋداندىق سوتىنىڭ 08.07.2015 جىلعى ۇكىمىمەن تالعات بيبولات پەن گاۋھار كالدىباەۆا قازاقستان رەسپۋبليكاسى قىلمىستىق كودەكسىنىڭ 372-بابىمەن كىنالى دەپ تانىلىپ، ەكى ازاماتقا وسى باپ بويىنشا 100 ايلىق ەسەپتىك كورسەتكىش، ياعني 198 200 تەڭگە مولشەردە ايىپپۇل سالۋ جازاسى تاعايىندالعان ەدى.

2016 جىلى ولگا شۋميلوۆا اتتى قوستانايلىق ايەل مەملەكەتتىك تۋدى قوقىسقا تاستاعانى ءۇشىن قوعام سىنىنا ءتۇستى. قوستانايلىق ايەل حالىقتان كەشىرىم سۇراپ، قاتاڭ سوگىسپەن جازادان قۇتىلدى.

مۇنداي جايدىڭ ءبارىن ءتىزىپ وتىرۋعا پەيىلدى ەمەسپىز. دەسە دە، 2015 جىلى استانا قالاسىنىڭ تۇرعىنى جاندوس قۇرمانباەۆ گەننادي گولوۆكين جەڭىسىنىڭ قۇرمەتىنە بالكونىنا كوك تۋىمىز جەلبىرەتىپ ءىلىپ قويعانى ءۇشىن 400 مىڭ تەڭگە ايىپپۇل تولەۋگە ءماجبۇر بولعانىن ەل ۇمىتا قويعان جوق.

كوك تۋمەن قوقىس تاسىعاندار قاتاڭ سوگىسپەن ءھام 198 مىڭ ايىپپۇلمەن قۇتىلىپ جاتقاندا بالكونىنا قاستەرلەپ ىلگەن ازامات 400 مىڭ تەڭگەسىنەن قاعىلعان ەدى.

تۋ – قاي زاماندا دا قاسيەتتى دۇنيە. ول ۇلتتىق نامىس، مەملەكەتتىك نىشان. تۋدىڭ بيىك تۇرعانى حالىق ابرويىنىڭ سيمۆولى. سوندىقتان دا، بۇگىنگى جاعدايدى قۇزىرەتتى ورگاندار تەكسەرىپ، كىنالىلەردىڭ جازاسىن بەرۋى كەرەك. ول جازا شىنايى پاتريوت  جاندوس قۇرمانباەۆتىڭ جازاسىنان اۋىر بولماعى ءلازىم.

ءشارىپحان قايسار

Abai.kz