كەڭەس وكىمەتىنىڭ كەزى بولسا كەرەك. سىر سۇلەيلەرىنىڭ سارقىتى، اتاقتى جىراۋ الماس الماتوۆتىڭ ۇيىنە ءبىر تۋىسقان جاماعايىنى كەلەدى. قالاعا كەلگەن. قالتاسىنداعى قارجىسىن جاراتىپ قويىپ، اۋىلىنا قايتاتىن اقشاسى قالماپتى. الماس اعانى ارقا تۇتىپ، تابان تىرەپ كەلىپ وتىرعان بەتى ەكەن. ءشاي ىشىلەدى. تاماق جەلىنەدى. تۋىسقانى شارۋاسىن ايتادى. الماس اعا 50 سوم بەرەدى.
- اينالايىن، الماسجان-اۋ، مىناۋىڭ كوپ قارجى. ماعان اۋىلعا جەتەتىن عانا اقشا كەرەك. ونىڭ ۇستىنە مۇنى قايتارۋدىڭ ءوزى قيىنعا سوعادى.
- اعا، قايتارامىن دەپ اۋرە بولماڭىز. ءىنىڭىزدىڭ ءىلتيپاتى دەپ بىلەرسىز.
- جوق، قاراعىم، ءار نارسەنىڭ قايتارىمى بولادى. مەن قارىز سۇراي كەلىپ وتىرمىن عوي.
"اعا، اۋىلعا بارعاننان كەيىن مىنا بالانىڭ ەنشىسى دەپ قوزىعا ەن سالا سالىڭىز، قايتارىمى سول بولسىن",- دەپتى الەكەڭ بالاسىن نۇسقاپ. اڭگىمە وسىمەن ءتامام. ارادا ءبىراز ۋاقىت وتەدى. كەڭەس وكىمەتى قۇلايدى. تاۋەلسىزدىك ورنايدى. كەشەگى ەكى بالا جىگىت بولىپ، ات جالىن تارتىپ مىنەدى. كۇندەردىڭ كۇنى بولعاندا جاڭاعى اعاسىنىڭ دەنساۋلىعى سىر بەرىپ، قالاعا ەمدەلۋگە كەلەدى. وندا دا الماس اعاعا "اۋرۋحاناعا جاتۋعا كومەكتەس" دەگەن وتىنىشپەن كەلسە كەرەك. زىر جۇگىرىپ شارۋاسىن رەتتەپ بەرەدى. ءسوز اراسىندا ۇلدىڭ بىرەۋى ۇيلەنەتىنىن، سونىڭ قات-قابات تىرشىلىگىمەن جۇرگەنى، قارجىدان تارشىلىق كورىپ قالىپ جاتقانى ايتىلادى. سوندا اعاسى "الماسجان-اۋ، ءبىزدىڭ ۇيدە بالالاردىڭ ەنشىسى بار عوي. سول مالدى نەگە المايسىڭ؟ قاجەتىڭە جارايدى عوي",- دەپتى.
- ول قانداي ەنشى، اعا؟
- اينالايىن-اۋ، باياعىدا وزىڭنەن اقشا الىپ، اقىسىنا ەكى قوزىعا ەن سالدىم. سول ەكى قوزىڭ بۇگىندە 80 باس قويعا اينالدى. جيىرماعا تارتا سيىر بار.
الماس اعا اڭ-تاڭ. ءوزى بىلمەيتىن ءبىر وتارعا جۋىق مالى بار ەكەن.
- اعا، قويدىڭ جايى بەلگىلى بولدى. سيىرى نەسى؟
- الماسجاننىڭ ۇيىندەگى بالداردىڭ ەنشىسى بولسىن دەپ بۇزاۋعا ەن سالعام. سونىڭ كوبەيگەنى عوي. مالىڭنىڭ باسى امان. ءبارى ورنىندا تۇر. كولىگىڭدى جىبەر دە، الىپ كەتە عوي.
سودان الماس اعا مالىن الدىرتىپ، بالانىڭ تويىن وتكىزىپتى.
وسى اڭگىمەنى ەستىگەندە تاڭ-تاماشا بولدىق. قازاقتىڭ وقىماعان قاراپايىم اقساقالىنىڭ ادالدىعىنا سۇيسىندىك. اماناتقا ادالدىق. قانشا ۋاقىت وتسە دە مالدىڭ باسىنا تيىسپەي، ءوز دۇنيەسىنەن ارتىق كورىپ باعىپ، وسىرگەنى. بۇگىندە وقىعان قازاقتار ءبىرىن-ءبىرى الداپ، ءبىرىنىڭ اۋزىنداعى نەسىبەسىن ەكىنشىسى ءىلىپ كەتىپ جاتقان زاماندا مىنانداي ىرىلىكتى، كىسىلىكتى اڭسايدى ەكەنسىڭ. بىزگە سىرتتان ادامدىقتىڭ، ادالدىقتىڭ ۇلگىسىن ىزدەپ كەرەگى جوق. وزىمىزدە بار، بولعان دۇنيەنى قايتا تىرىلتسەك تە تالاي جاقسىلىققا جولىعار ەدىك قوي...

ەرجان بايتىلەستىڭ facebook پاراقشاسىنان

Abai.kz