شەنەۋنىكتەر ەندى كورپەسىنە قاراي كوسىلىپ، مەملەكەتتىڭ اقشاسىن ءجونسىز شاشپاۋعا ءتيىس. ەڭ ۇلكەن ءدجيپتى ءمىنىپ، ەڭ ۇلكەن كابينەتتە وتىرماسا ءوزىن قور سەزىنەتىن مەنتاليتەتتەن ارىلۋى كەرەك.

جۇمىس بابىنداعى ساپارمەن قاراعاندى وبلىسىنا بارعان قاسىم-جومارت توقاەۆ ايماقتىڭ اتقامىنەرلەرى مەن يگى جاقسىلارى جينالعان باسقوسۋدا وسى ماسەلەنى توتەسىنەن قويدى.

-قارجى الەۋمەتتىك ماڭىزى بار جوبالاردى ىسكە اسىرۋعا باعىتتالۋى ءتيىس. قارجىنى ۇنەمدەۋگە ەرەكشە نازار اۋدارىلۋى قاجەت. ەندى قىمبات قىزمەت كولىكتەرى، جوعارى لاۋازىمدى شەنەۋنىكتەردىڭ اتشاپتىرىم كابينەتتەرى مەن باسقا دا ۇستەمدىك كورسەتكىشتەرى كونەنىڭ كوزى سەكىلدى تاريح قويناۋىنا كەتەتىن كەزى الىس ەمەس ،- دەدى سەنات توراعاسى.

سولاي بولعاي. ەۋروپانىڭ تالاي جەرىندە بولدىق. كابينەتتەرى جۇپىنى عانا. كولىكتەرى دە قاراپايىم. ال بىزدە جاڭا وبىلىس، ءتىپتى جاڭا اۋدان اشىلسا، بار جۇمىس ساۋلەتتى اكىمشىلىك عيماراتىنان باستالادى. ۇنەمشىل بولۋ تۋرالى وتكەندە ەلباسى دا ايتتى جولداۋىندا. ەندىگى ماسەلە وسى قاراپايىمدىلىق پەن ۇنەمشىلدىكتى شەنەۋنىكتەردەن ءسىز بەن ءبىزدىڭ تالاپ ەتۋىمىزگە بايلانىستى بولماق.

ادىلبەك قابا

Abai.kz