بەيسەنبى, 25 شىلدە 2024
ساڭلاق 5388 7 پىكىر 25 قازان, 2018 ساعات 10:37

«كوكپار» فەدەراتسياسىن ەندى مۇحتارحان دىلدابەكوۆ باسقارادى

بيىل كۇزدە باسى داۋعا قالعان «كوكپار» فەدەراتسياسى مەن رەسپۋبليكالىق «اۋدارىسپاق» فەدەراتسياسىنا جاڭا باسشى تاعايىندالدى.

قر ۇلتتىق سپورت قاۋىمداستىعى ءباسپاسوز قىزمەتىنىڭ حابارلاۋىنشا، اتالعان قاۋىمداستىق قۇرامىنداعى رەسپۋبليكالىق «كوكپار» جانە «اۋدارىسپاق» فەدەراتسيالارىنىڭ باسشىلىق قۇرامىنا وزگەرىستەر ورىن العان.

قۇرىلتايشىلاردىڭ جالپى جينالىسىنىڭ حاتتاماسىنا سايكەس، رەسپۋبليكالىق «كوكپار» فەدەراتسياسىنىڭ پرەزيدەنتى بولىپ دىلدابەكوۆ مۇحتارحان قوبىلانبەكۇلى، ال رەسپۋبليكالىق «اۋدارىسپاق» فەدەراتسياسىنىڭ پرەزيدەنتى بولىپ قوبىلاندين دانيار جاڭابايۇلى تاعايىندالدى.

داڭقتى بوكسشى مۇحتارحان دىلدابەكوۆ ەسىمى سپورتسۇيەر قاۋىمعا جاقسى تانىس. ەكى وليمپيادا ويىندارىندا باق سىناعان، سيدنەي وليمپياداسىنىڭ كۇمىس جۇلدەگەرى، ءحىى ازيا ويىندارىنىڭ جەڭىمپازى، ءحىV ازيا ويىندارىنىڭ كۇمىس جۇلدەگەرى، الەم چەمپيوناتىنىڭ  كۇمىس  جۇلدەگەرى اتانعان اتاقتى بوكسشىنىڭ ۇلكەن سپورتقا دەيىن دودابۇزار كوكپارشى بولعانىن ايتا كەتەيىك.

مۇحتارحان دىلدابەكوۆ 1976 جىلى تۇركىستان وبلىسى ماقتارال اۋدانى، اباي اۋىلىندا دۇنيەگە كەلگەن. قازاقستان رەسپۋبليكاسىنىڭ ەڭبەك سىڭىرگەن سپورت شەبەرى.  بىلىمى جوعارى. م.اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتى، ق.ا.ياساۋي اتىنداعى حالىقارالىق قازاق -تۇرىك ۋنيۆەرسيتەتىن تامامداعان. «پاراسات» وردەنىنىڭ يەگەرى،  وڭتۇستىك قازاقستان وبلىسىنىڭ قۇرمەتتى ازاماتى.

بوكس قولعابىن شەگەگە ىلگەن 2006 جىلدان مۇحتارحان دىلدابەكوۆ شىمكەنت قالاسىنىڭ №5 بوكستان وليمپيادا رەزەرۆىنىڭ ماماندىرىلعان بالالار مەن جاسوسپىرىمدەر سپورت مەكتەبىنىڭ ديرەكتورى، 2008 جىلدان وسى ۋاقىتقا دەيىن «وڭتۇستىك قازاقستان وبلىسىنىڭ بوكستان وليمپيادا رەزەرۆىن دايىندايتىن بالالار مەن جاسوسپىرىمدەردىڭ ماماندىرىلعان سپورت مەكتەبىنىڭ» ديرەكتورى قىزمەتتەرىن اتقارىپ كەلدى.

الايدا، ات جالىن تارتىپ مىنگەننەن كوكپارقۇمار بولعان مۇحتارحان دىلدابەكوۆ وسى جىلدار ارالىعىندا وڭتۇستىك وڭىردە ءجيى ۇيىمداستىرىلاتىن جاپپاي كوكپاردىڭ دوداسىنان دا الىس كەتكەن ەمەس. سوندىقتان بولار، اتاقتى بوكسشىنىڭ كوكپارشىلىعى تۋرالى كەزىندە بۇقارالىق اقپارات قۇرالدارىندا كولەمدى ماقالالار مەن سۇحباتتار  از جاريالانعان جوق.

ال، رەسپۋبليكالىق «اۋدارىسپاق» فەدەراتسياسىنىڭ پرەزيدەنتى بولىپ تاعايىندالعان قوبىلاندين دانيار جاڭابايۇلى 1984 جىلى الماتى قالاسىندا دۇنيەگە كەلگەن.  بىلىمى جوعارى. ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ، قر پرەزيدەنتى جانىنداعى مەملەكەتتىك باسقارۋ اكادەمياسىنىڭ تۇلەگى. ەڭبەك جولىن اقتوبە وبلىسى پروكۋراتۋراسىنان باستاعان. قر كولىكتىك باقىلاۋ كوميتەتىندە، قر پرەزيدەنت اكىمشىلىگىندە، الماتى قالاسى اكىمدىگىندە قىزمەت ەتكەن. قازىرگى كەزدە جەكە كاسىپكەر.

Abai.kz

 

7 پىكىر

ۇزدىك ماتەريالدار

اباي مۇراسى

اباي ىلىمىندەگى ءومىر ماقساتى نە؟

دوسىم وماروۆ 1429
وي تۇرتكى

المەرەك ابىزدىڭ ورالۋى - ەلگە ءدىننىڭ ورالۋى

باقتىباي اينابەكوۆ 2263
كورشىنىڭ كولەڭكەسى

رەسەي تىلدىك ءھام ساياسي ەكسپانسيانى قالاي جۇرگىزدى؟

بەيسەنعازى ۇلىقبەك 2298