«تەلەۆيدەنيە ادامنان دا قىزىعىراق، ولاي بولماسا تورىمىزدە تەلەديدار ەمەس، ادام تۇرار ەدى» دەپتى ءبىر دانىشپان. راسىندا مىنا زاماندا تەلەديدار كورەتىن ادام از دەسەك تە، كوك جاشىككە اراگىدىك كوز سالاتىنىمىز جاسىرىن ەمەس. اسىرەسە، سوڭعى كەزدە ينتەللەكتۋالدى باعىتتاعى باعدارلامالار سانى كوبەيدى. بيىل كوزىقاراقتى كورەرمەنگە «ميلليون كىمگە بۇيىرادى؟» باعدارلاماسى جول تارتتى.

وسىدان 20 جىل بۇرىن ۇلىبريتانيادا «Who wants to be a millionaire» جوباسى جارىق كوردى. سول ساتتەن باستاپ بريتاندىق فورمات الەمنىڭ تۇكپىر-تۇكپىرىنە تارادى. بۇگىندە «ميملليون كىمگە بۇيىرادى» باعدارلاماسىن الەمنىڭ 120 ەلىندە كورسەتەدى. ال تمد ەلدەرىنىڭ ىشىندە بۇل فورمات رەسەيدە جانە قازاقستاندا عانا كورەرمەنگە ۇسىنىلعان. 2000 جىلدارى باعدارلاامنىڭ الدىمەن ورىسشا، سونان سوڭ قازاقشا نۇسقاسى كورسەتىلگەن ەدى. سەرىك اكيشەۆ پەن ەسكەندىر سەرگەباەۆ سىندى تەلەجۇرگىزۋشىلەردى حالىققا تانىتقان دا وسى جوبا. ەل بولىپ ءار ويىنشىنىڭ ميلليونەر اتانۋىنا تىلەكشى بوپ وتىراتىن ەدىك. بىراق 5-6 جىلدىق كورسەتىلىمنەن سوڭ باعدارلاما جابىلىپ قالدى.

 وتكەن جىلى سەرىك اكيشەۆپەن بىرگە «كتو ۆوزمەت ميلليون» جوباسى كورەرمەنگە قايتا ۇسىنىلدى. سول ساتتە «قاپ، نەگە الدىمەن قازاقشاسىن كورسەتپەيدى» دەپ قىنجىلعانىمىز بار ەدى. الايدا اراعا ءبىر جىل سالىپ، «حابار» ارناسى سۋپەر شوۋدىڭ قازاقتىلدى نۇسقاسىن كورەرمەن نازارىنا ۇسىنىپ وتىر. ارينە، بۇرىنعى جۇرگىزۋشى ەسكەندىر سەرگەباەۆ جوق، قازىر باعدارلاما تىزگىنى  تانىمال جۋرناليست دوسىمبەك وتەعاليەۆتىڭ قولىندا. وسى ۋاقىتقا دەيىن باعدارلامانىڭ 6 شىعارىلىمى جارىق كوردى، الايدا ويىنشىلار 90 مىڭ تەڭگەدەن ارىعا اسا الماي وتىر. بىراق الداعى ۋاقىتتا ءبىلىمى مەن اقىلىنا سەنىپ كەلگەن ويىنشىلار 10 ميلليون تەڭگەنىڭ يەسى اتانادى دەپ سەنەمىز. «راسىندا، باستاپقىدا ۇتىس سوماسى از بولدى. دەي تۇرعانمەن بىرتە-بىرتە 300 مىڭ، 600 مىڭ ۇتقان ويىنشىلار كوبەيىپ كەلەدى. الداعى ۋاقىتتا 10 ميلليوننىڭ يەسى تابىلادى دەپ سەنەمىز. ءبىر قىزىعى، حالىقتىڭ باعدارلاماعا دەگەن قىزىعۋشىلىعى جاقسى، ءبارىمىز بىردەن ميلليونەر اتانعىمىز كەلەدى عوي، بىراق وعان جەتۋ ءۇشىن ميدى ىسكە قوسىپ، بىلىمگە سۇيەنۋ كەرەك» دەيدى باعدارلاما پروديۋسەرى ايگەرىم دوسىم.

ايتپاقشى، باعدارلاماعا قاتىسۋ ءتارتىبى وڭاي. باعدارلاما پروديۋسەرلەرىنىڭ ايتۋىنشا، ميلليونەر اتانعىسى كەلەتىن ادام  ك1 كىلتسوزىن 3698 قىسقان نومەرىنە سمس ارقىلى جولداۋ كەرەك. سونان سوڭ ويىنشى بەرىلگەن سۇراقتىڭ دۇرىس جاۋابىن سمس ارقىلى 9684 نومەرىنە جولدايدى.  جاۋاپ دۇرىس بولسا، ويىنشىنىڭ نومەرى ورتاق جۇيەگە تىركەلەدى. ارنايى گەنەراتور تىركەلگەن نومەرلەردىڭ ىشىنەن 300 نومەردى ىرىكتەپ الادى. سول 300 نومەرگە رەداكتورلار قوڭىراۋ شالىپ، 5 سۇراق قويادى. ەسكەرە كەتۋ كەرەك، 5 سۇراققا مۇدىرمەي جاۋاپ بەرگەن ويىنشى عانا ستۋدياعا شاقىرىلادى.

حالىقارالىق دەڭگەيدەگى تەلەۆيزيالىق فورمات بولعاندىقتان، «ميلليون كىمگە بۇيىرادى» سۋپەر شوۋىنىڭ ءتارتىبى مەن ەرەجەسىندە بالەندەي وزگەرىس جوق. بىراق بيىل جۇلدە قورى 10 ميلليون تەڭگەگە تەڭ بولىپ وتىر. بۇل باعدارلامانىڭ رەسەيلىك نۇسقاسىن كورىپ جۇرگەن كورەرمەن جاقسى بىلەتىن شىعار، دميتري ديبروۆ تىزگىندەگەن شوۋعا تەك ونەر ادامدارى قاتىسىپ ءجۇر جانە ەرەجە مەن ستۋديا دەكوراتسياسىنا بىرقاتار وزگەرتۋلەر ەنگىزىلگەن. ال ءبىز  باعدارلامانىڭ كلاسسيكالىق فورماتىنان ەش اۋىتقىعان جوقپىز. ياعني، ويىنشى قاراپايىم حالىقتىڭ اراسىنان تاڭدالادى، ءۇش جەڭىلدىك بەرىلەدى، ون بەس سۇراق قويىلادى. ەگەر ويىنشى بىلىمىنە سەنىپ كەلسە، ون بەس سۇراققا مۇدىرمەي جاۋاپ بەرسە، 10 ميلليون تەڭگەنىڭ يەسى اتانا الادى.

«ميلليون كىمگە بۇيىرادى؟» باعدارلاماسى ءبىلىمدى ازاماتتاردىڭ ميلليونەر اتانۋىنا ىقپال ەتىپ قانا قويمايدى، كورەرمەننىڭ وي-ءورىسىن دامىتۋعا ىقپال ەتەدى. تەلەديدار الدىندا وتىرعان كورەرمەن سۇراققا جاۋاپ بەرۋ ارقىلى ءبىلىم دەڭگەيىن تەكسەرىپ كورەدى، ال مەكتەپ وقۋشىلارى مەن ستۋدەنتتەر بۇرىن سوڭدى بىلمەگەن اقپاراتقا قانىق بولادى. ماقساتىمىز – ويىنشىلاردىڭ ءبىلىم دەڭگەيىن تەكسەرىپ كورۋ عانا ەمەس، ءار كورەرمەننىڭ زياتكەر بولۋىنا اتسالىسۋ. ءار سەنبىدە ساعات 20:15-تە «حابار» ارناسىن قوسىپ، «ميلليون كىمگە بۇيىرادى؟» باعدارلاماسىن كورۋدى ۇمىتپاڭىز. ەلىمىزدە ميلليونەرلەر كوپ بولسىن»، - دەيدى ايگەرىم دوسىم.

Abai.kz