قازاقستان ۇكىمەتى بىرەر كۇن بۇرىن ارنايى قاۋلى شىعارىپ، باس پروكۋراتۋرا، ۇلتتىق قاۋىپسىزدىك كوميتەتى، ىشكى ىستەر مينيسترلىگى مەن قورعانىس مينيسترلىگىنە ينتەرنەتتى بۇعاتتاۋ قۇقىعىن بەرگەن. قاۋلىعا سايكەس، اتالعان مەملەكەتتىك ورگاندار وكىلەتتى ورگانمەن ءوزارا ارەكەت ەتە وتىرىپ، "الەۋمەتتىك، تابيعي جانە تەحنوگەندىك سيپاتتاعى قاۋىپ تونگەندە نەمەسە توتەنشە جاعداي بولعاندا" ۇكىمەت مەن پرەزيدەنت بايلانىسىنان باسقا ينتەرنەت پەن بايلانىس جۇيەسىن توقتاتۋعا قۇزىرەتتى بولادى. قۇجات وتكەن جەكسەنبىدە، 28 قازاندا كۇشىنە ەنگەن.

ۇكىمەت وتىرىسىنان كەيىن جۋرناليستەر ساۋالدارىنا جاۋاپ بەرگەن ىشكى ىستەر ءمينيسترى قالمۇحانبەت قاسىموۆ "بۇل تۋرالى زاڭدى جاريالايمىز، سودان وقيسىزدار. بۇل بىزگە عانا ەمەس، ۇلتتىق قاۋىپسىزدىك كوميتەتىنە دە قاتىستى" دەپ قانا جاۋاپ بەردى.

ال اقپارات جانە كوممۋنيكاتسيا ءمينيسترى داۋرەن اباەۆ "مۇنداي جاعداي بولىپ قالعاندا مىندەتتى تۇردە (بايلانىستى - رەد.) وشىرەدى دەگەن ءسوز ەمەس، قاراستىرادى دەگەن. مۇمكىندىك بەرىلۋى مۇمكىن. ول ەندى قاۋلى عوي. سوندىقتان وسى ماسەلەنى تولىق قاراپ، جاۋابىمدى بەرەمىن" دەدى.

قورعانىس ءمينيسترى نۇرلان ەرمەكباەۆ ازاتتىق تىلشىسىنە "بۇل شەشىم تۋرالى ناقتى ايتا المايمىن. ويتكەنى ول جاڭا قابىلدانىپ جاتىر. بىراق ەگەر شەكارا ايماعىندا توتەنشە جاعداي جاريالاناتىن بولسا، وندا شەكارا ايماعى كومەندانتىنىڭ ينتەرنەتتى بۇعاتتاۋ تۋرالى ۇسىنىس جاساۋعا قۇقىعى بار. بىراق قورعانىس مينيسترلىگىنىڭ ءوزى بۇعاتتاۋعا قۇزىرەتى جوق" دەدى مينيستر.

ەرمەكباەۆ ءتىلشىنىڭ "الەۋمەتتىك سيپاتتاعى توتەنشە جاعداي" دەگەن ءسوز نەنى بىلدىرەدى؟" دەگەن سۇراعىنا "ول زاڭدا جازىلعان" دەپ قانا جاۋاپ بەردى.

قازاقستاندا جىل باسىنان بەرى Facebook, YouTube, Instagram جانە Telegram جەلىلەرىنە كەشكى ۋاقىتتا كىرۋ قيىندايدى. ماۋسىم ايىندا قازاقستاندىق قۇقىق قورعاۋشىلار "الەۋمەتتىك جەلىنى بۇعاتتاۋدى توقتاتۋعا" شاقىرعان. ادام قۇقىقتارى جونىندەگى قازاقستاندىق بيۋرونىڭ تاراتقان مالىمدەمەسىندە ازاماتتار كەز كەلگەن ۋاقىتتا قاجەتتى اقپاراتتى الۋعا قۇقىعى بار دەگەن.

الەۋمەتتىك جەلىلەر شەتەلدە تۇراتىن بۇرىنعى بانكير، استانانىڭ ساياساتىن سىنايتىن وپپوزيتسيالىق ساياساتكەر مۇحتار ءابليازوۆ الەۋمەتتىك جەلىلەر مەن مەسسەندجەرلەر ارقىلى تىكەلەي ەفيرگە شىققان كەزىندە بۇعاتتالادى.

بۇعان دەيىن قازاقستاننىڭ كيبەرقاۋىپسىزدىك سالاسىنداعى مەملەكەتتىك مەكەمەلەر باسشىلارى قازاقستاندىق ينتەرنەت قولدانۋشىلاردىڭ الەۋمەتتىك جەلىلەر مەن مەسسەندجەرلەرگە ارا-تۇرا كىرە الماي قالاتىنىنا بيلىكتىڭ قاتىسى بارىن جوققا شىعارعان.

Abai.kz