تۇركىستان قالاسىنداعى مادەنيەت ۇيىندە «TÚRKISTAN: JAŃA AQPARATTYQ KEŃISTIK» اتتى حالىقارالىق جۋرناليستەر فورۋمى ءوتتى. وعان ەلىمىزبەن قاتار تۇركيا، قىرعىزستان،  ءازىربايجان جانە تاتارستان ەلدەرىنىڭ اقپاراتتىق اگەنتتىكتەرى مەن بەلدى باسىلىمداردىڭ جەتەكشىلەرى، تۇركىستان وبلىسىنداعى باق باسشىلارى مەن وكىلدەرى عالىمدار جانە  ستۋدەنتتەر  قاتىستى.

فورۋمنىڭ ماقساتى – تۇركىستان وبلىسىنىڭ باستى برەندىن قالىپتاستىرۋ، وبلىستىڭ وڭ ءيميدجىن كوتەرۋ، سونداي-اق، تۇركىستان قالاسىن تۇركى الەمىنىڭ رۋحاني ورتالىعىنا اينالدىرۋ، وڭىردەگى يگىلىكتى ىستەردى تۇركى تىلدەس ەلدەردىڭ باق-دا تاراتۋ جانە وزگە مەملەكەتتەرىمەن اقپاراتتىق سالادا ىنتىماقتاستىقتى ارتتىرۋ. سونىمەن قاتار، ءوڭىر جۋرناليستيكاسىن دامىتۋ باعىتىنداعى تىڭ يدەيالار مەن باستامالاردى جۇيەلەۋ دە كوزدەلگەن.

فورۋمنىڭ اشىلۋىندا وبلىس اكىمى جانسەيىت تۇيمەباەۆ ءسوز سويلەدى. ول جيىننىڭ ماڭىزدىلىعىنا توقتالىپ، مەديا كەڭىستىكتى دامىتۋ، كيەلى شاhاردى تۇركى الەمىنىڭ رۋحاني ورتالىعىنا اينالدىرۋ جولىندا وسىنداي كەلەلى كەڭەستەردىڭ وڭ ىقپال ەتەتىنىن ايتتى.

«ەلباسىمىز تۇركىستان قالاسىن تۇركى الەمىنىڭ رۋحاني ورتالىعىنا جانە الەم تۋريستەرى كەلۋگە اسىعاتىن قالاعا اينالدىرۋ جونىندە تاپسىرما بەرگەن بولاتىن. قازاقستان حالقىنا ارناعان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا دا تۋريزم ماسەلەسىنە ەرەكشە توقتالدى. ءتۋريزمدى دامىتۋدا اقپاراتتىق ماڭىزى زور.

بۇگىن شەتەلدىك اقپارات قۇرالدارى وكىلدەرىن، ەلىمىزدىڭ جەتەكشى تەلەارنالارى مەن باسىلىمدارىنىڭ باسشىلارىن، وڭىردەگى رەداكتورلار مەن جۋرناليستەردىڭ باسىن قوسۋداعى ماقساتىمىز دا – بىرلەسىپ جۇمىس ىستەۋگە شاقىرۋ. وبلىستى دامىتۋ ءھام تۇلەتۋ باعىتىنداعى وي-پىكىرلەرىن ءبىلۋ. قالانى كوركەيتۋگە جانە جۋرناليستيكانى دامىتۋعا ارنالعان ۇسىنىستاردى تىڭداۋعا ءازىرمىز. بۇگىندە وبلىس ورتالىعىنا مەملەكەتتىك قىزمەتكەرلەرمەن قاتار بىرقاتار جۋرناليستەر كوشىپ كەلدى. ولار تۇركىستاننىڭ جاڭا جىلناماسىن جازىپ جاتىر. سىزدەردى دە تۇركى الەمىنىڭ رۋحاني ورتالىعىنا جۇمىس ىستەۋگە شاقىرامىن.

بۇگىنگى فورۋم جۋرناليستەر قاۋىمىنا تىڭ سەرپىن بەرىپ، جاڭا شىعارماشىلىق ىزدەنىستەرگە جەتەلەيدى دەپ سەنەمىن. تاجىريبە الماسۋ، پىكىرلەسۋ، اقىلداسۋ ارقىلى جۋرناليستيكا داميدى. فورۋم جۇمىسىنا ساتتىلىك تىلەيمىن!»، – دەدى ج.قانسەيىتۇلى.

وسى فورۋمعا تۇركى تىلدەس ەلدەردەن ارنايى شاقىرىلعان اقپارات قۇرالدارىنىڭ جەتەكشىلەرى مەن وكىلدەرى الداعى ۋاقىتتا وبلىستى حالىقارالىق دەڭگەيدە ناسيحاتتاۋعا ۇلەس قوسپاق. سونداي-اق شىنايى ءارى ساپالى اقپارات ارقىلى ءتۋريزمدى دامىتىپ، ينۆەستيتسيا تارتۋعا كوپ كوڭىل ءبولىپ وتىرعانىن تىلگە تيەك ەتتى.

سونىمەن قاتار، فورۋم بارىسىندا قازاقستانعا بەلگىلى جۋرناليستەر مەن شەتەلدىك باق وكىلدەرى وسىنداي ەركىن پىكىر الاڭىن قۇرۋ اقپارات كەڭىستىگىنىڭ اشىقتىعىن ودان ءارى ارتتىرۋعا مۇمكىندىك بەرەتىنىنە نازار اۋداردى.

باسقوسۋدا  «قازاق گازەتتەرى» جشس-ءنىڭ باس ديرەكتورى ءشامشيدين پاتتەەۆ، «ەگەمەن قازاقستان» رەسپۋبليكالىق گازەتى اكتسيونەرلىك قوعامىنىڭ باسقارما توراعاسىنىڭ ورىنباسارى ايبىن شاعالاق،  «ەل ارنا» تەلەارناسىنىڭ ديرەكتورى ارمان سەيىتمامىت، «انا ءتىلى» گازەتىنىڭ باس رەداكتورى جاناربەك ءاشىمجان، «Tengrinews.kz پورتالىنىڭ باس ديرەكتورى سۇڭقار قارابالين، «جاس قازاق» گازەتىنىڭ باس رەداكتورى سمايل سرايل، «قازاقپارات» حاا باس ديرەكتورىنىڭ كەڭەسشىسى قالامقاس ءابۋوۆا، تۇركيانىڭ «تRT» تەلەكومپانياسىنىڭ قازاقستانداعى وكىلدىگىنىڭ ديرەكتورى ابدۋلحاميت اۆشار، ءازىربايجاننىڭ ITV تەلەراديوكومپانياسىنىڭ قازاقستانداعى وكىلى  ماجيدي فۋزۋلي، قىرعىزستاننىڭ «كابار» ۇلتتىق اقپارات اگەنتتىگىنىڭ ءىت دەپارتامەنتىنىڭ ديرەكتورى كالنۋر جانىباەۆ، تاتارستاننىڭ «تاتار-ينفورم» حالىقارالىق اقپارات اگەنتىگى باس ديرەكتورىنىڭ ورىنباسارى راميس لاتيپوۆ، «زاڭ» مەديا-كورپوراتسيا» جشس باس ديرەكتورى دوسىمبەك قونىسبەك ءسوز سويلەپ، اقپاراتتىق سالانى جەتىلدىرۋ باعىتىنداعى ويلارىن ورتاعا سالدى. تۇركىستان قالاسىن كوركەيتۋ بويىنشا دا  ءوز ۇسىنىس-پىكىرلەرىن ايتىپ، تۇركىستاندىق جۋرناليستەرمەن پىكىر الماستى.

فورۋم اياسىندا تۇركىستان وبلىسى ىشكى ساياسات بارقارماسى مەن شەتەل باسىلىمدارى اراسىندا كەلىسىمدەر مەن مەموراندۋمعا قول قويىلادى. جاڭادان اشىلعان «تۇركىستان مەديا» حالىقارالىق ورتالىعى ارقىلى ەندى  وبلىس  تۋرالى اقپاراتتاردى تۇركى تىلدەس ەلدەردىڭ باق-دا 5 تىلدە ء(ازىربايجان، تۇرىك، وزبەك، قىرعىز، ورىس)  تاراتۋ جونىندە شەتەلدىك باسىلىمدارمەن كەلىسىم جاسالدى. سونداي-اق فورۋمدا  ەلباسى ن.نازارباەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى  جولداۋى مەن  «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋدا باق وكىلدەرىنە دە ۇلكەن جاۋاپكەرشىلىك جۇكتەلەتىنى ايتىلدى.

فورۋمعا قاتىسۋشىلار جۋرناليستيكا سالاسىنداعى سوڭعى جاڭالىقتارعا توقتالىپ، جاڭا اقپارات كەڭىستىگىندە تۇركىستاننىڭ جۋرناليستيكاسى زامان كوشىنەن قالمايتىنىنا سەنىم ءبىلدىردى. كيەلى مەكەننىڭ تۋريستىك جانە رۋحاني الەۋەتىن كوتەرۋدە وسىنداي فورۋمداردىڭ وڭ سەرپىن بەرەتىنىن اتاپ ءوتىپ، اقپارات ايدىنىندا تۇركىستاننىڭ دامۋىنا قولداۋ كورسەتۋگە دايىن ەكەندەرىن جەتكىزدى.

Abai.kz