الماتى اكىمى باۋىرجان بايبەك جۇمىس ساپارى كەزىندە قايتا جاڭارعان ورتالىق مادەني جانە دەمالىس ساياباعىن ارالاپ كوردى. باسقارۋشى كومپانيا جاڭا فونتاندار، بالالار مەن سپورت الاڭدارىن سالۋ ءۇشىن 1,6 ملرد. تەڭگە جەكە قارجىنى ينۆەستيتسيالاعان.

ورتالىق ساياباق اۋماعىندا جارىق باعانالارى، اسفالت توسەنىشتەر، تروتۋار پليتكالارى جاڭارعان، ناۆيگاتسيا ورناتىلىپ، جاسىل جەلەك وتىرعىزىلۋدا. بۇرىن كولىك تۇراعى بولعان جەردە سپورت الاڭدارى، ستريت-ۆوركاۋت، باسكەتبول جانە فۋتبول الاڭدارى، روللەردروم مەن سكەيتودروم پايدا بولعان.

جازعى ساحنانىڭ شىعىس جاعىندا ءتۇرلى ءتۇستى الما باعىمەن ينستاللياتسيالانعان جاڭا فونتان نۇر شاشىپ تۇر. سونىمەن قاتار، 10 جىلى بوس تۇرعان ەسكى سۋبۇرقاق رەكونسترۋكتسيالانعان.

مەملەكەتتىك-جەكە ارىپتەستىك ءپرينتسيپى بويىنشا سوناۋ 90-شى جىلدارى ىستەن شىققان «ۆەلوترەك» قايتا جاسالۋدا. كەلەر جىلدان باستاپ ساياباقتا بالالاردىڭ جاڭا قالاشىعىن قۇرۋ جوسپارلانعان.

مەدەۋ اۋدانىنىڭ اكىمدىگى ورتالىق ساياباققا اپاراتىن گوگول كوشەسىن اباتتاندىرۋ جۇمىستارىن جۇرگىزۋدە. جوندەۋ بارىسىندا تروتۋارلار جاڭارىپ، كوشە جيھازدارى قويىلادى. بۇرىن قالانىڭ تاريحي ورتالىعىن رەكونسترۋكتسيالاۋ كەزىندە قالداياقوۆ كوشەسىنەن جەلتوقسان كوشەسىنە دەيىنگى گوگول كوشەسىنىڭ ءبىر بولىگى جاڭارعان ەدى.

ايتا كەتەرلىگى، جالپى الماتىدا بيىلعى جىلى 524 كوشە جوندەلدى، 1400 ەسكى اۋلا جاڭاردى. 300 كم ارىق سالىندى جانە جوندەلدى، 800 كم ينجەنەرلىك جەلى تارتىلدى.

قالانىڭ بارلىق جەر استى وتپەلى جولدارى جاڭاردى.

جىل اياعىنا دەيىن بارلىق كوشە جارىقتارىنىڭ ۇشتەن ءبىرى جارىق ديودتى جانە ەنەرگيا جيناقتاۋشى شامدارعا اۋىستىرىلادى، ال جاڭا قوعامدىق كولىكتىڭ ۇلەسى 87%-عا جەتەدى.

Abai.kz