مەملەكەت باسشىسى نۇرسۇلتان نازارباەۆ رەسەي فەدەراتسياسى ۇكىمەتىنىڭ توراعاسى دميتري مەدۆەدەۆپەن كەزدەستى، دەپ حابارلايدى اباي-اقپارات اقوردانىڭ سايتىنا سىلتەمە جاساپ.

كەزدەسۋ بارىسىندا تاراپتار ەكى مەملەكەت اراسىنداعى ىنتىماقتاستىقتىڭ نەگىزگى اسپەكتىلەرىن تالقىلادى.

مەملەكەت باسشىسى قازاقستان مەن رەسەي اراسىندا ءوزارا سەنىمگە نەگىزدەلگەن جانە قارقىندى دامىپ كەلە جاتقان ىقپالداستىقتىڭ ستراتەگيالىق سيپاتىن اتاپ ءوتتى.

– جاقىندا پرەزيدەنت ۆلاديمير پۋتينمەن كەزدەستىم. قازاقستان مەن رەسەي اراسىنداعى بايلانىستار ۇلگى ەتۋگە تۇرارلىق. بىزگە وسى قارىم-قاتىناستى ساقتاۋ قاجەت، – دەدى نۇرسۇلتان نازارباەۆ.

سونىمەن قاتار، قازاقستان پرەزيدەنتى ەۋرازيا ەكونوميكالىق وداعى، ۇجىمدىق قاۋىپسىزدىك شارتى ۇيىمى جانە تمد سياقتى حالىقارالىق ۇيىمداردىڭ اياسىندا ەكى ەلدىڭ ءوزارا ىنتىماقتاستىعىن نىعايتۋ ماسەلەلەرىنە توقتالدى.

مەملەكەت باسشىسى قازاقستان مەن رەسەي ۇكىمەتتەرىنىڭ ساۋدا-ەكونوميكالىق قارىم-قاتىناستاردى جانە وڭىرارالىق بايلانىستاردى نىعايتۋ ىسىندە ماڭىزدى ءرول اتقاراتىنىن اتاپ ءوتىپ، ەكى جاقتى ىنتىماقتاستىقتى دامىتۋعا قوسقان ۇلەسى ءۇشىن د.مەدۆەدەۆكە ريزاشىلىق ءبىلدىردى.

رەسەي فەدەراتسياسى ۇكىمەتىنىڭ توراعاسى ەكى مەملەكەت اراسىنداعى ءوزارا ءتيىمدى قارىم-قاتىناستاردىڭ ناتيجەسىندە قازاقستان مەن رەسەي اراسىنداعى ساۋدا كولەمى ارتقانىن ايتتى.

– قازاقستان – رەسەيدىڭ ستراتەگيالىق سەرىكتەسى ءارى وداقتاسى. ءبىزدىڭ قارىم-قاتىناسىمىز اۋقىمدىلىعىمەن جانە تاريحىنىڭ تەرەڭدىگىمەن ەرەكشەلەنەدى. جوعارى دەڭگەيدە وتكىزىلەتىن كوپتەگەن كەزدەسۋلەر، سونداي-اق ۇكىمەتتەرىمىز بەن بيزنەس قوعامداستىقتارىمىز اراسىنداعى جاقسى قارىم-قاتىناستار – سونىڭ دالەلى. ءبىز جىل بويى ءتۇرلى باسقوسۋلاردا ءجيى جۇزدەسەمىز. بۇل – قۋانتارلىق ءجايت. مۇنداي قاتىناستار بولمايىنشا، تولىققاندى ءوزارا ىقپالداستىق ورناتۋ مۇمكىن ەمەس، – دەدى د.مەدۆەدەۆ.

Abai.kz