سوڭعى كەزدە كەيبىر بالاباقشا تاربيەشىلەرىنىڭ جۇگەنسىز كەتكەندىگى تۋرالى اقپارات كوپ. بالانى ۇرىپ-سوعۋ ارقىلى تاربيەلەپ جۇرگەن ولاردىڭ بۇل ارەكەتىن قىلمىسقا بالاۋعا نەگىز بار. ينتەرنەت جەلىسىندە قاپتاپ كەتكەن مۇنداي ورەسكەل جايتتاردىڭ الدىن الۋعا نە كەدەرگى، دەپ حابارلايدى اباي-اقپارات turkystan.kz-گە سىلتەمە جاساپ.

الداعى ۋاقىتتا ءبىلىم جانە عىلىم مينيسترلىگى بالاباقشا تاربيەشىلەرىنىڭ جالاقىسىن 50 پايىزعا دەيىن كوتەرمەك. ول ءۇشىن تاربيەشىلەر ۇلتتىق بىرىڭعاي تەستىلەۋدەن ءوتۋى ءتيىس. وسىلايشا، جاڭارتىلعان مازمۇنمەن جۇمىس ىستەيتىن تاربيەشىگە قوسىمشا اقى تولەنە باستايدى.

بۇل جونىندە ءبىلىم جانە عىلىم ءمينيسترى ەرلان ساعاديەۆ پارلامەنت سەناتى دەپۋتاتتارىمەن كەزدەسۋىندە ايتتى. مينيسترلىك مەكتەپكە دەيىنگى ءبىلىم ساپاسىن كوتەرۋدىڭ جول كارتاسىن دايىنداعان. قازىرگى ۋاقىتتا اتالعان جول كارتا تالقىلاۋعا ۇسىنىلدى.

«بيىل 60 مىڭ مۇعالىم بىزگە كەلىپ، ۇلتتىق تەستىلەۋدەن ءوتتى. 36 مىڭ مۇعالىم جوعارى باعا الىپ، جاڭا بىلىكتىلىككە يە بولدى. سونىمەن ايلىقتارى 30-50 پايىزعا دەيىن كوتەرىلىپ وتىر. ەندى سونىڭ ءبارىن تاربيەشىلەرگە ۇسىنىپ وتىرمىز»، – دەيدى مينيستر.

بىرىڭعاي بىلىكتىلىگىن ارتتىرىپ، ۇلتتىق تەستىلەۋدەن وتكەن تاربيەشىلەردىڭ ايلىقتارى دا 30-50 پايىزعا ارتادى. ەكىنشىدەن، مينيسترلىك بارلىق تاربيەشىلەردى ۆ3 بلوكتان ۆ2 بلوكقا كوتەرۋ ۇسىنىستارىن جانە ەسەبىن دايىنداپ وتىر. كەلەسى جىلى ونى مەملەكەتتىك بيۋدجەتتىك كوميسسياعا ۇسىنباق. سونىمەن قاتار مەكتەپتەردەگىدەي جاڭارتىلعان مازمۇنمەن جۇمىس ىستەيتىن پەداگوگتارعا قوسىمشا اقى تولەۋ قاراستىرىلادى. ءمينيستردىڭ دەرەگىنشە، بۇگىنگى تاڭدا بالاباقشالاردا 55 مىڭنان استام تاربيەشى جۇمىس ىستەيدى. ولاردىڭ 45 پايىزى عانا مەكتەپكە دەيىن ءبىلىم بەرۋ ماماندىعىن العان. «تاربيەشى» ماماندىعىنا جوعارى وقۋ ورىندارىندا بولىنەتىن مەملەكەتتىك گرانت كوبەيىپ كەلەدى. وتكەن جىلى 270, بيىل 550 گرانت ءبولىندى. كوللەدجدەرگە بىلتىر 5560, بيىل 7200 گرانت بولىنگەن. سوعان قاراماستان، جىل سايىن 9000 تۇلەكتىڭ 900-ءى عانا ما-ماندىعى بويىنشا جۇمىسقا ورنالاسادى، بۇل وتە از»، – دەيدى ە.ساعاديەۆ.

سوندىقتان مينيسترلىكتىڭ الدىندا تاربيەشىلەردىڭ ەڭبەك-اقىسىن كوتەرىپ، جاڭا بىرىڭعاي تەستىلەۋ جۇيەسىن ەنگىزىپ، بىلىكتىلىگىن ارتتىرۋ قاجەت بولىپ تۇر. سەبەبى ءبىلىمدى ماماندار ارى قاراي بالاباقشاعا بارماي ماگيستراتۋراعا تۇسەدى، باسقا ماماندىققا اۋىسادى، سەبەبى جالاقىسى جوعارى جۇمىستى تاڭدايدى. مينيسترلىك بالاباقشاعا ماماندار تارتۋ ءۇشىن اۋىلداعى بالاباقشا مەڭگەرۋشىلەرىن جۇمىسقا قابىلداۋدا تالاپ ەتىلەتىن ەڭبەك ءوتىلىن 6-دان 3 جىلعا دەيىن قىسقارتتى. ەكىنشىدەن، پەداگوگتاردى قولداۋ ءۇشىن «ءبىلىم تۋرالى» زاڭنىڭ 51-بابىنا وزگەرىستەر ەنگىزىلىپ جاتىر ەكەن. الداعى ۋاقىتتا بالاباقشاعا جۇمىسقا مەكتەپكە دەيىنگى ماماندىق بويىنشا ەمەس، پەداگوگيكالىق ءبىلىمى بار ماماندار قابىلدانادى.

وسى ۋاقىتقا دەيىن مەكتەپكە دەيىنگى ماماندىعى جوق تاربيەشىلەر كاتەگوريا الۋ ءۇشىن اتتەستاتسيادان وتە المايتىن. ەندى اتتەستاتسيالاۋ ەرەجەسىنە وزگەرىستەر ەنگىزىلىپ، پەداگوگيكالىق ءبىلىمى بار بارلىق تاربيەشى اتتەستاتسيالاۋدان وتەدى. ول ءۇشىن مينيسترلىك قىسقامەرزىمدى كۋرستار ەنگىزىپ وتىر.

Abai.kz