جۋىردا ەلباسى نۇرسۇلتان نازارباەۆ ەلىمىزدەگى ازاماتتىق اۆياتسيانى دامىتۋ ماسەلەلەرىن قاراستىرعان ەدى. كەزدەسۋ سوڭىندا اۋە تاسىمالى قىزمەتىن ارزانداتۋدى تاپسىرىپ، «ەير استانا» كومپانياسىنىڭ بازاسىندا تومەندەتىلگەن تاريف بويىنشا كولىك قىزمەتىن كورسەتەتىن بيۋدجەتتىك اۋە كومپانياسىن قۇرۋدى ۇسىندى، دەپ جازادى turkystan.kz.

وسى ورايدا كەشە FlyArystan اتتى بيۋدجەتتىك اۋەكومپانياسى قۇرىلاتىنى رەسمي جاريالاندى. «ەير استانا» 2019 جىلدىڭ ءبىرىنشى جارتىسىندا FlyArystan اتتى بيۋدجەتتىك اۋەكومپانيانى قۇراتىنى تۋرالى حابارلادى.

FlyArystan جاڭا اۋە كومپانياسى ناۋرىزدان باستاپ جولاۋشى تاسىمالداي باستادى. قازىردەن باستاپ كومپانيانىڭ رەسمي سايتىندا الدىن الا بيلەت ساتىپ الۋعا بولادى. ازىرگە تاسىمالداۋشى پاركىندە 4 ۇشاق بار، وسى ۇشاقتارمەن ىشكى رەيستەر ورىندالادى. ەڭ باستىسى، Airbus ا320 ۇشاقتارىنداعى بارلىق 180 ورىن ەكونوم-كلاستا بولادى.

بيۋدجەتتىك اۋەكومپانيا Easyjet, Indigo, Cebu Pacific جانە Air Asia سياقتى ءساتتى لوۋكوستەرلەردى ۇلگىسى بويىنشا جۇمىس ىستەيدى. FlyArystan نارىقتاعى باعالاردان شامامەن ەكى ەسە تومەن اۆيابيلەتتەردى ىشكى باعىتتاردا ساتاتىن بولادى. ورتا مەرزىمدە باعىتتىق جەلى ايماقتىق شەتەل باعىتتارىمەن تولىعاتىن بولادى. 2022 جىلعا دەيىن اۋە فلوتى 15 ۇشاققا دەيىن كەڭەيتىلمەكشى.

FlyArystan باسشىلىعى «ەير استانادا» 16 جىل بويى ىستەپ كەلە جاتقان جەرگىلىكتى اعا مەنەدجەرلەرىنەن قۇرالعان. ۇجىمعا Cebu Pacific جانە Virgin Blue اۋەكومپانيالارىندا 15 جىلدان استام باسقارۋشى قىزمەتىن اتقارعان تيم دجوردان جەتەكشىلىك ەتەدى. «قاراپايىم عانا مىسال كەلتىرسەك، جاڭا اۋە كومپانياسى بۇرىنعى ۇشىپ جۇرگەن ادامداردى عانا ەمەس، بۇرىن ۇشاقپەن ۇشىپ كورمەگەن ادامدارعا ارنالعان»، - دەدى تيم دجوردان. ياعني، كوپشىلىككە ارنالادى. نارىق سەگمەنتتەرىن زەرتتەۋ بويىنشا، ەلىمىزدە حالىقتىڭ 10 پايىزى عانا ۇشاق كولىگىن قولدانادى، ال قالعان 90 پايىزى ۇشىپ كورمەگەن. كومپانيانىڭ قىزمەتى وسى 90 پايىزعا ارنالادى.

FlyArystan ۇشۋ ءوندىرىسى دەپارتامەنتىنىڭ جەتەكشىسى بەردىحان اگمۋروۆ: FlyArystan «ەير استانادان» قىزمەت كورسەتۋ تارتىبىمەن ەرەكشەلەنەتىن بيۋدجەتتىك اۋەكومپانيا بولعانىمەن، «ەير استانا» بولىمشەسى رەتىندە بارلىق قاۋىپسىزدىك پەن سەنىمدىلىك ستاندارتتارىنا سايكەس ەكەنى تۋرالى اتاپ ءوتۋ كەرەك. «ەير استانا» ۇستاناتىن جوعارى قاۋىپسىزدىك ستاندارتتارى مەن رەتتەۋشىلىك ۇردىستەرى اۆتوماتتى تۇردە FlyArystan كومپانياسىندا دا قولدانىلادى،-دەدى.

پيتەر فوستەر، «ەير استانا» پرەزيدەنتى: «ەير استانا» سياقتى جاڭا كومپانيا دا تولىقتاي ءوزىن-ءوزى قارجىلاندىراتىن بولادى. FlyArystan اكتسيونەرلەر ينۆەستيتسياسىن، مەملەكەتتىك سۋبسيديا مەن قانداي دا ءبىر سىرتقى قارجىلاي كومەكتى كەرەك ەتپەيدى. FlyArystan تولىققاندى زەرتتەۋ مەن ىشكى بيزنەس جوسپارلاۋ ناتيجەسىندە جانە تەز اۋىسپالى جەرگىلىكتى جانە ايماقتىق اۋەتاسىمالداۋ نارىعىنىڭ سالدارىنان تۋىپ وتىر. بيۋدجەتتىك اۋەكومپانيانىڭ ىسكە قوسىلۋى «ەير استانانىڭ» قىسقا جانە ۇزاق مەرزىمدى دامۋىنا وڭ اسەر ەتەتىنىنە، سونىمەن قاتار تومەن باعامەن ىشكى جانە ايماقتىق باعىتتاردا ساپار ەتۋگە مۇمكىندىك الاتىن جەرگىلىكتى تۋريستەر ءۇشىن كوپتەن كۇتكەن جاڭالىق بولاتىنىنا سەنىمدىمىز، - دەدى.

ال كومپانيا اتاۋىنا كەلەر بولساق، قازاقستان كوگىندە قالقيتىن ارىستاندى جۇمىس توبى بىرلەسە قۇرعان. ال لوگوتيپتى جەرگىلىكتى ديزناينەر سالىپ بەرگەن.

جالپى، ەلىمىزدە تاعى ءبىر اۋە كومپانياسىنىڭ پايدا بولۋ باسەكەنى قىزدىرا تۇسپەك. بۇل ورايدا تۇتىنۋشىلاردىڭ ۇتاتىنى انىق. ويتكەنى ەلىمىزدە ۇشاق بيلەتتەرى تاريفتەرىنىڭ ارزان ەمەستىگى جاسىرىن ەمەس. ينۆەستيتسيالار جانە دامۋ ءمينيسترىنىڭ مالىمەتىنشە، بيىلعى جىلى مەملەكەتىمىزدە 13 باعىت بويىنشا اۋە رەيستەرى اشىلعان. وعان قوسا استانا قالاسىندا «اشىق اسپان» پيلوتتىق جوباسى جۇزەگە اسىرىلىپتى. بولاشاقتا FlyArystan حالىقارالىق رەيستەردى دە ورىنداي باستايدى.

Abai.kz