وسكەمەن قالالىق اكىمدىگىندە قالا كوشەلەرىنىڭ اتاۋىن وزگەرتۋ بويىنشا قوعامدىق تىڭداۋ ءوتتى، دەپ حابارلايدى اباي-اقپارات قازاقپاراتقا سىلتەمە جاساپ.

كۇن تارتىبىنە وبلىس ورتالىعىنداعى 12 كوشەنىڭ اتىن اۋىستىرۋ تۋرالى ماسەلە قويىلدى. وكتيابر كوشەسىنە مۇحامەتجان تىنىشپاەۆتىڭ، كرۋپسكايا كوشەسىنە ەۆگەني برۋسيلوۆسكيدىڭ، رەۆوليۋتسيوننايا كوشەسىنە قاليحان ىسقاقتىڭ، سوۆەتسكايا كوشەلەرىنە ادولف يانۋشكەۆيچ پەن الەكساندر زاتاەۆيچتىڭ، دزەرجينسكي كوشەسىنە امىرە قاشاۋباەۆتىڭ، كيروۆ كوشەسىنە انتون چەحوۆتىڭ، وردجونيكيدزە كوشەسىنە ساعادات نۇرماعامبەتوۆتىڭ، كۋيبىشەۆ كوشەسىنە نارىن اتاۋىن، كالينين كوشەسىنە شىڭعىستاۋ اتاۋىن بەرۋ تۋرالى ۇسىنىستى قالالىق ءماسليحات دەپۋتاتتارى ءبىراۋىزدان قولداپ، رەسپۋبليكالىق ونوماستيكالىق كوميسسيانىڭ قاراۋىنا جىبەردى.

اتاۋى وزگەرگەن كوشەلەردىڭ ىشىندە كەڭەستىك كەزەڭنەن قالعان ەسكى اتاۋلارمەن قوسا تاۋەلسىزدىك جىلدارىندا قايتا اتالعان كوشەلەر دە بار. قالادا ەكىنشى دۇنيەجۇزىلىك سوعىس باتىرى ىزعۇتتى ايتىقوۆتىڭ اتىندا ەكى بىردەي كوشە بار ەكەنى ايتىلىپ، ونىڭ بىرىنە اسار دەگەن قازاقتىڭ كيەلى اتاۋى بەرىلدى. ال 2002 جىلى اتاۋى وزگەرگەن گولوۆكوۆ كوشەسى اراعا 16 جىل سالىپ بەيبىتشىلىك دەگەن اتاۋعا يە بولدى.

«2002 جىلى وسكەمەننىڭ يدەولوگياسىندا كەشىرىلمەس قاتەلىك كەتكەن بولاتىن. ەلىمىز تاۋەلسىزدىگىن جاريالاپ، مەملەكەتتىڭ ىرگەسىن قالاپ جاتقان كەزدە شىعىس قازاقستاننىڭ ءبىر بولىگىن رەسەيگە قوسىپ بەرۋ تۋرالى ۇسىنىس ايتىپ، حالىقتىڭ بەرەكەسىن بۇزعان ادامنىڭ ءبىرى وسى گولوۆكوۆ بولاتىن. كەيىن پارلامەنت تورىندە وتىرىپ، قازاق تىلىنە مەملەكەتتىك ءتىل ستاتۋسىن بەرۋگە قارسىلىق تانىتقان. ەلدىڭ اراسىنا ىرىتكى سالعان ادامنىڭ اتىنداعى كوشەگە بەيبىتشىلىك اتاۋىنىڭ بەرىلۋىن ادىلدىكتىڭ ورناۋى دەپ ءتۇسىنۋ كەرەك» - دەيدى «التاي اسۋى» قوعامدىق بىرلەستىگىنىڭ تەڭ توراعاسى ءتۇسىپحان تۇسىپبەكوۆ.

Abai.kz