مەملەكەت باسشىسىنىڭ "نۇرلى جول" باعدارلاماسى بويىنشا قۇرىق پورتى ارقىلى ەكسپورتتىق، يمپورتتىق جانە ترانزيتتىك جۇكتەر جونەلتىلۋدە. كەشەن جىلىنا 4 ملن تونناعا دەيىن جۇك تاسىمالداۋعا قاۋقارلى، - دەپ حابارلايدى قازاقپارات ءتىلشىسى.

قۇرىق پورتى كاسپي تەڭىزىنىڭ شىعىسىندا جاتقان شىعاناق. ال اقتاۋ ايلاعىنان وڭتۇستىكتە ورنالاسقان. تابيعي ءمۇيىس پورتتىڭ قىسى-جازى توقتاۋسىز قىزمەت كورسەتۋىنە قولايلى تاڭدالعان. كولىكتىك-لوگيستيكالىق ينفراقۇرىلىم قاراقيا اۋدانىنا قاراستى قۇرىق اۋىلىنان 17 شاقىرىم قاشىقتا. پورت پەن اۋىلدى بورجاقتى-ەرساي تەمىرجول جەلىسى بايلانىستىرادى.

ءىرى جوبا ەلدى مەكەننىڭ الەۋمەتتىك-ەكونوميكالىق جاعدايىنىڭ جاقسارۋىنا سەپتىگىن تيگىزىپ، جۇرتشىلىقتىڭ الەۋەتىن كوتەرۋگە سەبەپشى بولدى. بىلتىر 740-قا جۋىق ادام كەشەندەگى قۇرىلىس جۇمىسىنا تارتىلسا، بيىل پورتتا 300-دەن استام ادام تۇراقتى جۇمىس تاپتى. مۇنىڭ سىرتىندا پورتتىڭ قىزمەتىنە قاجەتتى زاتتاردى قامتاماسىز ەتۋ ءۇشىن جەكەمەنشىك مەردىگەرلى كومپانيالار اشىلۋدا.

«قۇرىق پورتى كەشەنىندەگى ينفراقۇرىلىمىنىڭ جۇرگىزىلۋى جاڭا جوبالاردىڭ، كولىكتىك-ينفراقۇرىلىمنىڭ دامۋىنا، جاڭا سەرۆيستىك قىزمەتتەردىڭ جۇزەگە اسۋىنا ىقپال ەتۋدە. دەمەك ءوز كەزەگىندە جاڭا كاسىپكەرلىكتىڭ قارقىنى ارتادى دەپ كۇتەمىز»، - دەدى قاراقيا اۋدانىنىڭ اكىمى قىدىربەردى بەكوۆ.

DCIM122MEDIADJI_0169.JPG

قۇرىق پورتىنىڭ جەرگىلىكتى بيۋدجەتتىڭ كەلتىرەتىن كىرىسى دە قوماقتى. بۇل سوما 2017 جىلى 41 ملن تەڭگەدەن استى، بيىل وسى كەزەڭگە دەيىن 33 ملن تەڭگەگە دەيىن جەتتى. بۇل تەك ءبىر ەلدى مەكەنگە كەلتىرگەن تابىسى، ال الداعى ۋاقىتتا تۇتاس قازاقستاننىڭ ەكوموميكاسىندا دا الاتىن ورنى ەرەكشە بولماق.

ەلباسى وسى جونىندە: «ءبىز پاروممەن وتكىزۋ جولىن اشتىق. ەندىگى جەردە اۆتوكولىك پارومى قۇرىق پورتى ارقىلى قۇرىق-باكۋ- گرۋزيا-تۇركيا، بوسفور شىعاناعى ەۋروپا باعدارىنا شىعۋعا دايىن. قازاقستان قۇرلىقتاعى ەل، بارلىق تەڭىزدەرگە ونىڭ ىشىندە پارسى شىعاناعىنا دا شىعاتىن بولامىز. ءبىز قازاقستان ءۇشىن اسا اۋقىمدى جۇمىستاردى اتقاردىق»، - دەگەن بولاتىن.

«قازىرگى تاڭدا قۇرىق پورتى كەشەنى ارقىلى ەكسپورتتىق، يمپورتتىق جانە ترانزيتتىك جۇكتەر جونەلتىلۋدە. قىتايدان، قىرعىزستاننان، وزبەكستاننان ترانزيتتىك جۇكتەر وسى قۇرىق پورتى ارقىلى ازەربايجان ودان كەيىن ەۋروپاعا جونەلتىلەدى. ەلىمىزدە ءوتىپ جاتقان ۇلى جىبەك جولى باعىتى بويىنشا تاسىمالداناتىن جۇكتەردىڭ ارتۋىنا قۇرىق پورتى ءوز ۇلەسىن قوسۋدا»، - دەيدى قۇرىق پورتى باس ديرەكتورىنىڭ ورىنباسارى تالعات وسپانوۆ.

وسىلايشا بىلتىر تەمىرجول پارومى تەرمينالى 1,5 ملن توننا جۇك تيەدى. پورتقا 320 كەمە كەلدى. بيىل 15 216 ۆاگونعا جانە 306 اۆتوكولىككە قىزمەت كورسەتىلدى.

ايتا كەتەرلىگى، قۇرىق پارومدىق كەشەنى جىلىنا 4 ملن تونناعا دەيىن جۇك تاسىمالداۋعا قاۋقارلى. ال اقتاۋ تەڭىز ساۋدا پورتىن قوسا العاندا 2020 جىلعا قاراي 25 ملن تونناعا دەيىن جەتكىزۋگە مۇمكىندىك بار.

Abai.kz