دجيم اكوستا كونگرەسسكە ارالىق سايلاۋ قورىتىندىسى بويىنشا وتكەن ءباسپاسوز ءماسليحاتى كەزىندە "ترامپ نەلىكتەن سايلاۋالدى سوزىندە ميگرانتتاردى "جاۋلاپ الۋشىلار" دەپ اتاعانىن سۇراعان. CNN ءجۋرناليسى سونىمەن بىرگە رەسەيمەن بايلانىسى بار دەگەن ءىس بويىنشا پرەزيدەنت قورىقپايدى ما دەگەن سۇراق قويعان.
ترامپ اكوستا سۇراقتارىنا جاۋاپ بەرۋدەن باس تارتىپ، ونى "دورەكى ءارى جيىركەنىشتى ادام" دەپ اتادى. وسىدان كەيىن CNN تىلشىسىنە اق ۇيگە كىرۋىنە تىيىم سالىندى. اق ءۇي ءباسپاسوز حاتشىسى سارا ساندەرس ءجۋرناليستى ەرسى قىلىقتارى ءۇشىن ايىپتادى. ونىڭ ايتۋىنشا، اكوستا ميكروفوندى الماق بولىپ، تاجىريبەدەن ءوتۋشى قىزدىڭ قولىن ادەيى ۇستاعان.
الەۋمەتتىك جەلى قولدانۋشىلارى جاريالانعان ۆيدەونى كورىپ، قولدان جاسالعان دەپ، اق ءۇيدى ايىپتادى. ترامپقا قارسى شاعىمدا CNN جاۋاپ بەرۋشى رەتىندە قوسىمشا بەس ادامدى كورسەتكەن. ولار - اق ءۇي اپپاراتىنىڭ باسشىسى دجون كەللي، ءباسپاسوز حاتشى سارا ساندەرس، كوممۋنيكاتسيا جونىندەگى شتاب باسشىسىنىڭ ورىنباسارى بيلل شين، قۇپيا قىزمەت ديرەكتورى دجوزەف كلانسي مەن مەكەمە وفيتسەرى دجون دوۋ.
CNN اكوستاعا اككرەديتاتسينى قايتا بەرۋىن تالاپ ەتەدى. تەلەكانال سوتقا ءتۇسىرىپ وتىرعان شاعىم تەك عانا تىلشىگە بايلانىستى ەمەس ەكەنىن ايتىپ، بۇل سايلانعان شەنەۋنىكتەر جايىندا سۇراق قويعان ءاربىر ءجۋرناليستىڭ باسىنا ءتۇسۋى مۇمكىن دەپ ەسكەرتەدى.
2017 جىلدىڭ باسىندا پرەزيدەنت قىزمەتىنە كىرىسەر الدىنداعى ءباسپاسوز ءماسليحاتى كەزىندە ترامپ CNN ءتىلشىسىنىڭ سۇراقتارىنا جاۋاپ بەرۋدەن باس تارتىپ، "جالعان جاڭالىقتار تاراتادى" دەپ مالىمدەگەن. CNN باسشىلىعى سول كەزدە پرەزيدەنت ارەكەتىن ايىپتاپ، جۋرناليسىنە قولداۋ كورسەتكەن.
Abai.kz
