-پانفيلوۆ پاركىنە، اعا. 200 تەڭگە.
-300.
-سودان باسقا تيىنىم بولماي تۇر...
-بۇگىن - جۇما. تەگىن الا كەتەر، ويتكەنى مەن دە تۋرا سوندا بارام،- دەدىم قاراپ وتىرماي. 
گوگولدىڭ بويىمەن كەتىپ بارامىز، گوگول-قالداياقوۆقا بارۋىم كەرەك.
ءوز ويىممەن الىسىپ وتىرمىن. مەجەلى جەرگە جەتكەندە الگى بالا سىلدىراتىپ تيىندارىن بەردى دە ءتۇسىپ قالدى. شاشى اپپاق، ءوزى قىلعىنىپ گالستۋك تاققان دارداي قازاق. نارىق زامانى عوي، 200 تەڭگەگە ەكى نان الادى. بىراق... سول تاكسيست الماتىدا تۋىپ، بالكوندا وسپەگەن، مەن سياقتى، ايتەۋىر، ءبىر اۋىلدان كەلدى عوي.
11-12 جاستاعى كەزىم. ءبىزدىڭ جاقتا قىز ۇزاق، شىعىستىڭ قارى التى اي جاتىپ الادى، سارشۇناق ايازى بەتىڭدى شىمشىپ، جانىڭدى ءاپ-ساتتە مۇزداتىپ جىبەرەدى. شەشەم قايتقان جىلدان سوڭ ۇيدەگى ءتورت بىردەي سيىر بۇزاۋلاعان. "سيىرلارعا وبال بولادى" دەگەندى ءجيى ەستيمىن، كورشى مەكونىڭ شەشەسى قاشانعى كومەكتەسسىن، ءالىم كەلسىن-كەلمەسىن ساۋساعىمنىڭ قاتىپ قالعانىنا قاراماي، ءتورت بىردەي سيىردى ءوزىم ساۋاتىن بولدىم. اۋىلدىڭ ادامدارى بوتەن دەپ قاراي بەرمەيدى، تۋىستان بەتەر ءبىرىنىڭ ۇيىنە ءبىرى كىرىپ-شىعا بەرەتىن ۋاقىت قوي. "پالەننىڭ سيىرى قىسىر قالعان، شايلىق ءسۇتى جوق، اپارىپ بەر",- دەپ اجەم بىرەسە - بيدونعا، بىرەسە بانككە قۇيىپ ساۋىلعان ءسۇتتى دايىنداپ بەرەدى. اپارىپ بەرەسىڭ. "بيىل سيىر قىسىر قالدى، كورشى، ءسۇت بەرشى",- دەپ كەلەتىن ءۇيدىڭ ماڭايىنداعىلارعا بەرەسىڭ كەزەك-كەزەك. ءبىر رەت ايتىلدى، بولدى، بەرەسىڭ! بۇل ءبىر مىندەت-پارىز سياقتى، تالقىلانبايدى. ءسۇتىڭدى اپارعان، اكەتكەن زامات ۇمتىلاتىن.
مەيىرىم بار ەدى، قامقورلىق بار ەدى. كولىكتىڭ تەرەزەسىنەن قىسقى قالانىڭ كورىنىسى مەنىڭ ەسىمە وسىنى ءتۇسىردى. جەلكەسىنەن ءتونىپ وتىرعان مىنا تاكسيستىڭ اجەسى نەمەسە شەشەسى دە سولاي سيىرى قىسىر قالعان كورشىسىنە شايلىق ءسۇت بەرگەنىنە سەنىمدىمىن. بۇل سونى كورمەدى ەمەس، كوردى. ال مىناسى... "قايىرىمدىلىعىڭدى قالانىڭ بەتون قابىرعاسى سورىپ، جىلىلىعىڭدى نارىقتىڭ زاڭى جۇلىپ كەتسە دە، قارا جولدىڭ بويىندا ءجۇرسىڭ، بۇگىن كۇن جۇما ەدى عوي",- دەپ كەتكىم كەلدى. ۇندەمەدىم. ءسوز شىعىن ويتكەنى.
ۇلكەننەن تارىداي مەيىرىم كورمەگەن جاستار اينا مەن كومىر ءۇشىن اجالدى قاسىنا ەرتىپ، وزگەنىڭ ءومىرىن جالماي سالادى. ويتكەنى تاۋداي قامقورلىق كورىپ وسكەن ۇلكەننىڭ كەيپى - اناۋ...
نەگە ءبىز وسى؟

ايگۇل بولاتحانقىزىنىڭ facebook پاراقشاسىنان

Abai.kz