تۇركىستان قالاسىندا «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي-تەوريالىق كونفەرەنتسيا باستالدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.

«رۋحاني جاڭعىرۋ» باعدارلاماسى اياسىنداعى ماڭىزدى جيىندى تۇركىستان وبلىسىنىڭ اكىمدىگى مەن حالىقارالىق تۇركى اكادەمياسى بىرلەسىپ ۇيىمداستىردى. سونىمەن قاتار، تۇركى كەڭەسى مەن قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى دە قولداۋ كورسەتۋدە. كونفەرەنتسيانى تۇركىستان وبلىسىنىڭ اكىمى جانسەيىت تۇيمەباەۆ اشتى.

قازىر «تۇركى الەمىنىڭ كيەلى جەرلەرى»،«تۇركى دۇنيەسىنىڭ تۇعىرلى تۇلعالارى»  جانە «تۇركى تىلدەرى جانە جازۋى» تاقىرىپتارىنداعى سەكتسيالىق وتىرىستار ءوتىپ جاتىر.

مەملەكەت باسشىسى نۇرسۇلتان نازارباەۆتىڭ تۇركى كەڭەسىنىڭ VI سامميتىندە كوتەرگەن «تۇركى دۇنيەسىنىڭ  تۇعىرلى تۇلعالارى» جانە «تۇركى الەمىنىڭ كيەلى جەرلەرى» باستامالارىن جۇزەگە اسىرۋ باعىتىندا ۇيىمداستىرىلعان عىلىمي باسقوسۋدا تۇركى دۇنيەسىنىڭ عىلىمى، مادەنيەتى مەن ادەبيەتى، تۇركى تىلدەرى،  كيەلى جەرلەر مەن تۇعىرلى تۇلعالارى تۋرالى ايتىلادى.

كونفەرەنتسياعا قازاقستانداعى بىرقاتار شەتەل ديپلوماتتارى مەن حالىقارالىق ۇيىمداردىڭ  وكىلدەرى مەن تاريحشىلارى، ءازىربايجان، قازاقستان، قىرعىزستان، تۇركيا  عالىمدارى مەن اقش، رەسەي، ءۇندىستان، وزبەكستان زەرتتەۋشىلەرى قاتىسۋدا.

Abai.kz