تۇركيانىڭ ىشكى ىستەر مينيسترلىگى وزبەكستاننىڭ ەلدەگى 30 مىڭنان استام ازاماتىن تىركەۋگە الدى. ولاردىڭ شامامەن ەكى مىڭعا جۋىعى عانا زاڭ جۇزىندە جۇمىس ىستەيدى، جۇمىس ۆيزاسىن العان. ءۇي قىزمەتكەرى، جالدامالى جۇمىسشى بولىپ ىستەيتىندەر نەگىزىنەن رەسمي رۇقسات الماعان نەمەسە تۋريستىك ۆيزامەن ءجۇر.

ميگراتسيا ماسەلەسىن زەرتتەۋشى مۇرات ەرشاحيننىڭ ايتۋىنشا، ۆيزاسىز ءجۇرىپ-تۇرۋ ۋاقىتىن سوزۋ تۇركيادا تۇراقتى تۇردە جۇمىس ىستەيتىندەرگە قيىندىق تۋعىزۋى مۇمكىن.

"ورتالىق ازيا ەلدەرىنىڭ ازاماتتارىنا جۇمىس ۆيزاسىن الۋدا قيىندىق جوق. قۇجاتتارىن وتكىزىپ، رۇقسات الۋى كەرەك. تۇرىك كونسۋلدىعى ءتۇسىندىرۋ جۇمىستارىن جۇرگىزەدى دەپ ۇمىتتەنەمىن", - دەدى ول.

2015 جىلى رەسەي مەن تۇركيا قارىم-قاتىناسى سۋىعان ۋاقىتتا، بۇل ەلدە رەسەي تۋريستەرى ازايعان. بۇل جاعداي تۇركيانىڭ تۋريزمىنە كەرى اسەر ەتتى. حالىقارالىق قاتىناستار جونىندەگى مامان، دوتسەنت سەردار يىلمازدىڭ پىكىرىنشە، ۆيزاسىز ءجۇرىپ-تۇرۋ مەرزىمىن 90 كۇنگە سوزۋ تۋرالى شەشىم ەكونوميكالىق، ساياسي جانە مادەني جاقىنداستىرۋدان تۋعان.

"مۇنداي شەشىم مەملەكەتتەر اراسىندا سەنىمدى كۇشەيتەدى. تۇركيا ورتالىق ازيا ەلدەرى ءۇشىن جەڭىلدىكتەر جاساپ وتىر، بۇل ەلدەردەن دە سونداي قارىم-قاتىناس كۇتەدى", - دەدى ول.

2018 جىلدىڭ قاراشاسىنداعى مالىمەت بويىنشا، تۇركيادا 787 مىڭنان استام شەتەل ازاماتى تىركەلگەن. ولاردىڭ 383 مىڭى تۋريستىك ۆيزامەن ەڭبەك ەتىپ ءجۇر. ەڭبەك ۆيزاسىن العان ميگرانتتار سانى - 56 مىڭ. ورتالىق ازيا ەلدەرىنەن تۇركياعا جۇمىس ىستەۋگە تۇركىمەنستان مەن وزبەكستان ازاماتتارى كوپ بارادى. 2018 جىلى تۇركيادا 20 مىڭنان استام قىرعىزستاندىق تىركەلگەن. ولاردىڭ توعىز مىڭنان استامىنىڭ ەڭبەك ۆيزاسى بار.

Abai.kz