پرەزيدەنت ن.نازارباەۆتىڭ “بولاشاققا باعدار:رۋحاني جاڭعىرۋ” ماقالاسىنىڭ نەگىزىندە تۇركىستان وبلىسىنىڭ ورتالىعى تۇركىستان شاھارىندا «تۋعان جەرگە تاعزىم» كەڭ اۋقىمدى جوباسى باستالدى.

«وتانداستار» قورى ۇيىتقى بولعان شارانىڭ مىندەتى - الىس-جاقىن شەتەلدەردە، اۆستريا، انگليا، فرانتسيا، شۆەتسيا، يران، قىتاي، مونعوليا، تاجىكستان، رەسەي، بەلورۋس، وزبەكستان جانە قىرعىزستاندا تۇراتىن قانداستارعا ارناپ، قازاقستاننىڭ كيەلى جەرلەرىنە تاريحي-تانىمدىق ەكسكۋرسيالار سەرياسىن ۇيىمداستىرۋ.

ەكى كۇنگە جالعاساتىن ەكسكۋرسيانىڭ، ەڭ الدىمەن، تۇركىستاندا ءوتۋ ماقساتى - وتانداستارعا قوجا احمەت ياسساۋي، ارىستان باب كەسەنەلەرى، تۇركىستاننىڭ تاريحي مۇراجايى جانە ءوڭىردىڭ باسقا دا كورىكتى جەرلەرىن تانىستىرۋ ارقىلى قازاق حالقىنىڭ مادەني جانە رۋحاني قۇندىلىقتارىن ناسيحاتتاۋ.

بارشا تۇركى جۇرتىنىڭ اتاجۇرتىنا كەلگەن قانداستاردىڭ قادامىنا قۇت تىلەپ، زور قۇرمەتپەن قارسى العان وبلىس اكىمى جانسەيىت تۇيمەباەۆ وسىناۋ ماڭىزدى كەزدەسۋدىڭ ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ اياسىندا ۇيىمداستىرىلىپ جاتقانىن ايتىپ، قاتىسۋشىلاردى تۇركىستاندى تۇركى الەمىنىڭ رۋحاني ورتالىعىنا اينالدىرۋ جونىندە ناقتى مىندەتى بۇگىنگى تاڭدا قالاي جۇزەگە اسىرىلىپ جاتقانىنان حاباردار ەتتى.

«رۋحاني جاڭعىرۋ» باعدارلاماسى اياسىندا 2018 جىلى وبلىستا 46 جوبا مەن 168 ءىس-شارا بەلگىلەنىپ، وتكىزىلۋدە. «تۋعان جەر» ارنايى جوباسىنىڭ «اتامەكەن» كىشى باعدارلاماسى شەڭبەرىندە تۇركىستان وبلىسىندا 2018 جىلى 28 ملرد. 156 ملن.تەڭگەنىڭ جوبالارى، ياعني، 428 نىسان (وبلىس بولىنگەنگە دەيىن بارلىعى 445 نىسان) جۇزەگە اسۋدا، ونىڭ ىشىندە قۇنى 887,2 ملن. تەڭگە قۇرايتىن 23 نىسان ىسكە قوسىلدى. باعدارلامادا قويىلىپ وتىرعان باستى ماسەلەلەردىڭ ءبىرى – ادامدى ءبىلىمدى، ءارى رۋحاني باي ەتىپ تاربيەلەۋ. وسى ماقساتقا باعىتتالعان «تاربيە جانە ءبىلىم» كىشى باعدارلاماسى اياسىندا ولكەنىڭ تاريحىن كەڭىنەن تانۋ، زەرتتەۋ ماقساتىندا 5,6,7 سىنىپتارعا ارنالعان «ولكەتانۋ» وقۋلىعىن باسپادان شىعارۋعا جەرگىلىكتى بيۋدجەتتەن 153 ملن. تەڭگە قارالىپ، 50 مىڭ دانامەن شىعارۋعا باسپاعا جىبەرىلدى. باعدارلاماعا وراي، قاسيەتتى جەرلەردىڭ ءتىزىمىن قالىپتاستىرۋعا ۇسىنىستار ازىرلەيتىن تاريحشىلار، عالىمدار، ارحەولوگتاردان تۇراتىن ارنايى وڭىرلىك جۇمىسشى توبى قۇرىلىپ، وبلىسىمىزداعى قاسيەتتى، كيەلى نىسانداردىڭ ءتىزىمى ىرىكتەلىپ، وڭىرلىك كارتا جوباسى دايىندالدى" - دەدى ءوڭىر باسشىسى.

ق.ا.ياسساۋي اتىنداعى حالىقارالىق قازاق-تۇرىك ۋنيۆەرسيتەتىندە «قازاقستاننىڭ كيەلى جەرلەرى» تاقىرىبىندا وتكەن دوڭگەلەك ۇستەلدە اكىم، سونداي-اق، وبلىس تاراپىنان «قاسيەتتى قازاقستان» رەسپۋبليكالىق ورتالىعىنا 104 نىسان ۇسىنىلىپ، ونىڭ ىشىنەن 26 نىسان رەسپۋبليكالىق تىزىمگە ەنگىزىلگەنىن جەتكىزدى. سونىمەن قاتار، «قازاقستاننىڭ كيەلى جەرلەرى» ارنايى جوباسى اياسىندا اتقارىلىپ جاتقان ىستەرگە توقتالىپ، جالپى باعدارلامالىق ماقالانىڭ بارلىق مىندەتتەرى بويىنشا وبلىسىمىزدا اتقارىلعان ىستەردى ايتىپ ءوتتى.

مۇنان بولەك، جۇزدەسۋدە «وتانداستار قورى» كەاق پرەزيدەنتى نۇرتاي ابىقاەۆ، «دۇنيەجۇزى قازاقتارىنىڭ قاۋىمداستىعى» رقب توراعاسىنىڭ ءبىرىنشى ورىنباسارى زاۋىتبەك تۇرىسبەكوۆ، ق.ا.ياساۋي اتىنداعى حقتۋ رەكتورى بولاتبەك ابدراسيلوۆ، قر ۇلتتىق مۋزەيىنىڭ «قاسيەتتى قازاقستان" ورتالىعى باسشىسىنىڭ ورىنباسارى باتىرحان جۇماباەۆ، مەملەكەتتىك ءتىلدى دامىتۋ قورىنىڭ ديرەكتورى ازات شاۋەەۆتار جانە شەت ەلدىك دياسپورا وكىلدىرى ءسوز سويلەپ، بۇگىنگى شارانىڭ ماڭىزدىلىعىنا توقتالدى.

جالپى، اتالعان «وتانداستار» قورى الداعى بەس جىل ىشىندە ەكسكۋرسيالىق تۋرلاردى ەلىمىزدىڭ وزگە دە وڭىرلەرىندە جۇيەلى تۇردە وتكىزۋدى جوسپارلاپ وتىر. كەلەسى رەتتەگى جوبا اقتاۋ، پاۆلودار، الماتى جانە ت.ب. قالالاردى قامتيتىن بولادى. ۇيىمداستىرۋشىلاردىڭ ايتۋىنشا، كيەلى جەرلەردى جاقىننان تانىپ، ءجىتى زەرتتەۋ ارقىلى شەتەلدىك وتانداستار تاريحي وتانىنىڭ وتكەنىنە ءۇڭىلىپ، ەلىمىزدىڭ مادەنيەتىنە، ونەرىنە جانە حالىقتىق داستۇرلەرىنە جاقىنداي تۇسەدى.

 «وتانداستار» قورى» «تۋعان جەرگە تاعزىم» تاريحي-تانىمدىق ەكسكۋرسيالار جوباسىن «رۋحاني جاڭعىرۋ» مەملەكەتتىك باعدارلاماسى اياسىندا وتكىزىپ وتىر. جوبا باعدارلاماسىنا «قازاقستاننىڭ كيەلى جەرلەر گەوگرافياسى» كوپفۋنكتسيونالدى ۆيرتۋالدى كارتاسى نىساندارىمەن تانىسۋ كىرەدى. اتالمىش يدەيا مەملەكەت باسشىسى نۇرسۇلتان نازارباەۆقا تيەسىلى. ەلباسى ءوزىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا بۇل باستامانى باسىمدىق مىندەتتەردىڭ ءبىرى رەتىندە بەلگىلەگەن بولاتىن.

قازىر قازاقستاننىڭ تاريحي جەرلەرى تىزىمىنە 185 جالپىۇلتتىق جانە 500 وڭىرلىك دەڭگەيدەگى نىساندار ەنگىزىلگەن.

Abai.kz