«اق جول» پارتياسىنىڭ ۇيىمداستىرۋىمەن 24 قاراشا كۇنى اقتوبەدەگى ا.جۇبانوۆ اتىنداعى ۋنيۆەرسيتەتتە "XXI عاسىرداعى الاشتىڭ اق جولى" جالپىۇلتتىق بايقاۋىنىڭ II-كەزەڭى ءوتتى.

ايتۋلى ءىس-شاراعا «اق جول» قدپ توراعاسىنىڭ ورىنباسارى، قر پارلامەنت ءماجىلىسىنىڭ دەپۋتاتى بەرىك دۇيسەمبينوۆ، سونداي-اق پارتيانىڭ ورتالىق كەڭەسىنىڭ حاتشىسى ارمان سقابىلۇلى، «اق جول» قدپ اقتوبە فيليالىنىڭ توراعاسى اسقار سادىقوۆ جانە وسى وبلىستىڭ اكىمدىگىنىڭ وكىلدەرى قاتىستى.

بيىل بايقاۋعا رەسپۋبليكا بويىنشا 150-دەي زەرتتەۋ جۇمىستارى تۇسكەن. بۇل – رەكوردتىق كورسەتكىش! سونىڭ ىشىندە مىڭنان تۇلپار، جۇزدەن جۇيرىك شىققان 34 قاتىسۋشىنىڭ جۇمىسى II-كەزەڭگە جولداما الدى. جاس الاشتانۋشىلاردىڭ جۇمىسىنا ارنايى قۇرىلعان كوميسسيا باعا بەردى. وعان بەلگىلى الاشتانۋشى عالىم قايىربەك كەمەڭگەر، فيلولوگيا عىلىمدارىنىڭ دوكتورى امانتاي ءشارىپ، تاريحشى مادەن اسىلبەك جانە جەرگىلىكتى اقىن بيجان قالماعانبەت مۇشە بولعانىن ايتا كەتۋ كەرەك.

ءداستۇرلى تۇردە وتەتىن بۇل بايقاۋ كەيبىر ەرەكشەلىكتەرىمەن كوميسسيا قۇرامىنداعى تورەشىلەردىڭ اسا قىزىعۋشىلىعىن تۋدىرىپ، نازارىن اۋداردى. سەبەبى بۇرىن-سوڭدى زەرتتەلمەگەن تىڭ تاقىرىپتار كوتەرىلدى.

– جيىرمانىڭ توڭىرەگىندەگى جاستار «الاشوردالىقتار يدەياسى مەن ستيۆەن كوۆي يدەياسىنا پسيحولوگيالىق سالىستىرمالى تالداۋ» نەمەسە «ماعجاننىڭ ماسكەۋدەگى اعارتۋشىلىق قىزمەتى» اتتى زەرتتەۋلەرىن ورتاعا سالعاندا كوپتى كورگەن قايىربەك كەمەڭگەر مەن امانتاي ءشارىپ سەكىلدى الاشتانۋشىلاردىڭ ءوزى باس شايقادى. سۇيسىندىك. ەرتەڭىمىزدىڭ وسى جاستاردىڭ قولىندا ەكەنىن ءتۇيسىنىپ، قۋاندىق. ماعجان دا سونى مەڭزەگەن-اۋ: "مەن جاستارعا سەنەمىن!»، - دەيدى بايقاۋعا باعا بەرگەن پارتيانىڭ وك حاتشىسى ارمان سقابىلۇلى.

سونىمەن، بايقاۋ قورىتىندىسى بويىنشا، 12 ۇمىتكەر III-كەزەڭگە جولداما الدى. 1-نوميناتسيا بويىنشا: بەكجانوۆا نۇرگۇل، سۇلەيمەنوۆ ازيزبەك، ايمانوۆ باۋىرجان; 2-نوميناتسيا بويىنشا: جىلقىباەۆ اسىلبولات، مەيرامبەكوۆا دينارا، قايرات دينارا; 3-نوميناتسيا بويىنشا: مىرزاعالي اباي، كەنجەباەۆا التىناي،ۋاليەۆ تالاپكەر; 4-نوميناتسيا بويىنشا: الىبەك بايبول، نامەت باعلان جانە جاستلەك ناديا.

بۇل بايقاۋدا جەڭىلگەن قاتىسۋشى بولعان جوق. اقتىق كەزەڭگە وتە الماعان جاستاردىڭ وزدەرى «اق جول» پارتياسىنىڭ العىس حاتىمەن ماراپاتتالىپ، ارنايى اقشالاي سىياقىلار تابىستالدى.

ال، الاش قايراتكەرىنىڭ ۇرپاعى، عالىم قايىربەك كەمەڭگەر: «الاشقا ىنتىزار ىزدەنۋشىلەر بارىنا، الاشتى زەرتتەۋگە ۇمتىلعان جاستاردى قولداعان ازاماتتارعا ءدان ريزا بولدىق. "اق جول" پارتياسى سوزبەن عانا ەمەس، ىسپەن دە الاشتى قولدايتىنىن دالەلدەدى تاعى. ءسابيت بايدالى مارقۇم اعامىز نەگىزىن سالعان كەرەمەت جوبا جىلدان جىلعا كەڭەيىپ، كوركەيىپ ءوسىپ، جاڭا الاشتانۋشى ەسىمدەردى تانىتا بەرسىن»، - دەپ ءوزىنىڭ اقجارما تىلەگىن ءبىلدىردى.

ەسكە سالا كەتەيىك، ۇلتتىق بايقاۋدىڭ فينالدىق كەزەڭى ەلىمىزدىڭ تاۋەلسىزدىك مەرەكەسى قارساڭىندا 14 جەلتوقسان كۇنى استانادا وتەدى دەپ جوسپارلانۋدا.

Abai.kz