مەكتەپتەرىمىز «التىن بەلگىگە» بىتىرەدى دەپ ۇلتتىق بىرىڭعاي تەستىلەۋگە (ۇبت) ۇكىلەپ قوسقان 3 مىڭعا جۋىق ۇزدىك تۇلەكتىڭ تەڭ جارتىسى دەرلىك ءۇمىتتى اقتاي المادى. ودان دا قىزىعى، ەلىمىزدەگى ەڭ ايتۋلى جوعارى وقۋ ورنى – كيمەپ-ءتىڭ ستۋدەنتتەرى دە تەست سۇراقتارىنىڭ وزدەرىنشە جاسالعان دۇرىس جاۋاپتارىن ساۋدالاماق بولىپتى. ياعني ەلىمىزدىڭ ەرتەڭگى تىزگىنىن قولعا الاتىن ازاماتتارىمىز مەملەكەتتىك قۇپيانى ساتىپ جىبەرۋگە ءازىر بوپ شىقتى. ۇبت جاۋاپتارىنىڭ زاڭ بويىنشا مەملەكەتتىك قۇپيالار قاتارىنا جاتقىزىلاتىنى بەلگىلى. ابىروي بولعاندا، ولاردىڭ قولىنا مەملەكەتتىك قۇپيا تۇسپەي قالعان. ەگەر ناقتى دۇرىس جاۋاپتار قولىنا تيسە ەشتەڭەدەن تارتىنباي ساتاتىنى انىق…
ءبىر اپتاعا ۇلاسقان بيىلعى ۇبت دا وسىنداي «جاڭالىقتارىمەن» ارتتا قالدى. دەسە دە، كەشە استانادا ءباسپاسوز ءماسليحاتىن وتكىزگەن ءبىلىم جانە عىلىم ءمينيسترى جانسەيىت تۇيمەباەۆ بيىلعى تەستىلەۋدىڭ مەكتەپتەردەگى ءبىلىم ساپاسىنىڭ كوتەرىلگەنىن كورسەتكەنىن ايتىپ، سۇيىنشىلەپ وتىر. ونىڭ ايتۋىنشا، ۇبت-نىڭ ورتاشا دەڭگەيى 74,9 بالدى قۇراعان. وتكەن جىلى بۇل كورسەتكىش 68 بالل بولاتىن. جۇزدەن اسىرا بالل جيناعان تۇلەكتەر سانى دا بيىل كوبىرەك كورىنەدى. ءمينيستردىڭ ايتۋىنشا، 11 مىڭنان استام تۇلەك، ياعني بارلىق تەست تاپسىرۋشىلاردىڭ 10,6 پايىزى جۇزدەن ارتىق بالل العان.
بىلتىرعى تۇلەكتەردىڭ 6,6 پايىزى عانا مۇنداي بيىكتەن كورىنە الىپ ەدى. ال بارلىق سۇراققا سۇرىنبەي جاۋاپ بەرىپ، ەڭ جوعارعى باعاعا (125 بالل) يە بولعاندار – 8. وكىنىشتىسى، ەلىمىزدىڭ التىن ورتالىعى – استانا مەكتەپتەرى تۇلەكتەرىنىڭ ىشىندە بارلىق سۇراققا قاتەسىز جاۋاپ بەرگەن ەشكىم جوق. ەسەسىنە، باتىس قازاقستان وبلىسى مەن الماتى قالالارىنان ەكى-ەكىدەن ەڭ جوعارعى بالل العاندار بار.
تەستىلەۋدەن ەڭ تومەنگى مەجە – 45 بالل جيناي الماي، «قۇلاپ كەتكەندەر» دە از ەمەس. ولاردىڭ سانى – 15 476. نەگە ەكەنى بەلگىسىز، مينيستر مىرزا بۇل سانعا كوپ توقتالعان جوق. قۇلقى دا بولماسا كەرەك. ال ءبىز قولىمىزعا كالكۋلياتور الىپ، پايىزدىق كورسەتكىشىنە دەيىن ەسەپتەپ كوردىك. سوندا ءبىزدىڭ ەسەبىمىزشە، بارلىق تەست تاپسىرۋشى تۇلەكتىڭ 14,5 پايىزى «ەكىلىك» العان بولىپ شىقتى.
ەندى تەست جاۋاپتارىن ساتپاق بولعان ەڭ تاڭداۋلى ستۋدەنتتەرىمىزگە قايتا ورالايىق. ءمينيستردىڭ مالىمەتىنشە، الماتىدا ۇبت سۇراقتارىنىڭ جاۋاپتارىن ساۋدالاپ جۇرگەن الاياقتار توبى قولعا تۇسكەن. ىشىندە كيمەپ-ءتىڭ ءۇش بىردەي ستۋدەنتى بار. «ولاردىڭ ۇستىنەن قىلمىستىق ءىس قوزعالدى. بىراق ولاردىڭ قولىنداعى جاۋاپتار وزدەرىنىڭ جاساعاندارى بولىپ شىقتى، قاتەلەرى دە بار»، – دەيدى مينيستر.

بەسبوعدا التاي، استانا
12 ماۋسىم 2009
«الاش ايناسى» گازەتى 12 ماۋسىم 2009 جىل