بۇگىن قر پارلامەنتى سەناتىنىڭ وتىرىسىندا 2018-2020 جىلعا ارنالعان رەسپۋبليكالىق بيۋدجەتتى ناقتىلاۋ تۋرالى زاڭ جوباسىن تالقىلاۋ كەزىندە سەناتور اسقار بەيسەنباەۆ تۇركىستان قالاسىنداعى مەملەكەتتىك جانە ازاماتتىق قىزمەتكەرلەردى تۇرعىن ۇيمەن قامتاماسىز ەتۋ ماسەلەسىن كوتەردى.

بۇل تۋرالى Abai.kz اقپاراتتىق پورتالى Baq.kz سايتىنا سىلتەمە جاساي وتىرىپ حابارلايدى.

«مەملەكەت باسشىسىنىڭ تۇركىستان وبلىسىنىڭ اكىمشىلىك ورتالىعىن شىمكەنت قالاسىنان تۇركىستان قالاسىنا اۋىستىرۋ تۋرالى قاۋلىسىنا سايكەس مەملەكەتتىك جانە ازاماتتىق قىزمەتكەرلەردى تۇرعىن ۇيمەن قامتاماسىز ەتۋ ءۇشىن قانداي باعدارلامالار كوزدەلگەن؟ وسىعان بيۋدجەتتەن قاراجات قاراستىرىلعان با؟ بۇل جالاقاسى تومەن كادردىڭ قولدانىستاعى باعدارلامالارعا قاتىسا المايتىن تابىسى تومەن، ءبىرىنشى جارنانى تولەۋگە قارجىسى جوق ازاماتتارعا قاتىستى. وسى ساناتتاعى قىزمەتتەرگە ارنايى جەرگىلىكتى باعدارلاما قابىلداۋ ماسەلەنى شەشۋگە سەپتىگىن تيگىزەدى دەپ ويلايمىن. بۇل ماسەلە قاراستىرىلعان با؟ سونداي-اق، مەملەكەتتەتىك مەكەمەلەر ءۇشىن اكىمشىلىك عيماراتتاردىڭ جەتىسپەۋشىلىگى تۋرالى ماسەلە قالاي شەشىلەدى؟» - دەدى سەناتور اسقار بەيسەنباەۆ.

پارلامەنت سەناتىنىڭ ساۋالىنا ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ جاۋاپ بەردى.

«7-20-25» باعدارلاماسى بارىن بىلەسىز. جولداۋدا باستاپقى جارنانى سۋبسيديالاۋ ماسەلەسىمەن جۇمىس ىستەۋدى تاپسىردى. بۇل – باعدارلامانى تەزدەتۋگە مۇمكىندىك بەرەدى. جالپىۇلتتىق جوسپار شارالارى قابىلداندى. مەرزىمى قاراشاعا دەيىن دەپ وتىرمىز. قاراشادا ماسەلەمەن جۇمىس ىستەپ، قانداي ساناتتار سۋبسيديالاناتىنى انىقتالادى»، - دەدى ول.

ونىڭ ايتۋىنشا، شىمكەنت قالاسىندا جۇزەگە اسىرىلاتىن جوبالار بويىنشا رەسپۋبليكالىق بيۋدجەتتەن بولىنەتىن ترانسفەرت كولەمى 15 ملرد تەڭگەنى قۇرايدى.

«ونىڭ 6 ملرد تەڭگەسى جەرگىلىكتى نىساندارعا، 8,9 ملرد تەڭگە جالعاساتىن جوبالاردى جۇزەگە اسىرۋعا بولىنەدى. قوسىمشا ماقساتتى ترانسفەرتتەرمەن شىمكەنت قالاسىندا 6 جاڭا جوبالاردى جۇزەگە اسىرۋعا 1,5 ملرد تەڭگە كوزدەلەدى. 2019 جىلى قوسىمشا قاجەتتىلىكتەر بويىنشا اكىمدىكپەن بىرگە جۇمىس ىستەيمىز. كەلەسى جىلدىڭ قارجىلاندىرۋى انىقتالاتىن بولادى»، - دەدى ول.

Abai.kz