تۇركىستان وبلىسىندا 6 ملرد تەڭگەدەن استام قاراجاتقا ەكى ماقتا وڭدەۋ زاۋىتى سالىنىپ جاتىر. شاردارا اۋدانىندا ورنالاسقان ەكى كاسىپورىندى ىسكە قوسۋ وسى قاراشا، جەلتوقسان ايلارىنىڭ سوڭىنا جوسپارلانىپ وتىر. بۇل تۋرالى Abai.kz اقپاراتتىق پورتالى قازاقپارات اگەنتتىگىنە سىلتەمە جاساي وتىرىپ حابارلايدى.

«TURKISTAN INVEST» ينۆەستيتسيالىق كومپانياسى ءباسپاسوز قىزمەتىنىڭ مالىمەتىنشە، زاۋىتتاردىڭ ءبىرىن سالۋعا ينۆەستورلار 5 ميلليارد 475 ميلليون تەڭگە قاراجات سالدى. نىساننىڭ جالپى اۋماعى - 13 گەكتار. 250-300 ادامدى جۇمىسپەن قامتيتىن كاسىپورىنننىڭ وندىرىستىك قۋاتى جىلىنا 150 مىڭ تونناعا جەتەدى. دايىن ءونىم تولىقتاي قىتاي ەلىنە تاسىمالدانادى.

بۇگىنگى كۇنى مۇندا وندىرىستىك عيماراتتاردىڭ قۇرىلىسى جۇرگىزىلۋدە. نىسانعا قاجەتتى جابدىقتار مەن تەحنيكا جەتكىزىلگەن. ال، ەكىنشى زاۋىتتىڭ قۇرىلىسىن قارجىلاندىرۋ وزبەكستاندىق ينۆەستيتسيالار ەسەبىنەن جۇرگىزىلۋدە.

جوبالىق قۇنى 890 ملن تەڭگە بولاتىن نىسان «شاردارا» يندۋستريالدىق ايماعىندا 10 گەكتار جەرگە سالىنۋدا. وندىرىستىك قۋاتتىلىعى 50 مىڭ توننا بولاتىن زاۋىتتا 50 جۇمىس ورنى اشىلادى دەپ جوسپارلانىپ وتىر. قازىرگى ۋاقىتتا نىساندا قۇرىلىس-مونتاجداۋ جۇمىستارى جۇرگىزىلۋدە. بۇل كومپانيانىڭ ونىمدەرى دە قىتايعا ەكسپورتتالماق.

Abai.kz