ەلباسى ن.نازارباەۆ “قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ” اتتى قازاقستان حالقىنا ارناعان جولداۋىندا حالىقتى قولجەتىمدى فورماتسەۆتيكالىق ونىمدەرمەن قامتۋ قاجەتتىگىنە دە ارنايى توقتالعان بولاتىن. سونداي-اق، وڭىرلەردەگى ءوندىرىس ورىندارىنىڭ دا ماڭىزدىلىعىنا باسا نازار اۋداردى. 

وسى ورايدا، تۇركىستان وبلىسىنداعى ءوندىرىس ورىندارىنىڭ دا اياسى كەڭەيىپ كەلەدى. ءوندىرىلىپ جاتقان ونىمدەردىڭ ساپاسى ارتىپ، الەمدىك نارىقتا باسەكەلەس بولا الاتىنداي دارەجەگە دە جەتتى. اسىرەسە، وڭتۇستىك ءوڭىرى مەديتسينا سالاسىنداعى ءدارى-دارمەك پەن قۇرىلعىلار ءوندىرۋ جاعىنان ەلىمىزدە الدىڭعى قاتارداعى ورىنداردا تۇر. «حيمفارم» زاۋىتىن ايتپاعاننىڭ وزىندە «ەكوفارم ينتەرنەيشنل» كومپانياسى وندىرەتىن ونىمدەردىڭ ءوزى نەگە تۇرادى؟!

ەندى ءبىزدىڭ ءوڭىر كوسمەتسەۆتيكا سالاسىنا دا دەن قويدى. اسىرەسە، وسى سالانىڭ مامانى باقىتجان بيسەمباەۆ باسشىلىق جاسايتىن «راۋان» فارماتسەۆتيكالىق كومپانياسى ءوندىرىپ وتىرعان كوسمەتيكالار بۇگىندە جوعارى سۇرانىسقا يە بولىپ تۇر.

ايتا كەتەيىك، 1990 جىلى عىلىمي-وندىرىستىك ورتالىق رەتىندە اشىلعان كومپانيا باستاپقىدا فوسفات شىعارسا، كەيىن ءتىس ەمدەيتىن پرەپاراتتار وندىرە باستادى. ودان سوڭ حالىق ءجيى پايدالاناتىن، بىراق سول زاماندارى تاپشى بولىپ تۇرعان دارىلىك پرەپاراتتار ءوندىردى. 36 ءتۇرلى كەڭ كولەمدى كەرەكتى دارىلەر شىعارعان. كاسىپورىن باسشىلىعىنىڭ ايتۋىنشا، وسىلايشا تاجىريبە جيناعان ماماندار 2008 جىلى ۇيدە جانە كلينيكالاردا قولدانۋعا ارنالعان تازالاعىش سۇيىق زاتتار ءوندىرۋدى قولعا العان. «ZOR» دەگەن اتاۋمەن شىعارىلعان سۇيىقتىق زاتتار ءوڭىرىمىزدىڭ جانە ەلىمىزدىڭ بارلىق ايماعىنا تاراتىلىپ ءجۇر.

بۇگىندە اتاۋىن «راۋان» دەپ وزگەرتكەن كومپانيا كوسمەتسەۆتيكالىق پرەپاراتتارعا دەن قويدى. كوسمەتسەۆتيكا – بەت-الپەتتى ادەمىلەۋ، ارلەۋ سىندى كوسمەتيكا ەمەس، بۇل ادامنىڭ اشىق جەرلەرىن، ياعني كەلبەتىن ەمدەيتىن، جوندەيتىن، ورنىنا كەلتىرەتىن قاسيەتى بار عىلىم. دەمەك، ناتيجە بەرەتىن پرەپاراتتار وندىرەدى. قوسپانىڭ 405 ءتۇرى پايدالانىلاتىن بۇل پرەپاراتتارعا

11 ءتۇرلى حيميا قولدانىلادى. شيكىزات تولىعىمەن شەتەلدەن اكەلىنەدى. لوسون، گەل، ەمۋلسيا، پيلينگ، پاستا جانە كرەم سىندى ادامنىڭ اشىق تەرىسىن ەمدەيتىن جانە جوندەيتىن بۇل پرەپاراتتاردىڭ فيزيكالىق-حيميالىق تۇرعىدا ارقايسىسىنىڭ ءوزىنىڭ جەكە تەحنولوگياسى بار. شاش كۇتىمى، بەت كۇتىمى، كۇننەن قورعايتىن تاۋارلار ەرەكشەلىكتەرىنە قاراي جەكە-جەكە اپپاراتتا دايىندالادى.

كوسمەتسەۆتيكاعا دەيىن بىرقاتار باسپالداقتان وتكەن ءوندىرىس ورنى بىرنەشە جىل زەرتتەۋ، تاجىريبە جيناۋدىڭ ناتيجەسىندە 2013 جىلى كوپتەن كۇتكەن جوبانى قولعا الدى. «جوبامىزدىڭ 1-كەزەڭىن باستاۋ ءۇشىن 5 جىل دايىندالدىم. دەرماتولوگ جانە كوسمەتولوگ سىندى دارىگەرلەرمەن جۇمىس ىستەۋدىڭ ارقاسىندا بۇگىندە كوسمەتسەۆتيكا سالاسىنداعى نەگىزگى كەرەكتى 83 ءتۇرلى پرەپارات شىعارىپ وتىرمىز. جىل سوڭىنا دەيىن مۇنىڭ قاتارىن 140-قا جەتكىزبەكپىز» دەيدى كاسىپورىن باسشىسى باقىتجان بيسەمباەۆ.

اتالعان كومپانيامەن بىرىگىپ جۇمىس ىستەپ جۇرگەن مەديتسينالىق ورتالىقتىڭ دەرماتولوگ دارىگەرى الما ساعاتقىزى بۇل كومپانيا تۋرالى ءوزىنىڭ جىلى لەبىزىن ءبىلدىردى. قاراپايىم كوسمەتيكا ەمەس، ادامنىڭ اشىق تەرىسىن ەمدەيتىن قاسيەتى بار كوسمەتيكالىق زاتتار شىعاراتىن «راۋاندىقتاردىڭ» تاۋارى بۇگىندە جوعارى سۇرانىسقا يە ەكەنىن تىلگە تيەك ەتتى. «راۋان» كومپانياسى ەكى جىلدان بەرى الماتى جانە استانا قالالارىندا وتكەن كورمەلەرگە قاتىسىپ، مامانداردىڭ جوعارى باعاسىن الىپ ءجۇر. ءوزىم ۇنەمى وسى كومپانيانىڭ تاۋارىن قولدانامىن. باعالارى دا قولجەتىمدى. كەيبىرى قىمبات. بىراق ولار باسقا جەردە جوق. سوندىقتان وعان تۇسىنىستىكپەن قاراۋ كەرەك» دەيدى ا.سۇرانشيەۆا.

كومپانيا باسشىسى باقىتجان تىلەۋىمبەتۇلى – وسى سالانىڭ مامانى. ءوز ءىسىن ەرەكشە سۇيەتىن مامان قيىندىقتارعا، كەدەرگىلەرگە مويىعان جوق. قايتا ىزدەنىپ، جىگەرلەنىپ، جۇمىسىن ودان ءارى دامىتۋ جولىندا تەر توكتى. مىنە، وسىلايشا ول قازاقتىڭ قولىنان دا كوسمەتيكالىق زات شىعارۋ كەلەتىنىن وزگەلەرگە دالەلدەپ وتىر. قازىر سەرىكتەس كومپانيالار كاسىپورىن تاۋارلارىنا قىزىعا قاراپ، بىرگە جۇمىس ىستەۋ ءۇشىن بىرقاتار كەلىسىمشارتقا قول قويدى. ەندى ونىمدەردى شەتەلگە شىعارۋ جوسپارلانۋدا. مۇندا ءوزىنىڭ بەت تەرىسىنە وراي تاپسىرىس بەرەتىندەر دە بار. كومپانيا باسشىسىنىڭ ايتۋىنشا، قانشالىقتى داعدارىس بولسىن، ادامنىڭ سۇلۋلىققا دەگەن تالپىنىسى توقتامايدى ەكەن. قايتا ءجيى-ءجيى جاڭا ءتۇرى شىعىپ تۇرادى. بۇگىندە كاسىپورىن تاۋارىن ينتەرنەت ارقىلى ساتۋدا قارقىندى جۇمىس ىستەپ جاتىر.

نازگۇل نازاربەكوۆا

Abai.kz