«تسيفرلىق قازاقستان» باعدارلاماسىن مەملەكەت باسشىسى حالىققا ارناعان جولداۋىندا ەرەكشە اتاپ وتكەن بولاتىن. اقپاراتتىق تەحنولوگيالاردىڭ قارىشتاپ دامىپ بارا جاتقان مىنا زامانىندا IT سالاسىن دامىتپاساق، دامىعان 30 ەلدىڭ قاتارىنان كورىنۋ بىزگە جاي ارمان بوپ قالارى انىق. ويتكەنى، وركەنيەتتى ەلدەردىڭ بارلىعى وسى ساندىق جۇيەگە كوشىپ، ونەركاسىبىنىڭ دامۋىن جانە حالقىنىڭ ءال-اۋقاتىن جىلدان-جىلعا جاقسارتىپ كەلەدى.

تۇركىستان وبلىسىندا كولىك سالاسى بويىنشا جول كارتاسى جاسالىنىپ، قر ينۆەستيتسيالار جانە دامۋ مينيسترلىگى جانە «زەردە» اق-مەن كەلىسىم ورناتىلعان. بۇگىنگى كۇنى كولىك كومپانيالارى مەن ينۆەستورلار اراسىندا ەلەكتروندى بيلەتتى ەنگىزۋ تۋرالى مەموراندۋمعا قول قويىلدى.

پيلوتتى جوبا تۇركىستان قالاسىنداعى № 1ا باعىتىنداعى قوعامدىق كولىكتەرگە ەنگىزىلەدى. بۇل تۋرالى تۇركىستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە اقپاراتتاندىرۋ، مەملەكەتتىك قىزمەتتەر كورسەتۋ جانە ارحيۆتەر باسقارماسىنىڭ باسشىسى باستار ەسقاراەۆ ءمالىم ەتتى.

سونىمەن قاتار ءبىر ۋاقىتتا GPS ترەكەرى ارقىلى ەلەكتروندى بيلەت جۇيەسى ورناتىلاتىن بولادى.

تۇركىستان وبلىسىندا تسيفرلاندىرۋ جۇيەسىن دامىتا ءتۇسۋ ماقساتىندا ءبىلىم بەرۋ سالاسى بويىنشا پەداگوگيكالىق قۇرامدى جيناقتاۋ پروتسەسى اۆتوماتتاندىرىلعان. وبلىس بويىنشا جۇمىس ىزدەۋ جانە جۇمىسسىزدىق پايىزىن تومەندەتىپ، قولجەتىمدىلىكتى جانە قولايلى جاعدايدى قامتاماسىز ەتۋ ءۇشىن «jumys.sitcen.kz» جۇيەسى ەنگىزىلىپتى.

بۇرىن پەداگوگيكالىق لاۋازىمعا ۇمىتكەرلەر مەن پەداگوگيكالىق جوعارى وقۋ ورىندارىنىڭ تۇلەكتەرى بوس ورىندار تۋرالى مالىمەت الۋ ءۇشىن ءار مەكتەپتى ارالاۋ قاجەت بولسا، ەلەكتروندى جۇيە ارقىلى ءوتىنىشتى ونلاين-رەجيمدە تاپسىرىپ، اشىق كونكۋرستىق ىرىكتەۋدەن دە وتۋىنە مۇمكىندىك بەرەدى

سونداي-اق «مەكتەپكە دەيىنگى ءبىلىم بەرۋ مەكەمەلەرىنە كەزەككە قويۋ جانە جولداما بەرۋ» پروتسەسىن اۆتوماتتاندىرۋ جۇيەسى 358 مەكەمەنى قامتىپ وتىر. باسقا اۋداندار مەن قالالاردا جۇمىستار جۇرگىزىلۋدە. اتالعان جۇيەلەر ءتۇرلى سىبايلاس جەمقورلىق تاۋەكەلدەرىن جويىپ، ازاماتتار ءۇشىن بارىنشا اشىق تۇردە جانە قولايلى بولۋىن قامتاماسىز ەتەدى.

اعىمداعى جىلى تۇركىستان وبلىسىندا تسيفرلىق ءبىلىم بەرۋ رەسۋرستارىن ەنگىزۋ اياسىندا 1500 BilimBook نوۋتبۋگىن جانە 200-گە جۋىق ينتەراكتيۆتى پانەلدەرى ساتىپ الىنىپ، ناتيجەسىندە وقۋشىلاردى كومپيۋتەرمەن قامتۋ دەڭگەيى ەداۋىر ارتاتىن بولادى.

جۇزدەسۋ كەزىندە اقپاراتتاندىرۋ سالاسىنىڭ ماماندارى تۇركىستان وبلىسىندا  «DAMUMED» ءموبيلدى قوسىمشاسىنا 58933 پايدالانۋشى تىركەلگەنىن العا تارتتى. بۇل ءوڭىردىڭ بەلسەندى پايدالانۋشىلارىنىڭ 6,8 پايىزىن قۇرايدى. جالپى، كورسەتكىشتى 30 پايىزعا جەتكىزۋ جوسپارلانعان. ونىڭ ايتۋىنشا، ءموبيلدى قوسىمشانىڭ كومەگىمەن دارىگەرگە 28 645 قابىلداۋعا جازىلۋ، 1 249 ۇيگە شاقىرتۋ، 5 032 جۇكتىلىگىنە بايلانىستى ەسەپكە تۇرۋ جانە 23138 رەت 5 جاسقا دەيىنگى بالالاردىڭ اتا-انالارىن تىركەۋ سىندى قىزمەتتەر پايدالانىلعان.

جىلدىڭ سوڭىنا دەيىن دەنساۋلىق ساقتاۋ سالاسى بويىنشا 100 پايىز تەحنيكامەن قامتاماسىز ەتىپ، تولىعىمەن قاعازسىز قۇجات اينالىمىنا ءوتۋ جوسپارلانعان. سونداي-اق ءموبيلدى قوسىمشاسىمەن تۇرعىنداردىڭ 30 پايىزىن قامتۋ كوزدەلىپ وتىر.

Abai.kz