بەيسەنبى, 17 ماۋسىم 2021
2336 0 پىكىر 30 قاراشا, 2018 ساعات 11:20

تۇركىستان وبلىسى قازىعۇرت اۋدانىندا كاسىپكەرلەر سانى 8 مىڭنان اسادى

ەلباسىنىڭ "قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ" اتتى قازاقستان حالقىنا ارناعان جولداۋىندا وڭىرلەردىڭ ينۆەستيتسيالىق الەۋەتىن كوتەرۋگە باس نازار اۋدارعانى بەلگىلى.

قازىعۇرت اۋدانىندا ونەركاسىپ ءونىم كولەمىنىڭ جىل سايىن ارتۋىنا وڭىردە اشىلعان يندۋستريالدىق ايماقتىڭ ۇلەسى مول، دەپ جازادى اباي-اقپارات قازاقاقپاراتقا سىلتەمە جاساپ.

بۇگىنگى تاڭدا «قازىعۇرت» يندۋستريالدىق ايماعىنىڭ جالپى اۋماعى - 13 گەكتار. وندا 1,9 ملرد. تەڭگەنى قۇرايتىن 7 جوباعا جەر تەلىمى بەرىلگەن. 2016-2017 جىلدارى 3 جوبا ىسكە اسىرىلسا، 2018 جىلى 589 ملن. تەڭگەلىك تابيعي شىرىن سۋسىن وندىرەتىن «كورىك شق» جشس-ءى جۇمىسىن باستادى. ال 3 جوبانى 2019 جىلى ىسكە قوسۋ جوسپارلانعان. بۇل تۋرالى تۇركىستان وبلىسىنىڭ وڭىرلىك كوممۋنيكاتسيالار قىزمەتىندە وتكەن بريفينگتە قازىعۇرت اۋدانىنىڭ اكىمى تولەگەن تەلعاراەۆ مالىمدەدى.

اۋدان باسشىسىنىڭ ايتۋىنشا، الداعى جىلى يندۋستريالدى ايماقتا ىسكە قوسىلاتىن جوبالاردىڭ اراسىندا جالپى قۇنى 602,7 ملن. تەڭگەنى قۇرايتىن قۇرعاق ءسۇت جانە سارى ماي وندىرەتىن «اسىل باستاۋ KZ» جشس-ءى، قۇنى 125 ملن. تەڭگەلىك «اق-نيەت 5» وك-ءنىڭ «تەمىر بەتون ونىمدەرى» جوباسى جانە قۇنى 112,7 ملن. تەڭگە قۇرايتىن «كن ەكسپورت 777» جشس-ءنىڭ «جيھاز شىعارۋ» جوباسى بار.

«قازىعۇرت اۋدانىندا كاسىپكەرلىك سالاسى تۇراقتى تۇردە دامۋدا. دامۋدىڭ جارقىن كورىنىسى رەتىندە «وڭىرلەر كاسىپكەرلىگىن قولداۋ» باعدارلاماسىنان تىس جالپى قۇنى 135 ملن. تەڭگەلىك 2 جوبا ىسكە قوسىلعانىن ايتۋعا بولادى. ولار: «قازىعۇرت اينا» جشس-نىڭ سۇيىق شىنى ءوندىرىسى - 85 ملن. تەڭگە، «UNIFRUTTI GOLD» جشس-نىڭ جەمىستەر مەن كوكونىستەردى وڭدەۋ ارقىلى ديەتالىق پيۋرەلەر شىعارۋ ءوندىرىسى - 50 ملن. تەڭگە. ونەركاسىپ سالاسىنداعى جەتىستىكتەر جىل باسىندا جوسپارلانعان ناتيجەگە ساي ورىندالۋدا. اۋدان كولەمىندە بۇگىنگى تاڭدا جۇمىس ىستەپ تۇرعان 18 كاسىپورىن بار. اعىمداعى جىلدىڭ 10 ايىندا وڭىردەگى ونەركاسىپ كاسىپورىندارىندا 5 ملرد. 633 ملن. تەڭگەنىڭ ءونىمى ءوندىرىلىپ، وتكەن جىلدىڭ ءتيىستى كەزەڭىمەن سالىستىرعاندا ناقتى كولەم يندەكسى 103,9 پايىزدى قۇرادى»، - دەدى تولەگەن تۇرتايۇلى.

قازىعۇرت اۋدانىندا قازىرگى تاڭدا 94 شاعىن جوبا ىسكە قوسىلىپ، 405 ادام تۇراقتى جۇمىسپەن قامتىلعان. بۇدان وزگە، شاعىن جانە ورتا كاسىپكەرلەر سانى 8226-عا جەتىپ، 114,6 پايىزعا ءوستى. شاعىن جانە ورتا كاسىپكەرلىك سالاسىن دامىتۋ ماقساتىندا قارجى ۇيىمدارىنان 2018 جىلدىڭ 10 ايىندا 4565 تۇلعاعا 2414,8 ملن. تەڭگە نەسيە بەرىلدى. نەگىزگى باسىم باعىتى - اۋىل شارۋاشىلىق سالاسى بويىنشا.

Abai.kz

0 پىكىر